Read new_tumbuka_bible 2 ŴaKorinte 8 Bible Online

2 ŴaKorinte 8 - new_tumbuka_bible bible

2 ŴaKorinte 8

¹Mwa ŵabali, tikukhumba kuti mumanye vya uchizi wa Chiuta uwo ulikuwoneka mu mipingo ya mu Makedoniya,

²pakuti mu viyezgo vikuru vya visuzgo vyawo, kuzara kwa chimwemwe chawo na ukavu wawo wambula mayowoyeko vyafurukira mu usambazi wa wanangwa wawo.

³Pakuti ine nkhupereka ukaboni kuti ŵakapereka kwakuyana na umo ŵakasakatira, ndipo kuruska umo ŵangaperekera. Ndipo mu khumbo lawo na lawo,

⁴ŵakatiromba kuti tiŵape mwaŵi wakuti nawo ŵawovwire ŵanthu ŵa Chiuta mu Yudeya.

⁵Chinthu ichi ise tikaŵaghanaghaniranga kuti ŵangachita chara, kweni ŵakadanga kujipereka iwoŵene kwa Fumu, na kwa ise, mu khumbo la Chiuta.

⁶Mwa ntheura tikamupempha Tito kuti wawufiske mukati mwinu mlimo uwu wakusakata vyakupereka vyakovwira ŵanthu weneuwo iyo wakamba kale.

⁷Sono nga ndi umo mukuruskira mu vyose: mu chipulikano, mu kayowoyero, mu umanyi, mu phamphu lose, na mu chitemwa chinu kwa ise, muwone kuti mukuruskaso mu mlimo uwu wakusakata vyakupereka vyakovwira ŵanthu.

⁸Kuti nkhuyowoya ichi nga ndi languro chara, kweni pakuyowoya za phamphu la ŵanthu ŵanyakhe, nkhukhumba kuwona usange kutemwa kwinu nako nkhwa nadi.

⁹Chifukwa mukumanya uchizi wa Fumu yithu Yesu Khristu, kuti nanga wakaŵa musambazi, kweni chifukwa cha imwe wakaŵa mukavu, mwakuti mu ukavu wakhe imwe musambazgikiremo.

¹⁰Ndipo sono nkhumuphalirani icho nchiweme chomene pa makani agha. Chirimika chamara, imwe ndimwe mukaŵa ŵakwamba, kupereka pera chara, kweni na kuŵa na khumbo la kuchita wuwo.

¹¹Ntheura sono fiskani mlimo winu. Muŵe ŵakunweka kuwufiska nga ndi umo mukanozgekera, ndipo muchite kwakuyana na ivyo muli navyo.

¹²Pakuti usange muli na mtima wakunweka, chawanangwa nchakuzomerezgeka kwakuyana na umo mwanozgekera, kuti nkhwakuyana na icho mulije chara.

¹³Kuti nkhung'anamula kuti ŵanyakhe ŵapepuskike apo ŵanyakhe ŵakuzotofyeka chara kweni kuti mose muyane waka.

¹⁴Kweni pa nyengo ya sono apo imwe muli na vinandi mupereke kwa awo ŵalije, mwakuti nawo para ŵamkuŵa na vinandi, ŵazakamovwirani para mulije. Ntheura mwamkuyana waka.

¹⁵Nga ndi umo kuli kulembekera kuti, “Uyo wakawunjika vinandi kuti wakaŵiraposo na vinyakhe chara. Uyo wakawunjika vichoko kuti wakasoŵerwa chara.”

¹⁶Timuwonge Chiuta uyo waŵika mu mtima wa Tito phamphu lakumovwirani nga ndi ilo ili mwa ise.

¹⁷Chifukwa Tito kuti wakapokerera pempho lithu pera chara kweni iyomwene, pakuŵa na phamphu likuru lakovwira, wakiza kwa imwe mu khumbo lakhe.

¹⁸Ndipo pamoza na iyo tikutuma mubali withu uyo ngwa kumanyikwa na mipingo wose chifukwa cha kupharazga kwakhe kwa Uthenga Uweme.

¹⁹Kuti ndi icho pera chara, kweni wasoreka na mipingo kuti watiperekezge pakwiza kapereka vyawanangwa ivyo tasakata, mwakuti tichindike Fumu, na kurongora mtima withu wakukhumba kovwira.

²⁰Tikukhumba kuti paŵavye munthu wakutisuska na umo tikuteŵeteskera chawanangwa chakuperekeka na ŵanthu mu wanangwa.

²¹Chifukwa tikukhumba kuchita icho nchiweme pa maso pa Fumu pera chara, kweniso na pa maso pa ŵanthu wuwo.

²²Pamoza na aŵa tikutuma mubali withu, mweneuyo tamuyezga kanandi ndipo tamusanga kuti ngwa kunweka kovwira. Ndipo sono pakuti ngwa kunweka chomene kuruska kale, wali na khumbo likuru la kovwira.

²³Kwakuyana na Tito, iyo ndi munyane ndipo wa nchito munyane pakumuteŵeterani. Ndipo kwakuyana na ŵabali ŵithu, iwo ndi nthumi za mipingo, ndiposo uchindami wa Khristu

²⁴Ntheura rongorani chipanikizgo cha kutemwa kwinu, panthazi pa mipingo na umo tikuthumbwira na za imwe ku ŵanthu aŵa.