Read new_tumbuka_bible ŴaEfeso 1 Bible Online

ŴaEfeso 1 - new_tumbuka_bible bible

ŴaEfeso 1

¹Kufuma kwa ine Paulosi, wakutumika wa Khristu Yesu na khumbo la Chiuta. Ku ŵanthu ŵa Chiuta mu Efeso, awo nawoso ŵakupulikana mwa Khristu Yesu.

²Uchizi na mutende vyakufumira kwa Chiuta Ŵadada na kwa Fumu yithu Yesu Khristu viŵenge namwe.

³Wachindikike Chiuta, Wiske wa Fumu yithu Yesu Khristu, uyo mwa Khristu watitumbika pakutipa vitumbiko vyose vya Mzimu vya kuchanya.

⁴Pambere charu chindalengeke, Chiuta wakatisolerathu ise mwa Khristu kuti tiŵe ŵanthu ŵakhe ŵakupatulika na ŵambula kalema panthazi pakhe chifukwa cha kutemwa kwakhe.

⁵Chiuta wakatipatula ise kale kuti mwa Yesu Khristu, tiŵe ŵana ŵakhe. Wakachita ichi kwakuyana na urato wa khumbo lakhe.

⁶Ntheura timuchindike Chiuta chifukwa cha uchizi wakhe wa uchindami, pakutipa mwana wakhe wakutemweka nga nchawanangwa kwa ise.

⁷Mwa Yesu Khristu tili kuwomboleka mu ndopa zakhe ndipo zakwananga zithu zili kugowokereka kwakuyana na uzari wa uchizi wakhe,

⁸uwo wali kupungulira pa ise mu unandi wakhe. Mu vinjeru vyose na kumanyiska kwakhe,

⁹Chiuta wakachita icho wakakhumbanga na kutivumbulira urato wa cha muchindindi uwo wakadumula kale kufiska mwa Khristu kwakuyana na kukondwa kwakhe kuweme.

¹⁰Unozgero wakhe ukaŵa wakuti pa nyengo yakwenerera, wakugumaniske pamoza vinthu vyose vya kuchanya na vya mu charu cha pasi kuŵa pasi pa mazaza gha Khristu nga ndi mutu.

¹¹Chiuta wakatisankha kale mwa Khristu kuti tiŵe ŵanthu ŵakhe na ŵakhe kwakuyana na khumbo lakhe. Iyo wakwendeska vinthu vyose na kuvirongozgera ku urato wakhe na wakhe uwo wali kunozgera.

¹²Wakachita ichi mwakuti ise tikaŵa ŵakudanga kugomezga mwa Khristu, tichindike uchindami wakhe.

¹³Ndipo imwe namwe mukati mwapulika mazgu gha unenesko, gha Uthenga Uweme wa chiponosko chinu, mukagomezga mwa Khristu. Ndipo Chiuta wakaŵika pa imwe chidindo chakhe cha Mzimu Mutuŵa, icho wakapangana kumupani kurongora kuti ndimwe ŵanthu ŵakhe nadi.

¹⁴Mzimu Mutuŵa uyu ndi chikhole cha chiharo chithu, mpaka apo tizamkuchipokerera. Ntheura tiyeni tithuwuske uchindami wakhe.

¹⁵Pa chifukwa ichi, nkhati ndapulika na za chipulikano chinu mwa Fumu Yesu ndiposo na kutemwa chinu ku wose ŵanthu ŵa Chiuta,

¹⁶kuti nkhurekapo chara kumuwonga Chiuta chifukwa cha imwe. Nkhumukumbukani mu malurombo ghane,

¹⁷kuti Chiuta wa Fumu yithu Yesu Khristu, Dada wa uchindami wose, wamupani Mzimu wa mahara na wa uvumbuzi mu kamanyiro ka Chiuta kwa imwe.

¹⁸Nkhurombaso kuti Mzimu Mutuŵa wangweruske mitima yinu kuti mumanye icho mukugomezga mwa Chiuta uyo wakamuchemani. Nkhurombaso kuti mumanye mausambazi gha chiharo chakhe cha uchindami wa ŵatuŵa ŵakhe.

¹⁹Nkhurombaso kuti mumanye ukuru wambula mapimiko wankhongono zakhe izo zikuchita mlimo mwa ise tikupulikana. Nkhongono izi zikuteŵeta kwakuyana na nkhongono zakhe zikuru,

²⁰izo wakafiskira mwa Khristu pakumuwuska ku ŵakufwa na kumukharika pa chizumbe ku woko lakhe la maryero kuchanya.

²¹Kwenekura, wali pachanya pa ŵakuwusa wose, ŵamazaza, na nkhongono na maufumu ghose. Wali pachanya pa zina lose ilo ŵanthu ŵakulichema nyengo yino panji nyengo iyo yikwiza.

²²Ndipo Chiuta wali kuvilambika vyose kusi ku malundi gha Khristu, ndipo wakamusankha iyo kuti waŵe mutu pachanya pa vyose vya mu mpingo

²³uwo ndi thupi lakhe ilo ndakuzura na iyo mweneuyo wakuzura mu vyose.