Read new_tumbuka_bible ŴaGalatiya 5 Bible Online

ŴaGalatiya 5 - new_tumbuka_bible bible

ŴaGalatiya 5

¹Khristu wali kutisutula mwakuti tiŵe ŵanangwa. Ntheura yimilirani nganganga mu wanangwa uwu, ndipo mureke kukakikaso na goliwoli la uzga.

²Tegherezgani! Ine Paulosi nkhumuphalirani kuti, usange mukuzomera kukotoreka, ndiko kuti Khristu waŵenge wa chandulo kwa imwe chara.

³Nkhumupanikizgiraso munthu yose uyo wakukotoreka kuti wakwenera kughafiska marango ghose.

⁴Imwe mukukhumba kurunjiskika na marango, mukujiwuskako ku wenenawene winu na Khristu. Ndiposo ndiko kuti mwajiwuskako ku uchizi wa Chiuta.

⁵Kweni, ise tikulindirira na chigomezgo mwa Mzimu kuti Chiuta wizamkutirunjiska kwizira mu chipulikano.

⁶Pakuti mwa Khristu Yesu kukotoreka nesi kuwura kukotoreka kuti nkhanthu chara, kweni chakuzirwa ndi chipulikano icho chikuchita milimo ya kutemwa.

⁷Mukendeskanga makora chomene! Sono kasi ndi njani uyo wakamujandizgani kupulikira unenesko?

⁸Kupemberezgeka kwinu uku kuti kukufuma kwa Chiuta uyo wakumuchemani chara.

⁹Chirungo chichoko waka chikutukumuska burunga lose la chingwa.

¹⁰Ine ndili na chigomezgo mwa Fumu kuti muti muŵenge na maghanoghano ghanyakhe chara kweni ghakuyana waka na ghane. Yose uyo wakumutimbanizgani imwe, wati wakalangike na Chiuta, nanga manyi wangaŵa njani.

¹¹Kweni ine, mwa ŵabali, usange ndichali kupharazga ukotori, chifukwa uli ndichali kuzikizgika? Usange ndingarutilira kupharazga ukotori, mphanyi ŵanthu ŵakukhuŵara chara na upharazgi wa mphinjika ya Yesu.

¹²Kweni awo ŵakumutimbanizgani, ndakhumbanga kuti mphanyi ŵajizgora kuŵa zinthunguli!

¹³Imwe mwa ŵabali, Chiuta wakamuchemani kuti muŵe ŵanangwa. Kweni mureke kuwuzgora wanangwa winu kuŵa mwaŵi wakuchitira vya thupi, chomenechomene teŵeteranani mu kutemwa.

¹⁴Chifukwa marango ghose ghakufiskikira mu dango ilo likuti, “Utemwenge muzengezgani wako nga ndi umo ukujitemwera wamwene.”

¹⁵Kweni usange mukuwukirana na kupwetekana, chenjerani mzire mumarane waka yumoza na munyakhe.

¹⁶Kweni nkhuti, rekani Mzimu kuti ndiwo umurongozgani, ndipo mureke kuchita ivyo mathupi ghinu ghakukhumba.

¹⁷Pakuti makhumbiro gha thupi ghakulimbana na ivyo Mzimu ukukhumba ndipo Mzimu nawo ukulimbana na ivyo thupi likukhumba. Viŵiri ivi vikupindikana mwakuti vimukanizgani kuchita ivyo mukukhumba.

¹⁸Kweni usange mukurongozgeka na Mzimu, kuti muli pasi pa marango chara.

¹⁹Milimo ya thupi yikuwoneka waka pakweru, ndipo ndi iyi: uzaghali ukazuzi, udokezi,

²⁰kusopa vikozgo, kuwukwa, tinkho, zawe, sanje, ukari, kujitemwa, mphatukano, kujipatula,

²¹bina, uloŵevu, uryezi na vinyakheso vya ntheura. Nkhumusokani sono, nga ndi umo nkhamusokerani kale, kuti awo ŵakuchita vinthu ivi ŵati ŵaharenge Ufumu wa Chiuta chara.

²²Kweni vipambi vya Mzimu ndi ivi: Kutemwa, chimwemwe, mutende, kuzizipizga, lusungu, uweme, kugomezgeka,

²³kuzika, kujikora. Kulije dango likususka ivi.

²⁴Ndipo awo ŵali ŵakhe ŵa Khristu Yesu, ŵali kupayika thupi lawo pa mphinjika pamoza na kurakaraka kwakhe na makhumbiro ghakhe.

²⁵Pakuwona kuti Mzimu ndiwo ukutipa umoyo, ipo tiyeni tende kwakuyana na urongozgi wa Mzimu.

²⁶Tireke kujikuzga, kukaripiskana na kuchitirana sanje.