Read new_tumbuka_bible ŴaEfeso 2 Bible Online

ŴaEfeso 2 - new_tumbuka_bible bible

ŴaEfeso 2

¹Imwe kale mukaŵa ŵakufwa mu Mzimu chifukwa cha masovyo na kwananga kwinu mwenemumo mukendanga.

²Pa nyengo iyo, mukarondezganga makhaliro ghaheni gha mu charu ichi ndipo mukapulikiranga wakuwusa wa mu mlengalenga, mweneuyo ndi mzimu uwo ukuteŵeta sono pakati pa ŵanthu ŵambula kupulikira Chiuta.

³Na kwenenako ise tose tikaŵa na umoyo nga ndi iwo, ndipo tikakharanga mu maulamphalampha gha mathupi ghithu ghakutemwa viheni. Tikachitangaso vinandi ivyo mathupi na maghanoghano ghithu ghakadokanga. Ndipo ntheura pakaŵiro kithu tikaŵa ŵana awo ŵakenerera ukari wa Chiuta nga ndi ŵanthu wose.

⁴Kweni Chiuta uyo ngwa kuzura lusungu, kufuma ku kutemwa kukuru uko wakatitemwa nako,

⁵wakatizgora ise kuŵa ŵamoyo pamoza na Khristu apo tikaŵa tichali ŵakufwa chifukwa cha zakwananga zithu. Na uchizi wa Chiuta, muli kuponoskeka.

⁶Pakugumanyiskika na Khristu Yesu, Chiuta wakatiwuska pamoza nayo mwakuti tikawuse nayo kuchanya.

⁷Wakachita ichi kuti mu nyengo iyo yikwiza warongore umo usambizgi wakhe wambula mapimiko uliri, uwo warongoreka mu uchizi wakhe pakuŵa na lusungu kwa ise mwa Khristu Yesu.

⁸Pakuti muli kuponoskeka na uchizi wa Chiuta, mu chipulikano. Kuti muli kuponoskeka chifukwa cha milimo iyo mukuchita chara. Chiponosko chinu nchawanangwa cha Chiuta.

⁹Munthu kuti wakuponoskeka na milimo yakhe chara, mzire yunji wajikuzge.

¹⁰Chifukwa ise ndise mlimo wa Chiuta ndipo wali kutilenga mwa Khristu Yesu kuti umoyo withu uŵe wakuchita milimo yiweme. Milimo iyi ndiyo Chiuta wali kutinozgera kale kuti tiyichitenge.

¹¹Ntheura kumbukani kaŵiro kinu kapakudanga imwe mwa ŵamitundu mwaŵeneimwe mukuchemeka “Ŵambula kukotoreka” na ŵaYuda awo ŵakujichema “Ŵakukotoreka” chifukwa cha kaluso ka thupi ako kakuchitika na mawoko gha ŵanthu.

¹²Kumbukani kuti pa nyengo yira mukaŵa patali na Khristu, ndipo mukaŵa ŵalendo mu wenenawene na ŵaIsraele na ku mapangano agho Chiuta wakalayizga ku ŵanthu ŵakhe. Ndipo mukakharanga mu charu ichi ŵambula chigomezgo na ŵambula Chiuta.

¹³Kweni sono mwa Khristu Yesu, imwe kale mukaŵa kutali na Chiuta, mwaguzikira pafupi chifukwa cha ndopa za Khristu.

¹⁴Chifukwa Khristu ndiyo mutende withu. Iyo watizgora tose kuŵa munthu yumoza. Na sembe ya thupi lakhe, wali kuwiskira pasi chimati icho chikatipatula na kutizgora kuŵa ŵarwani yumoza na munyakhe.

¹⁵Ndipo wali kumarizga marango gha ŵaYuda, pamoza na malangulo na marango ghakhe mwakuti wajipangire kufumira ku mafuko ghaŵiri fuko liphya limoza pamoza nayo mwakuti waŵike mutende.

¹⁶Khristu wakafwa pa mphinjika kuti wamarizge kutinkhana kwithu. Ndipo na mphinjika iyi wali kugumaniska mafuko ghaŵiri kuŵa thupi limoza na kutiphemanyiska na Chiuta.

¹⁷Ntheura Khristu wakiza na kupharazga mutende kwa mose imwe ŵamitundu imwe mukaŵa kutali na Chiuta na ku ŵaYuda awo ŵakaŵa pafupi nayo.

¹⁸Chifukwa mwa Khristu ise tose ŵaYuda na ŵamitundu, tikumanya kwiza panthazi pa Ŵadada mu Mzimu yumoza pera.

¹⁹Ntheura sono imwe ŵamitundu kuti muliso ŵalendo na ŵakupanjwa waka chara, kweni muli ŵenekaya pamoza na ŵatuŵa ndipo muli mbumba ya Chiuta,

²⁰mwati mwazengeka pa lufura lwa ŵakutumika ndiposo na nchimi apo Khristu Yesu mwenecho ndiyo libwe ilo ndi nkhorezgero ya chingodya.

²¹Ndipo mwa iyo nyumba yose yikulungika pamoza na kukura kuŵa Nyumba ya Chiuta yituŵa mwa Fumu.

²²Ndipo mwa iyo imwe namwe mukuzengeka pamoza na ŵanyinu kuŵa malo umo Chiuta wangakhara mu Mzimu.