Read new_tumbuka_bible ŴaEfeso 6 Bible Online

ŴaEfeso 6 - new_tumbuka_bible bible

ŴaEfeso 6

¹Mwa ŵana, pulikirani ŵapapi ŵinu, pakuti uwu ndiwo mlimo winu wa ukhristu kuti muwuchitenge.

²“Chindika ŵawuso na ŵanyoko.” Ili ndi dango lakudanga ilo liri na phangano lakuti,

³“Mwakuti kukuŵire makora, na kutiso mazuŵa ghako ghaŵe ghanandi mu charu.”

⁴Ŵadada, mureke kuŵatopora mitima ŵana ŵinu, kweni muŵalere makora mu chisambizgo na mu malangulo gha Fumu.

⁵Mwa ŵazga, mu wofi na mukutenthema pulikirani ŵene-nchito ŵinu ŵa mu charu. Muŵenge na mtima wakugomezgeka nga ndi umo mukupulikira Khristu.

⁶Mureke kuteŵeta para ŵakumuwonani pera chara kuti ŵakondwere namwe. Kweni nga ŵazga ŵa Khristu, muteŵetenge na mtima wose ivyo Chiuta wakukhumba.

⁷Muteŵetenge na mtima wakusangwa, nga ndi para mukuteŵetera Fumu, kuti nga ndi para mukuteŵetera ŵanthu chara.

⁸Mukumanya kuti Fumu yamkupereka njombe ku munthu yose pa nchito yiweme yose iyo wayichita manyi munthu uyu ndi muzga panji mwanangwa.

⁹Imwe mwa ŵenecho ŵa nchito namwe muŵachitirenge ntheura pera ŵazga ŵinu, mureke kuŵawofya. Mumanyenge kuti imwe pamoza na ŵazga ŵinu muli na mwene-nchito na Fumu yimoza kuchanya, mweneuyo kuti wali na sankho chara.

¹⁰Pa umaliro Fumu yimukhomeskani mu nkhongono zakhe zikuru.

¹¹Vwarani ngunya zose za Chiuta, mwakuti mumanye kuchintha ku mauryarya gha Satana.

¹²Chifukwa kulimbana kwithu kuti kuli pakati pa ŵanthu ŵa thupi na ndopa chara. Kweni tikulimbana na ŵakuwusa, ŵamazaza, na ŵankhongono ŵa charu ichi cha mdima ndipo na mawumba gha mizimu yiheni iyo yili mu mlengalenga.

¹³Ntheura vwarani ngunya zose za Chiuta mwakuti para zuŵa liheni lira liza, mumanye kutonda nkhongono za murwani. Ndipo para nkhondo yamara, imwe mwimilire nganganga mu malo ghinu.

¹⁴Ntheura imilirani na kuchintha, ndipo mujikake na lamba wa unenesko mu chiuno chinu, na kuvwara ngunya ya urunji pa chifuŵa chinu kuŵa chivikiriro.

¹⁵Ndipo pakunozgera malundi ghinu na phamphu, upharazgi wa Uthenga Uweme wa mutende ndiwo uŵenge nga ndi skapato zinu.

¹⁶Pa dera pa vyose, torani chiskango cha chipulikano nga nchirwero chinu chakuzimyiskira mivwi yose ya moto iyo Muheni Yura wakuponya.

¹⁷Ndipo pokerani chiponosko nga ndi chipewa cha nkhondo, na lupanga lwa Mzimu lweneulo ndi mazgu gha Chiuta.

¹⁸Rombani nyengo zose pakurongozgeka na Mzimu pamoza na malurombo ghose na maŵeyerero. Pa chifukwa ichi chezerani na kufwirirapo mu kuromba, pakurombera ŵanthu wose ŵa Chiuta.

¹⁹Mundiromberenge na ine wuwo kuti Chiuta waŵike mazgu ghakhe mu mlomo mwane para nkhuyowoya, kuti ndimanyiske ŵanthu cha muchindindi cha Uthenga Uweme na chikanga.

²⁰Nangauli ndine wakukakika, ndipouli ndine nkharamba ya Uthenga Uweme. Ntheura mundiromberenge kuti ndipharazge Uthenga Uweme na chikanga umo nkhwenerera kupharazgira.

²¹Tikiko, mubali withu wakutemweka na muteŵeti wakugomezgeka pa mlimo wa Fumu, ndiyo wati wamuphalirani vyose vya ine na umo nkhuchitira.

²²Nkhumutuma kwa imwe kuti wamuphalirani na umo ise tose tikukhalira na kukhwimiska mitima yinu.

²³Chiuta Dada na Fumu yithu Yesu Khristu wamupani imwe mwa ŵabali mose mutende, kutemwa ndiposo na chipulikano.

²⁴Uchizi uŵe na wose awo ŵakutemwa Fumu yithu Yesu Khristu na kutemwa kwambula kumara.