Read new_tumbuka_bible ŴaEfeso 3 Bible Online

ŴaEfeso 3 - new_tumbuka_bible bible

ŴaEfeso 3

¹Pa chifukwa ichi, ine Paulosi, wakukakika wa Khristu Yesu mu malo mwa imwe ŵamitundu,

²nkhughanaghana kuti muli kupulika umo Chiuta wali kundipira mlimo wakupharazga uchizi wakhe mukati mwinu.

³Iyo wandimanyiska cha muchindindi chakhe mu uvumbuzi nga ndi umo ndamulemberani kale pa makani ghafupi waka.

⁴Usange mungaŵazga ivyo ndalemba, mungawona kapulikiskiro kane ka cha muchindindi cha Khristu.

⁵Chamuchindindi ichi ŵanthu ŵa miwiro ya kale kuti ŵakachimanya chara. Kweni sono Chiuta wachivumbula mwa Mzimu kwa ŵakutumika ŵakhe ŵakupatulika na nchimi.

⁶Chamuchindindi ichi nchakuti mu Uthenga Uweme ŵamitundu ŵali na chigaŵa mu vitumbiko vya Chiuta pamoza na ŵaYuda. Ndipo ŵali viŵaro vya thupi leneliro pera ndipo ŵakusangana mu phangano ilo Chiuta wakachita mwa Khristu Yesu.

⁷Ine nkhazgoka muteŵeti wakupharazga Uthenga Uweme na chawanangwa cha uchizi wa Chiuta uwo ukapika kwa ine mu nkhongono yakhe iyo yikuchita mwa ine.

⁸Nangauli ndili muchoko chomene kuruska wose ŵanthu ŵa Chiuta awo mbachoko, kweni Chiuta wali kundipa mwaŵi wakupharazga Uthenga Uweme ku ŵamitundu, uwo mbusambazi wa Khristu wambula kumara.

⁹Wakandipaso mlimo wakuphalira ŵanthu wose unozgero wa Chiuta mlengi wa cha muchindindi icho chikabisika kwa nyengo yitali mwa Chiuta uyo wakalenga vinthu vyose.

¹⁰Sono kwizira mu mpingo, mahara ghakupambanapambana gha Chiuta ghakwenera kumanyikwa ku ŵakuwusa na ŵamazaza ŵa kuchanya.

¹¹Chiuta wakachita ichi kwakuyana na khumbo lakhe la muyirayira ilo wakafiska mwa Khristu Yesu Fumu yithu.

¹²Ndicho chifukwa mu umoza na iyo tili na chikanga kwiza kwa Chiuta na chigomezgo chose chifukwa tikupulikana mwa iyo.

¹³Ntheura nkhumuŵeyani kuti mureke kuwa nkhumbi na visuzgo vyane chifukwa cha imwe. Visuzgo ivi mbuchindami winu.

¹⁴Pa chifukwa ichi nkhujikama pasi panthazi pa Ŵadada.

¹⁵Ku ŵeneawo mazina gha mbumba zose izo zili kuchanya na izo zili pasi ghakufuma.

¹⁶Ndipo nkhuromba kuti mu uzari wa uchindami wakhe wamupani nkhongono zakhe kwizira mu Mzimu wakhe kuti muŵe ŵankhongono mu unthu winu wa mukati.

¹⁷Nkhuromba kuti mu chipulikano, Khristu wakharenge mu mitima yinu. Kuti mupandike na kukhazikika mu kutemwa.

¹⁸Na kutiso imwe pamoza na ŵanthu wose ŵa Chiuta muŵe na nkhongono kupulikiska umo kuliri kutemwa kwa Khristu mu usani, mu utali, mu kunyang'amira na mu kuzonthoka kwakhe.

¹⁹Nkhuromba kuti mumanye kutemwa kwa Khristu uko kukujumpha kamanyiro kose kuti muzuzgike na uzari wose wa Chiuta.

²⁰Sono kwa mweneuyo wali na nkhongono kuchita mlimo mwa ise kuruska vyose ivyo tikuromba panji ivyo tikughanaghana,

²¹kwa iyo kuŵenge uchindami kufuma kwa ise ŵa mu mpingo pakuŵa ŵamoza mwa Khristu Yesu ku miwiro yose kwa muyirayira. Ameni.