Read new_tumbuka_bible ŴaGalatiya 2 Bible Online

ŴaGalatiya 2 - new_tumbuka_bible bible

ŴaGalatiya 2

¹Pamanyuma pa virimika 14, nkhakwerereraso ku Yerusalemu pamoza na Baranaba. Nkhatoraso Tito kuti warute nane.

²Nkharuta chifukwa Chiuta wakandivumbulira kuti ndirute. Nkhakumana na ŵarongozgi ŵa mpingo wa Chiuta mu udesi na kuŵarongosorera Uthenga Uweme uwo nkhapharazga pakati pa ŵamitundu. Nkhakhumba chara kuti mlimo wane wakudanga panji wa sono utondeke.

³Nanga ndi Tito, uyo wakaŵa nane, nangauli wakawa muGriki, kuti wakachichizgika kukotoreka chara.

⁴Kweni chifukwa cha ŵabali ŵanji ŵatesi, awo ŵali kunjira mu mpingo mu udesi, ŵakakhumbanga kuti iyo wakotoreke. Iwo ŵakanjira nga ndi mphachi kuti ŵazakawone wanangwa withu uwo tili nawo mwa Khristu Yesu, mwakuti ŵatiŵike ise mu uzga.

⁵Kuti tikaŵazomerezga na pachoko pose chara chifukwa tikakhumbanga kumusungirani unenesko wose wa Uthenga Uweme.

⁶Kweni awo ŵakawoneka kuti mbarongozgi ŵakuzirwa, nangauli kwa ine kuti pali mphambano chara umo ŵakaŵira mu kuzirwa kwawo, chifukwa Chiuta kuti ndi murumba chisko chara. Aŵa kuti ŵakasazgirako kanthu kanyakhe kwa ine chara.

⁷Kweni mu unenesko wose ŵakawona kuti nkhapika mlimo wakupharazga Uthenga Uweme ku ŵambula kukotoreka, nga ndi umo Petrosi wakapikira mlimo wakupharazga Uthenga Uweme ku ŵakukotoreka.

⁸Chifukwa uyo wakagwira mlimo mwa Petrosi pa uteŵeti wakhe nga wakutumika ku ŵakukotoreka, ndiyoso wakagwira mlimo mwa ine pa uteŵeti wane ku ŵamitundu.

⁹Ntheura Yakhobe, Kefase na Yohane awo ŵakapimika kuŵa mizati, ŵakati ŵawona uchizi wa Chiuta uwo ukapika kwa ine ŵakatikora chasa cha wenenawene ine na Baranaba. Ndipo tikazomerezgana kuti ise tirutenge ku ŵamitundu kweni iwo ŵarutenge ku ŵakukotoreka.

¹⁰Kweni ŵakatipempha kuti tikwenera kuŵakumbuka ŵakavu. Chinthu ichi ndicho nkhaŵa kale wakunweka kuchita.

¹¹Kweni para Kefase wakiza ku Antiyoke, nkhamususka pa maso pa wose chifukwa wakananga pakweru.

¹²Chifukwa para ŵakaŵa ŵandafike ŵanthu awo Yakhobe wakaŵatuma, iyo wakaryanga waka pamoza na ŵamitundu. Kweni ŵakati ŵafika wakajipatulako na kureka kurya nawo pamoza, chifukwa wakopanga ŵanthu awo ŵakaŵa na khumbo lakuti ŵamitundu ŵakotoreke.

¹³ŴaYuda ŵanyakhe awo ŵakaŵa penepara ŵakamurondezga Kefase mu mphuvya zakhe. Ndipo Baranaba nayo wakapurukira ku mphuvya zawo.

¹⁴Nkhati ndawona kuti makhaliro ghawo ghakayana na unenesko wa Uthenga Uweme chara, nkhamuphalira Kefase panthazi pa wose kuti, “Usange iwe wa muYuda, ukukhara umo ŵakukhalira ŵamitundu, ndipo nga mbaYuda chara, kasi chifukwa uli ukuchichizga ŵamitundu kuti ŵakhare nga mbaYuda?”

¹⁵Ise taŵeneise tili ŵaYuda pakubabika, ndipo tili ŵamitundu awo mbakwananga chara,

¹⁶tikumanya kuti munthu wakurunjiskika na milimo ya marango chara, kweni na chipulikano mwa Yesu Khristu. Ise nase tili kugomezga mwa Khristu Yesu mwakuti tirunjiskike kwizira mu chipulikano mwa Yesu Khristu, na milimo ya marango chara, pakuti palije munthu uyo wakurunjiskika na milimo ya marango.

¹⁷Kweni usange ise, pakukhumba kuŵa ŵakurunjiskika mwa Khristu, naseso tikasangika kuŵa ŵakwananga. Kasi chikung'anamula kuti Khristu wakuteŵetera kwananga? Na pachoko pose!

¹⁸Usange nkhuzengaso vinthu ivyo nkhabwangandula, ipo nkhujirongora kuti ndili wakupuvya.

¹⁹Chifukwa kwizira mu Dango ine nkhafwa ku Dango, mwakuti ndikharenge wamoyo kwa Chiuta.

²⁰Ndili kupayikika pamoza na Khristu, ntheura kuti ndine chara uyo ngwamoyo, kweni Khristu uyo wakukhara mwa ine. Ntheura umoyo uwo nkhukhalira sono mu thupi, nkhukhalira chifukwa cha chipulikano chane mu Mwana wa Chiuta, uyo wakanditemwa ndipo wakajipereka chifukwa cha ine.

²¹Kuti nkhukana uchizi wa Chiuta chara. Pakuti usange urunji ukwiza chifukwa chakurondezga Dango, ipo Khristu wakafwa kwambula chandulo.