Read new_tumbuka_bible ŴaGalatiya 6 Bible Online

ŴaGalatiya 6 - new_tumbuka_bible bible

ŴaGalatiya 6

¹Mwa ŵabali, usange munthu wasangika kuti wakupuruka, imwe mukurongozgeka na Mzimu mukwenera kumunyoroska. Kweni mumunyoroske na mtima wakuzika. Muŵe maso kuti namwe mureke kupuruskika na uheni.

²Pokeranani vizitu, ndipo ntheura muti mufiskenge dango la Khristu.

³Usange munthu wakujipima kuti iyo ndiyo munthu, apo kuti ndimo waliri chara, wakujipusika yekha.

⁴Kweni rekani munthu yose wapime umo milimo yakhe yiliri. Usange njiweme, wati wathumbwire mu milimo yakhe, kwambula kulinganizga na milimo ya munyakhe.

⁵Chifukwa munthu yose wajiyegherenge katundu wakhe na wakhe.

⁶Munthu uyo wakusambizgika mazgu gha Chiuta wakwenera kusangana nayo uyo wakumusambizga viweme vyose ivyo wali navyo.

⁷Mungajipusikanga, Chiuta kuti ngwa kusekeka chara. Munthu wakuvuna ivyo wakuseŵa.

⁸Usange munthu wakuseŵa ivyo nvya thupi, wati wavunenge nyifwa. Ndipo usange wakuseŵa vya Mzimu, wati wavunenge umoyo wa muyirayira.

⁹Ntheura tireke kuvuka pakuchita uweme, chifukwa usange tikureka kugongowa, tamkuvuna pa nyengo yakhe.

¹⁰Ipo sono umo tiliri na mwaŵi, tiyeni tichite uweme ku ŵanthu wose, chomenechomene awo mba mu mbumba ya chipulikano.

¹¹Wonani malemba ghakuru agho nkhumulemberani na woko lane.

¹²Ŵanthu awo ŵakukhumba kuwoneka nga mbaweme mu thupi, ndiwo ŵakumuchichizgani kuti mukotoreke. Ŵakuchita ichi kuti ŵareke kuzikizgika chifukwa cha mphinjika ya Khristu.

¹³Pakuti nanga ndi awo ŵali kukotoreka, kuti ŵakusunga marango chara. Kweni ŵakukhumba kuti imwe mukotoreke mwakuti iwo ŵathumbwirengemo mu kukotoreka kwinu uko nkhwa thupi.

¹⁴Kweni ine nditi ndithumbwirenge mu kanthu kanyakhe chara kweni mu mphinjika ya Fumu Yesu Khristu pera, mwa mweneuyo charu chili kupayikika kwa ine, ndipo ine ku charu.

¹⁵Pakuti manyi munthu ngwa kukotoreka, panji ngwambula, icho nchakuzirwa nchakuti Chiuta wamupe munthu umoyo uphya.

¹⁶Mutende na lusungu viŵenge pa wose awo ŵakurondezga dango ili na pa ŵanthu wose ŵa Chiuta.

¹⁷Kufuma sono munthu wareke kundisuzga, chifukwa ndili na mabamba mu thupi lane agho ghakurongora kuti ndili muteŵeti wa Yesu.

¹⁸Uchizi wa Fumu yithu Yesu Khristu uŵenge na imwe mose, mwa ŵabali ŵane. Ameni.