Read new_tumbuka_bible ŴaGalatiya 1 Bible Online

ŴaGalatiya 1 - new_tumbuka_bible bible

ŴaGalatiya 1

¹Kufuma kwa ine Paulosi, wakutumika, ndamwene ine kuti nkhasankhika na ŵanthu nesi kwizira mu munthu chara, kweni na Yesu Khristu, na Chiuta Dada uyo wakamuwuska ku ŵakufwa,

²pamoza na ŵakhristu wose awo ŵali na ine. Ku mipingo ya ku Galatiya:

³Uchizi na mutende vya kufumira kwa Chiuta Dada na Fumu yithu Yesu Khristu viŵenge namwe.

⁴Khristu wakajipereka chifukwa cha zakwananga zithu, mwakuti watithaske ku uheni wa umoyo uno, kwakuyana na khumbo la Chiuta, Ŵadada ŵithu.

⁵Kwa iyo kuŵenge uchindami kwa muyirayira. Ameni.

⁶Nkhuzizwa kuti mwafumako mwaluŵiro kwa Chiuta uyo wakamuchemani imwe mu uchizi wa Khristu, ndipo mwagomezga Uthenga Unyakhe.

⁷Kuli Uthenga Uweme unyakhe chara, kweni pali ŵanthu ŵanji awo ŵakumusuzgani ndipo ŵakukhumba kunyongorora Uthenga Uweme wa Khristu.

⁸Kweni nanga tingaŵa ise panji mungelo wa kuchanya, usange wangamupharazgirani Uthenga Uweme wakupambana na uwo tikamupharazgirani, watembeke.

⁹Nga ndi umo tayowoyera kale, ntheura sono nkhuwerezgaso nkhuti, usange munthu yunji wakumupharazgirani Uthenga Uweme wakupambana na uwu muli kupokera, watembeke.

¹⁰Kasi sono nkhukhumba kurumbika na ŵanthu panji na Chiuta? Kasi nkhuyezga kukondweska ŵanthu? Usange ndichali kukondweska ŵanthu, ipo nkhwenera kuwa muteŵeti wa Khristu chara.

¹¹Mwa ŵabali, mumanye kuti Uthenga Uweme uwo nkhumupharazgirani kuti ngwa kwatika na munthu chara.

¹²Kuti nkhawupokera kufuma ku munthu chara, nanga nkhusambizgika na munthu, kweni Yesu Khristu yekha ndiyo wakandivumbulira.

¹³Chifukwa namwe muli kupulika za umoyo wane wakale mu chisopo cha chiYuda, na umo nkhawuzikizgira mpingo wa Chiuta, na kuyezga chomene kuti ndiwusakaze.

¹⁴Nkhaŵaruska wose ŵa nthanga yane mu kamanyiro ka chisopo cha chiYuda ndipo nkhaŵa wa phamphu chomene pa maluso gha ŵasekuru ŵithu.

¹⁵Kweni para uyo wakandisora ine pambere ndindababike, ndipo wakati wandichema mu uchizi wakhe,

¹⁶wakakondwa pakumuvumbula Mwana wakhe kwa ine, mwakuti ndipharazge Uthenga Uweme wa vya iyo ku ŵamitundu, kuti nkhapenja urongozgi ku munthu munyakhe chara.

¹⁷Nanga nkhu Yerusalemu kuti nkhayako chara kuti nkhawonane na awo ŵakaŵa ŵakudanga kuŵa ŵakutumika. Kweni nkharuta ku Arabiya, ndipo nkhawereraso ku Damaseko.

¹⁸Pamanyuma pa virimika vitatu, nkhakwerera ku Yerusalemu kuti nkhakumane na Kefase, ndipo nkhakhara nayo mazuŵa 15.

¹⁹Kuti nkhawonanako na wakutumika munyakhe chara, kweni Yakhobe pera munung'una wa Fumu.

²⁰Nkhurapa panthazi pa Chiuta kuti, ivyo nkhumulemberani kuti nvya utesi chara.

²¹Pamanyuma pakhe nkharuta ku chigaŵa cha Siriya na cha Kilikiya.

²²Ŵa mu mipingo ya Khristu iyo yili mu Yudeya ŵakaŵa ŵandandiwone na kundimanya makora.

²³Ŵakapulika waka ivyo vikayowoyeka kuti, “Munthu uyo pa nyengo yimoza wakatizikizganga, sono wakupharazga vya chipulikano icho wakayezgapo kuchibwangandula.”

²⁴Ntheura ŵakamuchindika Chiuta chifukwa cha ine.