Read new_tumbuka_bible 2 ŴaKorinte 6 Bible Online

2 ŴaKorinte 6 - new_tumbuka_bible bible

2 ŴaKorinte 6

¹Pakuŵa ŵateŵeti ŵamoza na Chiuta, tikumuŵeyani kuti mureke kupokerera uchizi wa Chiuta pawaka.

²Pakuti Chiuta wakuti, “Pa nyengo yiweme ya uchizi wane, nkhategherezga kwa iwe, pa zuŵa la kuponoskera ŵanthu, nkhakovwira iwe.” Sono ndiyo nyengo yakwenerera. Muhanya uno ndilo zuŵa la chiponosko.

³Kuti tikuŵika chikhuŵazgo mwa waliyose chara, mwakuti uteŵeti withu ureke kususkika.

⁴Kweni mu nthowa yiliyose tikukhumba kujiyenereska nga mbateŵeti ŵa Chiuta pakuzizipizga kukuru, mu visuzgo, mu maunonono, na mu vyakufinyirizga.

⁵Tikatimbika, tikaŵikika mu gadi, ndipo ŵanthu ŵakatichitira vivulupi. Tikateŵeta chomene mpaka kuchezera na kureka kurya wuwo.

⁶Tikajiyenereska kuti ndise ŵateŵeti ŵa Chiuta pakujitozga mu mtima, pakuŵa na umanyi, pakuzizipizga, pakuŵa na lusungu ku ŵanthu, mu Mzimu Mutuŵa, mu kutemwa kwambula kupusikizga,

⁷mu mazgu gha unenesko ndiposo mu nkhongono za Chiuta. Tili na mahomwa gha urunji ku woko la maryero na ku woko la mazere ghakujivikirira.

⁸Ŵanthu ŵakutichindika, kweni ŵanji ŵakutiyuyura. Ŵanji ŵakutiyowoyera mbiri ziheni, kweni ŵanyakhe mbiri ziweme. Ŵanthu ŵanyakhe ŵakutipima nga ŵakupusika ndipouli ŵanji ŵakutipima kuti tili ŵakuneneska.

⁹Ŵanthu ŵakutipima nga mbanthu ŵambula kumanyikwa ndipouli tili ŵakumanyikwa chomene. Ŵakutipima nga mbanthu ŵa kufwa, ndipouli tili ŵamoyo. Ŵakutipima nga mbanthu awo ŵakulangika, ndipouli kuti tikukomeka chara.

¹⁰Ŵakutipima nga mbanthu ŵa chitima, ndipouli tili ŵakucha mazuŵa ghose. Ŵakutipima nga mbanthu ŵakavu, ndipouli tikusambazgiska ŵanthu ŵanandi. Ŵakutipima nga mbanthu ŵambula na kanthu kalikose, ndipouli tili navyo vyose.

¹¹Mwa ŵanthu ŵa mu Korinte, tamuyowoyerani kwambula kubisa kanthu, ndipo mtima withu ngwa kumasuka.

¹²Kuti ndise tili kumujarani mitima ghinu chara, kweni imwe ndimwe muli kujara mitima yinu kwa ise na ivyo mukutemwa.

¹³Sono nkhuyowoya kwa imwe nga mbana ŵane. Muŵe ŵakumasuka mu mitima yinu nga ndi umo ise nase taŵira ŵakumasuka kwa imwe.

¹⁴Mureke kwenda pamoza na ŵambula kupulikana. Kasi pali wenenawene uli pakati pa urunji na ubendezi? Panji kasi pali wenenawene uli pakati pa ungweru na mdima?

¹⁵Kasi pangaŵa chizomerezgo uli pakati pa Khristu na Beliyali?[1] Panji kasi uyo wakupulikana na wambula kupulikana, ŵakusangana pa kavichi?

¹⁶Kasi Nyumba ya Chiuta yikuzomerezgana uli na vikozgo? Chifukwa ise tili Nyumba ya Chiuta wamoyo. Nga ndi umo Chiuta wakayowoyera kuti, “Nditi ndikharenge mwa iwo, na kwenda mukati mwawo, ndipo nditi ndiŵenge Chiuta wawo, ndipo iwo ŵati ŵaŵenge ŵanthu ŵane.”

¹⁷Ntheura Fumu yikuti, “Fumanimo mukati mwawo, ndipo mupatukeko kwa iwo. Mungakhwaskanga kanthu ako nkhaukazuzi, ndipo ine nditi ndimupokereraninge.

¹⁸Nditi ndiŵenge wiskemwe, ndipo imwe muti muŵenge ŵana ŵane ŵanarume na ŵanakazi. Ndimo yikuyowoyera FUMU Mwenenkhongono zose.”