Read new_tumbuka_bible ŴaGalatiya 4 Bible Online

ŴaGalatiya 4 - new_tumbuka_bible bible

ŴaGalatiya 4

¹Icho nkhung'anamula nchakuti, mwana wangaŵa muhaliri, kweni apo wachali wanichi, kuti wakupambanapo na muzga chara, nanga iyo ndi mwenecho wa vyuma.

²Kweni wakuŵa pasi pa ŵanthu awo ŵakumusungilira na ŵakupwererera ŵa vyuma vyakhe, yisuke yize nyengo iyo wiske wakapima.

³Ntheura ise nase apo tikaŵa tichali ŵanichi, tikaŵa ŵazga ku mizimu ya mu charu.

⁴Kweni nyengo yikati yafikapo nkhanira, Chiuta wakatuma Mwana wakhe, wakubabika na mwanakazi ndipo wakaŵa pasi pa marango,

⁵kuti waŵawombole awo ŵakaŵa pasi pa marango, mwakuti tizgoke ŵana ŵa Chiuta.

⁶Pakuti ndimwe ŵana ŵakhe, Chiuta wali kutuma mu mitima yinu Mzimu wa Mwana wakhe, mweneuyo wakuchemerezga kuti, “Abba!”, ndiko kuti, “Ŵadada!”

⁷Ntheura mwa Chiuta kuti uliso muzga chara, kweni mwana. Ndipo usange uli mwana, ipo uliso muhaliri.

⁸Kweni kale apo mukaŵa mundamanye Chiuta, mukaŵa ŵazga ku vilengiwa ivyo mukaŵiro kuti mba chiuta chara.

⁹Kweni sono apo mukumanya Chiuta, panji chomene ndiyowoye kuti, apo Chiuta wakumumanyani imwe, kasi kwaŵirachi kuti muwerereso ku mizimu ya mu charu iyo nja wakawaka na yambula nkhongono? Chifukwa uli mukukhumba kuŵaso ŵazga ŵa mizimu iyi?

¹⁰Mukusunga mazuŵa, myezi, zinyengo ndiposo na virimika.

¹¹Nkhufipa mtima kuti panyakhe milimo iyo nkhagwira mukati mwinu yikaŵa yambula chandulo.

¹²Mwa ŵabali ŵane, nkhumuŵeyani, muŵe nga ndine, chifukwa ine ndili nga ndimwe. Imwe kuti muli kundinangirapo chara.

¹³Mukumanya kuti nchifukwa cha vyakuŵinya vya mu thupi rekani nkhapharazga Uthenga Uweme kwa imwe pakudanga.

¹⁴Nangauli uŵiro wane ukaŵa chiyezgo kwa imwe kuti mukandiyuyura nesi kundikana chara. Kweni imwe, mukandipokerera nga ndi mungelo wa Chiuta, nga ndi Khristu Yesu mwenecho.

¹⁵Mukaŵa ŵakukondwa chomene, kasi sono kwawachi? Ine ndingamupanikizgirani kuti, chiŵenge chamachitiko mphanyi mukakozombora maso ghinu na kundipa ine.

¹⁶Kasi sono ndazgoka murwani winu pakumuphalirani unenesko?

¹⁷Ŵanthu ŵara ŵakumupenjani na phamphu, kweni kuti na chakurata chiweme chara. Ŵakukhumba kumujalirani kuwaro, mwakuti muŵe na phamphu pakukondwera mwa iwo.

¹⁸Nkhuweme kuŵa na phamphu pa chinthu chiweme nyengo zose, kweni kuti para ndili pamoza na imwe pera chara.

¹⁹Mwa ŵana ŵane, umo mwanakazi wakupulikira vyakuŵinya pakubaba mwana, ine naneso nkhupulika vyakuŵinya chifukwa cha imwe, wasuke Khristu wapangike mukati mwinu.

²⁰Ndakhumbanga kuti mphanyi ndanguŵa namwe sono mwakuti ndisinthe kayowoyero ka mazgu ghane, pakuti nkhuzizikika namwe.

²¹Mundiphalire, imwe mukunweka chomene kuŵa pasi pa marango, kasi mukupulika chara na ivyo marango ghakuyowoya?

²²Chifukwa kuli kulembeka kuti, Abrahamu wakaŵa na ŵana ŵaŵiri ŵanarume, yumoza wakubabika na mwanakazi muzga, munyakhe wakubabika mu mwanakazi mwanangwa.

²³Mwana wakhe wa mu mwanakazi muzga, wakababika kwakuyana na unthu. Kweni mwana wa mwanakazi mwanangwa, wakababika na phangano la Chiuta.

²⁴Sono ichi tichitore nga ndi chiyerezgero. Ŵanakazi ŵaŵiri aŵa ndi mapangano ghaŵiri. Yumoza uyo ŵana ŵakhe ŵakubabika ŵazga ndiyo Hagara, ndipo ndiyo phangano ilo likapangika pa Phiri la Sinayi.

²⁵Hagara wakwimilira Phiri la Sinayi mu Arabiya. Ndipo ndiyo chiyerezgero cha msumba wa lero wa Yerusalemu, uwo uli mu uzga pamoza na ŵana ŵakhe.

²⁶Kweni Yerusalemu wa kuchanya ndi mwanangwa, ndipo ndiyo mama withu.

²⁷Chifukwa kuli kulembeka kuti, “Sekerera chumba iwe, wambula kubaba. Ndipo chemerezga na kukondwa, iwe uli mu vyakuŵinya vya kubaba chara. Pakuti mwanakazi uyo wakujikhalira yekha wali na ŵana ŵanandi kuruska uyo wali na mufumu wakhe.”

²⁸Sono ise, mwa ŵabali, ndise ŵana ŵa phangano nga Yisake.

²⁹Kweni nga pa nyengo yira, mwana uyo wakababika kwakuyana na unthu, wakasuzga mwana uyo wakababika kwakuyana na Mzimu, ndimo kuliri na sono wuwo.

³⁰Kweni kasi sono malembo ghakuti uli? “Umuchimbizge mwanakazi muzga na mwana wakhe, chifukwa mwana wa mwanakazi muzga kuti wareke kwiza kahara chuma pamoza na mwana wa mwanakazi mwanangwa chara.”

³¹Ntheura, mwa ŵabali, kuti tili ŵana ŵa mwanakazi muzga chara, kweni ŵa mwanakazi mwanangwa.