Read new_tumbuka_bible ŴaGalatiya 3 Bible Online

ŴaGalatiya 3 - new_tumbuka_bible bible

ŴaGalatiya 3

¹Mwa ŵaGalatiya ŵakupusa imwe! Kasi ndi njani wamurowani? Para ine nkhapharazga Yesu Khristu, nkhamurongora pakweru pa maso pinu nga wakupayikika pa mphinjika.

²Nkhukhumba kumufumbanipo chinthu chimoza pera: Kasi mukapokera Mzimu chifukwa cha milimo ya Dango, panji chifukwa chakupulika na chipulikano?

³Kasi muli ŵakupusa ntheura? Imwe mukamba na Mzimu, kasi sono mukukhumba kumalira na vya thupi?

⁴Kasi vyose ivyo vikamuchitikirani vikaŵa vya waka? Usange vikaŵa vyawaka,

⁵kasi uyo wakamupani Mzimu na kuchita vya minthondwe mukati mwinu, wakuyichitira na milimo ya marango panji kwizira mu chipulikano?

⁶Nga ndi umo malembo ghakuyowoyera za Abrahamu kuti “Abrahamu wakapulikana na Chiuta, ndipo Chiuta wakamupima kuti ndi murunji.”

⁷Ntheura mukwenera kumanya kuti ndi ŵanthu ŵakupulikana awo mbana ŵa Abrahamu.

⁸Ndipo malembo, pakuwona nkhanira kuti Chiuta wamkuŵarunjiska ŵamitundu mu chipulikano, ghakapharazgirathu Uthenga Uweme kwa Abrahamu, kuti, “Mafuko ghose ghamkutumbikikira mwa iyo.”

⁹Ntheura awo mbanthu ŵakupulikana, ŵakutumbikika pamoza na Abrahamu uyo wakaŵa na chipulikano.

¹⁰Wose awo ŵakuŵika mtima pa milimo ya dango mbakutembeka. Chifukwa chili kulembeka kuti, “Ngwakutembeka yose uyo wakureka kusunga na kuchita vyose ivyo vili kulembeka mu Buku la Marango.”

¹¹Kweni nchapakweru kuti kulije munthu uyo Chiuta wali kumurunjiska chifukwa chakusunga marango, pakuti, “Murunji wati waŵenge wamoyo kwizira mu chipulikano.”

¹²Kweni marango kuti ghali kwima pa chipulikano chara, kweni nga ndi umo malembo ghakuyowoyera kuti, “Munthu uyo wakuchita vyose ivyo marango ghakuyowoya, waŵenge na umoyo pakuchita ntheura.”

¹³Kweni Khristu wali kutiwombola ise ku nthembo ya marango pakuzgoka kuŵa wakutembeka chifukwa cha ise. Pakuti kuli kulembeka kuti, “Ngwakutembeka waliyose uyo wakupayikika pa khuni.”

¹⁴Vitumbiko vya Abrahamu viperekeke ku ŵamitundu yose kwizira mwa Khristu Yesu. Ndipo kuti pakupulikana, tipokere Mzimu uwo Chiuta wakalayizga kutipa.

¹⁵Mwa ŵabali, ndipereke chiyerezgero cha unthu. Usange ŵanthu ŵaŵiri ŵakuchita phangano na kulikhozga phangano lawo, palije yumoza uyo wangaswa phangano ili nanga nkhusazgirapo.

¹⁶Sono mapangano ghakaperekeka kwa Abrahamu na ku mphapu yakhe. Phangano likuyowoya chara kuti, “na ku mphapu zakhe,” kung'anamula mphapu zinandi. Kweni kung'anamula mphapu yimoza pera, ndiyo Khristu.

¹⁷Icho nkhung'anamula ndi ichi: Chiuta wakachita phangano, ndipo wakapangana kulifiska. Marango, agho ghakiza pamanyuma pa virimika 430, kuti ghakumanya kuswa na kusisita phangano ilo Chiuta wakachita kale chara.

¹⁸Chifukwa usange chiharo nchakuchipoka chifukwa chakusunga marango, ipo vitumbiko kuti vikaperekeka chifukwa cha phangano chara. Kweni Chiuta wakamupa Abrahamu chifukwa wakapangana nayo.

¹⁹Chifukwa uli marango ghakaperekeka? Ghakaperekeka chifukwa cha zakwananga yisuke yize mphapu yira ya Abrahamu iyo Chiuta wakayichitira phangano. Marango ghara ghakaperekeka na ŵangelo kwizira mwa munthu uyo wakaŵa mphemaniski.

²⁰Mphemaniski kuti wakukhumbikwa chara usange pali munthu yumoza pera, kweni Chiuta njumoza pera.

²¹Sono kasi marango ghakususkana na mapangano gha Chiuta? Na pachoko pose! Chifukwa usange marango agho ghakaperekeka ghaŵenge ghakupereka umoyo, mphanyi kurunjiskika kukuchitika chifukwa chakusunga marango.

²²Kweni malembo ghakuyowoya kuti vinthu vyose vikuwusika na kwananga, ntheura awo ŵakupulikana ŵapokere phangano la Chiuta pakupulikana mwa Yesu Khristu.

²³Pambere chipulikano chindize, tikakakika pasi pa marango, na kujalirika ku chipulikano mpaka nyengo iyo chipulikano icho chikatenge chikwiza chivumbukwe.

²⁴Ntheura marango ghakaŵa mulinda withu, mpaka apo wakizira Khristu, mwakuti na chipulikano tiŵe ŵakurunjiskika kwa Chiuta.

²⁵Kweni sono pakuti chipulikano chiza, kuti tiliso pasi pa mulinda chara.

²⁶Mose ndimwe ŵana ŵa Chiuta chifukwa cha chipulikano chinu mwa Khristu Yesu.

²⁷Pakuti mose imwe muli kubapatizikira mwa Khristu, muli kuvwara Khristu.

²⁸Ntheura palije mphambano pakati pa ŵaYuda na ŵamitundu, pakati pa ŵazga na ŵanangwa, pakati pa ŵanarume na ŵanakazi, pakuti mose muli yumoza mwa Khristu Yesu.

²⁹Usange muli ŵakhe ŵa Khristu, ipo muli mphapu ya Abrahamu, ndiposo ŵahariri ŵa phangano.