Read new_tumbuka_bible ŴaEfeso 5 Bible Online

ŴaEfeso 5 - new_tumbuka_bible bible

ŴaEfeso 5

¹Ntheura pakuti muli ŵana ŵa Chiuta ŵakutemweka, mukwenera kuyezga kuŵa nga ndiyo.

²Ndipo endaninge mu kutemwa nga ndi umo Khristu wakatitemwera ise. Ndipo wakajipereka chifukwa cha ise kuŵa chakupereka na sembe ya sungu liweme kwa Chiuta.

³Pakuti ndimwe ŵanthu ŵa Chiuta, nkhuweme chara kuti uzaghali, ukazuzi uliwose, panji udokezi vizunurikenge mukati mwinu nga ndi umo vikwenera kuŵira ku ŵatuŵa.

⁴Ndipo sono mungazomerezganga ukazuzi nesi kuyowoya vya uzereza panji miyuyuro, ivyo vikwenerera chara. Mu malo mwakhe, wongani Chiuta.

⁵Manyani ichi kuti munthu yose uyo ndi muzaghali, mukazuzi, wakudokera (pakuti munthu wakudokera wali nga ndi uyo wakusopa chikozgo) kuti wali na chiharo mu Ufumu wa Khristu na wa Chiuta chara.

⁶Paŵavye munthu wamupusikani imwe na mazgu ghawakawaka. Pakuti kwananga kwa ntheura ndiko kukwiza na ukari wa Chiuta pa ŵanthu ŵa mutafu.

⁷Ntheura mureke kwendezgana na ŵanthu ŵa ntheura.

⁸Imwe namwe kale mukaŵa mu mdima, kweni sono muli mu ungweru pakuti ndimwe ŵanthu ŵa Fumu. Ntheura mukwenera kwenda nga ndi ŵanthu awo ŵali mu ungweru.

⁹Pakuti ndi mu ungweru umo mukufuma uweme, urunji na unenesko.

¹⁰Yezgani kusambira icho chingakondweska Fumu.

¹¹Mureke kusangana na milimo ya wakawaka ya mu mdima iyo ŵanthu ŵakuchita, kweni muyisuskenge pakweru.

¹²Chifukwa nchasoni nanga nkhuyowoya ivyo ŵakuchita ku udesi.

¹³Kweni vinthu vyose, para vyatorekera ku ungweru, vikuwoneka nga ndi umo viliri nadi.

¹⁴Pakuti chose chakuwoneka pakweru chikuzgoka ungweru. Ndicho nchifukwa malembo ghakuti, “Iwe uli mu tulo, wuka! Wuka ku ŵakufwa, ndipo Khristu wati wakuŵalire.”

¹⁵Ntheura chenjerani umo mukwendera. Mureke kwenda nga mbanthu ŵambula mahara, kweni mwendenge nga mbanthu ŵamahara.

¹⁶Nyengo yinu yose yiŵenge yakuchitira nchito ziweme, pakuti agha ndi mazuŵa ghaheni.

¹⁷Mungaŵanga vindere, kweni yezgani kumanyiska ilo ndi khumbo la Fumu.

¹⁸Mungaloŵeranga na vinyo, mwenemumo muli luzokozoko, kweni muzuzgike na Mzimu.

¹⁹Yowoyeskeranani mu mazgu gha mu MaSalimo, mu sumu, na sumu za uzimu, yimbani na kukoŵerana mu mitima yinu para mukurumba Fumu.

²⁰Mazuŵa ghose ndipo pa chilichose perekani viwongo kwa Chiuta Dada mu zina la Fumu yithu Yesu Khristu.

²¹Jilambikani ku yumoza na munyakhe chifukwa cha nchindi kwa Khristu.

²²Mwa ŵawoli, jilambikani ku ŵafumu ŵinu nga ndi umo mukujilambikira kwa Fumu.

²³Chifukwa mufumu ndi mutu wa muwoli wakhe nga ndi umo Khristu waliri mutu wa mpingo, uwo ndi thupi lakhe ndipo iyo Khristu ndi Muponoski wa mpingo uwu.

²⁴Nga ndi umo mpingo wa Chiuta ukumulambira Khristu, ntheura ndimo ŵawoli nawo ŵakwenera kuŵalambira ŵafumu ŵawo mu vinthu vyose.

²⁵Mwa ŵafumu temwani ŵawoli ŵinu nga ndi umo Khristu wakatemwera mpingo na kuwufwira.

²⁶Wakachita ichi kuti wawusuke na kuwutuŵiska mpingo uwu na mazgu ghakhe na maji,

²⁷mwakuti, uwoneke pa maso pakhe, mpingo wa uchindami na wambula banga panji linkhwinya, panji kanthu kanji kalikose kakuwunangiska. Kweni kuti uŵe wakupatulika na wambula kalema.

²⁸Ntheura ndimo ŵafumu nawo ŵakwenera kutemwera ŵawoli ŵawo nga ndi umo ŵakutemwera mathupi ghawo. Uyo wakutemwa muwoli wakhe, wakujitemwa iyomwene.

²⁹Palije munthu uyo wakutinkha thupi lakhe kweni wakuliryeska na kulipwererera makora chomene nga ndi umo Khristu wakuchitira na mpingo wakhe.

³⁰Pakuti tili viŵaro vya thupi lakhe.

³¹Pa chifukwa ichi, mwanarume wati wasidenge ŵawiske na ŵanyina na kubatikana na muwoli wakhe ndipo ŵaŵiri aŵa ŵati ŵaŵenge thupi limoza.

³²Chamuchindindi ichi nchikuru, kweni ine nkhuyowoya cha muchindindi cha Khristu na mpingo.

³³Kweni imwe namwe waliyose watemwenge muwoli wakhe nga ndi umo wakujitemwera iyomwene, ndipo muwoli nayo wachindike mufumu wakhe.