Read new_tumbuka_bible ŴaFilipi 1 Bible Online

ŴaFilipi 1 - new_tumbuka_bible bible

ŴaFilipi 1

¹Kufuma kwa ine Paulosi na Timote, ŵateŵeti ŵa Khristu Yesu. Ku wose ŵatuŵa mwa Khristu Yesu pamoza na ŵalaŵiliri na ŵateŵeti ŵa mpingo, imwe muli mu Filipi.

²Uchizi na mutende vyakufumira kwa Chiuta Ŵadada na kwa Fumu yithu Yesu Khristu viŵenge namwe.

³Nkhumuwonga Chiuta wane nyengo zose para nkhukumbuka imwe.

⁴Ndipo nyengo yose para nkhumuromberani imwe, nkhuromba na chimwemwe,

⁵chifukwa cha wenenawene pakupharazga Uthenga Uweme kufuma pa zuŵa lakudanga mpaka na sono wuwo.

⁶Ntheura nkhufikapo kuti uyo wakamba mlimo uweme uwu mwa imwe, ndiyo wati warutizge na kuwufiska pa zuŵa lakwiza kwa Khristu Yesu.

⁷Nchakwenerera kwa ine kuti ndimughanaghanani ntheura chifukwa mose muli ŵakutemweka chomene kwa ine. Pakuti mose mukusangana nane mu uchizi na mu kujalirika kwane mu gadi na mu kuvikirira na kukhozga Uthenga Uweme.

⁸Pakuti Chiuta ndi kaboni wane, umo nkhumunwekerani chomene mose imwe na kutemwa kwa Khristu Yesu.

⁹Nkhuromba kuti kutemwa kwinu kukulirengekulirenge mu kumanya na mu kawonero kose,

¹⁰mwakuti mukhozgere icho nchiweme kwakuruska. Ndipo pa zuŵa la Khristu, muŵenge ŵakusangika ŵakunyoroka na ŵambula kafukwa.

¹¹Ndipo umoyo winu uŵenge wakuzura na vipambi vya urunji ivyo vikwiza mwa Yesu Khristu kuti ŵanthu wose ŵachindike na kurumba Chiuta.

¹²Mwa ŵabali, nkhukhumba kuti mumanye kuti ivyo vikandiwira ine vyaŵa vyakovwira nadi kurutirizga panthazi Uthenga Uweme.

¹³Ntheura ŵasilikari wose ŵa pa nyumba ya ufumu, na ŵanyakhe wose kuno, ŵakumanya kuti kujalirika kwane mu gadi ndi chifukwa cha Khristu.

¹⁴Chifukwa cha kujalirika kwane mu gadi, ŵabali ŵanandi ŵali kukhomeskeka mu chipulikano mwa Fumu, ndipo mba chikanga chomene kupharazga mazgu gha Chiuta kwambula wofi.

¹⁵Nadi ŵanji ŵakupharazga Khristu na mtima wa sanje na wa zawe. Kweni ŵanji ŵakupharazga na mtima wa unenesko.

¹⁶Aŵa ŵakuchita ntheura chifukwa cha kutemwa pakuti ŵakumanya kuti Chiuta wali kundipa ine mlimo wakuwuvikirira Uthenga Uweme.

¹⁷Ŵanji kuti ŵakupharazga Khristu mu unenesko chara kweni na mtima wakujitemwa. Iwo ŵakukhumba kundisazgirako vyakuŵaŵa apo ndili mu gadi.

¹⁸Ipo kasi nchichi! Chakuzirwa nchakuti mu nthowa yiliyose, Khristu wakupharazgika kosekose manyi ndi mu upusikizgi panji mu unenesko. Pa ichi ine nkhukondwera chomene. Ndipo nditi ndirutilire kukondwa.

¹⁹Pakuti nkhumanya kuti chifukwa cha malurombo ghinu, na kovwira uko kukufuma mu Mzimu wa Yesu Khristu, ndamkusutulika.

²⁰Pakuti nkhunweka chomene na kugomezga kuti ndamkukhozgeka soni chara. Kweni na chikanga chose nga ndi mazuŵa ghose na sono wuwo, Khristu wachindikikenge mu thupi mwane, manyi ndi mu umoyo panji mu nyifwa.

²¹Pakuti kwa ine, umoyo ndi Khristu, ndipo kufwa ndi chandulo.

²²Kweni usange nkhukhalira wamoyo mu thupi, kuti ndichite mlimo wakurongora vipambi, ipo nkhumanya chara icho ndingasankha.

²³Nkhusanga unonono kuti ndisankhe pa viŵiri. Pakuti ine ndamwene nkhunweka kuruta kuya kakhara na Khristu, icho nchiweme kwakuruska.

²⁴Kweni kukhalirira wamoyo mu thupi kukukhumbikwa chomene chifukwa cha imwe.

²⁵Ndakhorwa na ichi, kuti nditi ndikhalirire wamoyo mukati mwinu mwakuti murutilire na kukondwa mu chipulikano.

²⁶Ntheura para ndaŵaso namwe, mwamkuŵa na chifukwa chikuru chakuthumbwira umoyo winu wa mwa Khristu Yesu chifukwa cha ine.

²⁷Sono chinthu chakuzirwa nchakuti makhaliro ghinu ghaŵe ghakuyana na Uthenga Uweme wa Khristu, mwakuti para ndingiza na kumuwonani, panji chara, ndipulike kuti mukwimilira nganganga na mzimu umoza na mtima umoza, apo mukulimbalimbira uku na uku chifukwa cha chipulikano na Uthenga Uweme.

²⁸Ndipo mungofyekanga chara mu kanthu kalikose ako kakuchitika na ŵarwani ŵinu. Ichi nchimanyikwiro chakuwoneka pakweru kwa iwo chakuparanyika kwawo, kweni ncha chiponosko chinu ndipo chikufumira kwa Chiuta.

²⁹Chifukwa muli kupika mwaŵi wakumuteŵetera Khristu, kuti ndi mwaŵi wakupulikana nayo pera chara, kweniso na kukomwa chifukwa cha iyo.

³⁰Sono imwe mukumanya kusangana nane mu nkhondo yeneyiyi iyi, iyo mukandiwona nkhurwa ndiposo ndichali kurwa na sono wuwo, nga ndi umo mukupulikira.