Read new_tumbuka_bible 2 ŴaKorinte 9 Bible Online

2 ŴaKorinte 9 - new_tumbuka_bible bible

2 ŴaKorinte 9

¹Kukukhumbikwa chara kumulemberani na vyakupereka vyakovwira ŵanthu ŵa Chiuta mu Yudeya.

²Pakuti nkhumanya phamphu linu lakovwira, leneilo nkhuthumbwirapo chifukwa cha imwe ku ŵanthu ŵa mu Makedoniya pakuyowoya kuti, “Ŵabali mu Akaya ŵaŵa ŵakunozgeka kufuma chirimika chamara.” Ndipo phamphu linu lachiska ŵanthu ŵanandinandi ŵa iwo.

³Kweni nkhuŵatuma ŵabali mwakuti kuthumbwa kwithu mwa imwe pa makani agha kureke kuŵa kwa waka, mwakuti muŵe ŵakunozgeka nga ndi umo nkhayowoyera kuti ndimo muŵire.

⁴Chifukwa usange ŵanthu ŵanji ŵa ku Makedoniya ŵangiza nane, na kusanga kuti mundanozgeke, soni zamtikora, chomenechomene imwe, chifukwa ŵaŵenge ŵakugomezga chomene.

⁵Ntheura nkhaghanaghana kuti nchakwenerera kuŵaphalira ŵabali ŵithu kuti ŵandidangirire kwa imwe kuti ŵanozgere nkhanira chawanangwa ichi icho mukapangana kupereka, mwakuti chizakaŵe chakunozgeka nga nchawanangwa chakuperekeka mu khumbo linu kwambula kuchichizgika.

⁶Manyani ichi kuti, uyo wakumija tuchoko, wati wavunenge tuchoko, ndipo uyo wakumija vinandi wati wavunenge vinandi.

⁷Munthu yose waperekenge nga umo wadumulira mu mtima wakhe, na kudonda chara nesi kuchichizgika, pakuti Chiuta wakutemwa uyo wakupereka na kusangwa.

⁸Chiuta wakumanya kumutumbikani na vyawanangwa vinandinandi mwakuti nyengo zose muŵenge navyo vyakukwanira vyose ivyo mukukhumba kuti wapereke mwakuzara pa mlimo wose uweme.

⁹Nga ndi umo kuli kulembekera kuti, “Chiuta wakupereka mwa wanangwa ku ŵakavu, urunji wakhe ukukhalirira kwa muyirayira.”

¹⁰Sono Chiuta, uyo wakupereka mbuto ku mumiji na chakurya kuti warye, wati waperekenge na kwandaniska mbuto iyo mwaseŵa. Wati wandaniskeso vuna ya urunji winu.

¹¹Mwamkusambazgika mu nthowa yiliyose chifukwa cha ukuru weneuwo kwizira mwa ise uti uperekenge viwongo kwa Chiuta.

¹²Chifukwa kuchita mlimo uwu, kuti ndikupereka ivyo ŵanthu ŵa Chiuta ŵakusoŵerwa pera chara, kweniso kwandaniska na viwongo vinandi kwa Chiuta.

¹³Chifukwa pasi pa chiyezgo cha mlimo uwu muti muchindikenge Chiuta na kupulikira kwinu pakuzomera Uthenga Uweme wa Khristu, ndiposo na kupereka kwinu kwa wanangwa kwa iwo na ŵanyakhe wose.

¹⁴Ŵamkumuromberani na mtima wa kunweka, chifukwa cha uchizi wakuruska weneuwo Chiuta wali kumupani.

¹⁵Tiyeni timuwonge Chiuta chifukwa cha chawanangwa chakhe chambula mayowoyeko.