Read new_tumbuka_bible ŴaEfeso 4 Bible Online

ŴaEfeso 4 - new_tumbuka_bible bible

ŴaEfeso 4

¹Ntheura ine wakukakika wa Fumu, nkhumuŵeyani kuti mukharenge na umoyo wakuyana na uwo Chiuta wakamuchemerani.

²Muŵenge ŵakujiyuyura na ŵakuzika, ŵakuzizipizga na kurongora kutemwa kwinu pakovwirana yumoza na munyakhe.

³Muyezge nthowa yiliyose kusungilira umoza wa Mzimu weneuwo ukumugumaniskani pamoza mu mutende.

⁴Kuli thupi limoza na Mzimu yumoza, nga ndi umo mose mukachemekera kwa Chiuta kuti musangane mu chigomezgo chimoza.

⁵Pali Fumu yimoza, chipulikano chimoza, ubapatizo umoza.

⁶Pali Chiuta yumoza uyo ndi Dada wa ŵanthu wose. Iyo wali pachanya pa wose, ŵakuteŵeta mu wose, ndiposo wali mu ŵanthu wose.

⁷Kweni kwa ise yumoza na yumoza, kwakuyana na uzari wa Khristu, kuli kupika uchizi nga chawanangwa cha pa dera.

⁸Ndicho chifukwa malembo ghakuti, “Para wakakweranga kuchanya, wakatora awo ŵakaŵa mu umikori, ndipo ŵanthu wakaŵapa chawanangwa.”

⁹Pakuyowoya kuti, “Wakakwerera kuchanya,” Kasi chikung'anamulachi? Chikung'anamula kuti wakadanga wakhilira pasi, ndiko kuti kusi ku vigaŵa vya pasi pa charu.

¹⁰Uyo wakakhira ndi mweneuyo wakakwerera kuchanya kuruska machanya ghose, mwakuti wazuzge vinthu vyose.

¹¹Ndiyo wakapereka vyawanangwa ku ŵanthu. Vyawanangwa vikaŵa vyakuti ŵanji ŵaŵe ŵakutumika ŵanji nchimi, ŵanji ŵapharazgi, ŵanji ŵaliska na ŵasambizgi.

¹²Wakachita ntheura kunozgera ŵatuŵa wose kuŵa ŵateŵeti ŵa mlimo wa ukhristu, mwakuti wazenge mpingo uwo ndi thupi la Khristu.

¹³Ntheura pa umaliro tamufika pa umoza wa mu chipulikano na mukumanya Mwana wa Chiuta. Penepapo tamkukura na kuŵa ŵakufikapo nkhanira nga ndi umo Khristu waliri.

¹⁴Ntheura kuti tamkuŵaso ŵanichi chara awo ŵakuyungwayungwa na kupungwapungwa na mphepo ya visambizgo vya utesi vya ŵanthu ŵaryarya awo mu ubendezi wawo wakunozgera kutipuruska.

¹⁵Mu malo mwakhe, kuyowoya unenesko mu kutemwa, tikulenge pa vyose mwa Khristu uyo ndi mutu,

¹⁶ndipo mwa iyo thupi likurungana na kukakana pamoza na misipa. Ntheura para chiŵaro chose chikuchita makora mlimo wakhe, thupi lose likukura na kuzengeka mu kutemwa.

¹⁷Ntheura mu zina la Fumu nkhumuchenjezgani kuti, mureke kwenda nga mbanthu ŵa kuwaro awo maghanoghano ghawo nga wakawaka.

¹⁸Ndipo vinjeru vyawo vili mu mdima. Mbalendo ku umoyo uwo Chiuta wakupereka, pakuti mbalemwa nkhanira ndipo mitima yawo njinonono.

¹⁹Ŵalije nanga ndi soni, ŵakujipereka kukuchita vya uchikanamarango, uzaghali ndiposo mbachigoro, ndipo ŵakuchita maukazuzi gha mtundu na mtundu kwambula kujikora.

²⁰Kweni uku kuti ndimo mukasambilira Khristu chara.

²¹Nadi mukapulika vya iyo ndipo mukasambizgika unenesko uwo uli mwa Yesu.

²²Ntheura uskanimo kaŵiro kinu ka kale unthu winu wakale, uwo ngwa kunangika na maulamphalampha ghakhe ghakupusika.

²³Mitima yinu na maghanoghano ghinu vikwenera kuzgoka viphya.

²⁴Mukwenera kuvwara unthu uphya, uwo Chiuta wali kuwulenga mu chikozgo chakhe mu unenesko na utuŵa wenecho.

²⁵Ntheura waliyose wa imwe wareke kuyowoya utesi, kweni wayowoyenge unenesko pera ku yumoza na munyakhe, pakuti tose tili viŵaro vya thupi limoza.

²⁶Karipani, kweni mureke kwananga ndipo mureke kurutilira kukaripa mpaka mukanjizge na dazi mu ukari winu.

²⁷Ndipo mureke kumupa mwaŵi Satana.

²⁸Uyo ndi munkhungu wareke kwiba, kweni wachite mlimo uweme na mawoko ghakhe, mwakuti waŵe na kanthu kakujovwilira, ndiposo na kumanya kumovwira uyo ngwa kusokwa.

²⁹Mu milomo yinu mureke kufuma mazgu ghaheni, kweni muyowoye mazgu agho ngaweme na ghakovwira pakuzenga na kufiska icho chikukhumbikwa, mwakuti ivyo mukuyowoya vimanye kuchita uweme ku awo ŵakupulika.

³⁰Mureke kukwenyerezga Mzimu Mutuŵa wa Chiuta uyo nchidindo kuti muli ŵana ŵakhe pa zuŵa la kuponoskeka kwinu.

³¹Ntheura wuskanimo kutinkhana kose, mtima wa befu, ukari, viwawa na kwambana, kwambula kuŵa na mtima uheni ku yumoza na munyakhe.

³²Muŵe ŵakuchitirana uweme na mtima wa chisungusungu, ŵakugowokerana yumoza na munyakhe umo Chiuta nayo mwa Khristu wakamugowokerani imwe.