Read new_tumbuka_bible 2 ŴaKorinte 7 Bible Online

2 ŴaKorinte 7 - new_tumbuka_bible bible

2 ŴaKorinte 7

¹Mwa ŵakutemweka, pakuŵa na mapangano agha, tiyeni tijitozge ku chose icho chikukazuzga thupi na mzimu, ndipo mukumopa Chiuta, tiyeni tilimbelimbe kuti utuŵa withu uŵe wakufikapo.

²Mutijurire mitima yinu. Ise tilive kumuchitirapo munthu kaheni ndipo tilive kunanga pa munthu nanga nkhumuzgererapo munthu.

³Kuti nkhuyowoya ichi kumususkani chara, chifukwa nkhayowoya kale kuti imwe tikumutemwani na mtima wose mwakuti tili pamoza, manyi ndi mu umoyo panji mu nyifwa.

⁴Ine ndili na chigomezgo chikuru mwa imwe. Ndiposo kuthumbwa kwane nkhukuru mwa imwe. Ndili wakuzura na chikhwimisko. Mu suzgo yithu yose, ndili na chimwemwe chikuru chomene.

⁵Nangauli tikati tafika mu Makedoniya, mathupi ghithu ghakaŵavye chipumulo. Kweni tikaŵa na suzgo kosekose. Kuwaro kukaŵa nkhondo, ndipo wofi ukaŵa mu mitima yithu.

⁶Kweni Chiuta, mweneuyo wakusanguruska ŵakusokwa, ndiyo wakatisanguruska ise kwiza kwa Tito.

⁷Kuti tikasanguruskika na kwiza kwakhe pera chara, kweniso na chisangurusko cheneicho mukamusanguruska nacho imwe. Wakatiphalira na umo mukanwekera kuti mundiwone ine, umo chiliri chitima chinu, na phamphu linu chifukwa cha ine, mwakuti nkhasekerera kwakuruska.

⁸Chifukwa nanga karata wane wakamupani chitima, kuti nkhufipa mtima chara, nangauli kale nkhafipa nadi mtima, pakuti nkhupanikizga kuti karata yura wakamupani chitima, nanga pa kanyengo kachoko waka.

⁹Kweni sono ndili wakusekerera, kuti nchifukwa chakuti nkhamupani chitima chara, kweni chifukwa chitima chinu chikamurongozgani kuti mung'anamuke mu mtima. Chitima chinu chikaŵa chakuzomerezgana na Chiuta, ntheura mulije kusoŵerwapo kanthu chifukwa cha ise.

¹⁰Pakuti chitima cha mwa Chiuta chikupambika kung'anamuka kwa mu mtima kwenecho uko kukurongozgera ku chiponosko, ndipo kukufipiska mtima chara. Kweni chitima cha mu charu, chikupambika nyifwa.

¹¹Wonani ivyo chitima chinu cha mwa Chiuta chachita mwa imwe: chamupani phamphu, chamupanikizgirani kuti mulije kafukwa, mwaŵa ŵakari, mwaŵa ŵakwenjerwa, mwaŵa ŵakunweka kuti mundiwone ine, mwarongora phamphu pa weruzgi wakunyoroka, na umo mungalangira ŵakwananga. Mu vyose mwajirongora mwekha kuti muli ŵambula kalema pa makani agha.

¹²Ntheura nanga nkhamulemberani karata, kuti chikaŵa cha uyo wakananga chara, nesi chifukwa cha uyo wakamunangira. Kweni nkhalemba mwakuti phamphu linu pa ise livumbukwe kwa imwe panthazi pa Chiuta.

¹³Ntheura ndise ŵakusanguruskika. Ndipo pa dera pakusanguruskika kwithu, tikasekerera chomene chifukwa cha chimwemwe icho Tito wakaŵa nacho, pakuti imwe mose mukamusanguruska!

¹⁴Pakuti usange nkharongora kujikuzga kwa iyo chifukwa cha imwe, nkhakhozgeka soni chara. Kweni nga ndi umo vyose ivyo tikamuphalirani vikaŵa vya unenesko, ntheuraso kuthumbwa kwithu panthazi pa Tito kwawoneka kuŵa kwa unenesko.

¹⁵Ndipo mtima wakhe uli na chiwuravi chikuru chomene kwa imwe, para wakukumbuka kupulikira kwa imwe mose, ndipo na umo mukamupokererera na wofi na kumbwambwantha.

¹⁶Ntheura nkhusekerera chifukwa ndili na chigomezgo chakufikapo mwa imwe.