Read new_tumbuka_bible ŴaFilipi 2 Bible Online

ŴaFilipi 2 - new_tumbuka_bible bible

ŴaFilipi 2

¹Ntheura usange kuli kuchiska kulikose mwa Khristu, usange kuli chikhwimisko cha kutemwa, usange kuli wenenawene wa Mzimu, usange kuli chiwuravi, ipo fiskani chimwemwe chane,

²pakuŵa na maghanoghano ghakuyana na kutemwa, ndiposo pakuŵa na khumbo limoza na mtima umoza.

³Mureke kuŵa ŵakujitemwa panji ŵakujiwona. Kweni muŵenge ŵakujiyuyura ndipo munthu yose wapime munyakhe kuti ngwa kuzirwa kuruska iyo.

⁴Mureke kupwererera ivyo imwe mukukhumba pera chara, kweniso na ivyo ŵanyinu ŵakukhumba.

⁵Muŵenge na mtima weneuwo ukaŵa mwa Khristu Yesu.

⁶Iyo pakuŵa mu kaŵiro ka Chiuta, wakapima chara kuti kulingana na Chiuta, nchinthu icho chingakwapulika.

⁷Kweni wakajikhutula na kutora kaŵiro ka muzga, wakazgoka kuŵa munthu, ndipo wakaŵa mu chikozgo cha munthu.

⁸Ndipo pakuŵa munthu ntheura, wakajiyuyura, wakaŵa wakupulikira mpaka nyifwa, nyifwa yakhe ya pa mphinjika.

⁹Chifukwa cha ichi, Chiuta wali kumukwezga chomene, na kumupa zina ilo likuruska mazina ghose.

¹⁰Mwakuti mu zina la Yesu, vilengiwa vyose vigwade kuchanya na pasi ndipo na kusi kwa charu.

¹¹Ndipo ŵanthu wose ŵazomere pakweru kuti, Yesu Khristu ndi Fumu, ku uchindami wa Chiuta Dada.

¹²Ntheura mwa ŵakutemweka ŵane, nga ndi umo mwaŵira ŵakupulikira mazuŵa ghose, para ndilipo pera chara, kweni sono chomenechomene para ine palije, muteŵetenge mu wofi na mu kutenthema, kuti musange chiponosko cha mwaŵene.

¹³Pakuti Chiuta ndiyo wakugwira nchito mwa imwe, ndipo wakumuchiskani kuti mukhumbe kuchita vinthu ivyo vingamukondweska iyo.

¹⁴Chitani vyose kwambula kusinginika panji kususkana.

¹⁵Mwakuti muŵe ŵambula kafukwa na ŵambula kughanaghana uheni, ŵana ŵa Chiuta ŵambula kalema kalikose mukati mu muwiro uwu uryarya na wakupuruka. Pakati pa ŵanthu ŵa ntheura aŵa mukuŵala nga ndi nyenyezi mu charu,

¹⁶pakukoreska mazgu gha umoyo. Ntheura ine ndamkuŵa na chifukwa chakuthumbwira pa zuŵa la Khristu. Pakuti nkhendendeka panji kutokatoka pawaka chara.

¹⁷Nangauli ndopa zane zingaŵa zakuti ziperekeke nga sembe ya chipulikano chinu, ine ndili wakukondwa ndipo nkhusekerera na imwe mose.

¹⁸Ntheura imwe namwe kondwani na kusekerera pamoza nane.

¹⁹Nkhugomezga mwa Fumu Yesu kuti ndimutumenge Timote kwa imwe sonosono, mwakuti ine nane ndisanguruskike pakupulika umo mukukhalira,

²⁰Ndilije na yumoza wakuyana nayo uyo wangaŵa na phamphu lenecho kupwererera makora makhaliro ghinu.

²¹Pakuti wose ŵakupwererera vyawo pera, kuti ŵakupwererera vya Yesu Khristu chara.

²²Imwe namwe mukumanya waka na kwenerera kwakhe, umo iyo nga ndi mwana na wiske wateŵetera pamoza na ine mu kutandazga Uthenga Uweme.

²³Ntheura nkhugomezga kumutuma iyo mwaluŵiro para ndawona umo vinthu vingaŵira kwa ine.

²⁴Nkhugomezga mwa Fumu kuti naneso nditi ndifike sonosono.

²⁵Ndaghanaghana kuti nchakwenerera kutuma Epafuradito, mubali wane na muteŵeti munyane ndiposo musilikari munyane, nthumi yinu iyo mukatuma kwiza kanditeŵetera mu ivyo nkhakavukanga.

²⁶Wanguŵa wakunweka kumuwonani mose, ndipo wakusuzgika mu mtima chifukwa mukapulika kuti wakurwara.

²⁷Inya nadi wakaŵa murwari, ndipo wakaŵa pafupi na kufwa. Kweni Chiuta wakamulengera lusungu ndipo kuti wakaŵa iyo pera chara, kweni na ine wuwo, mwakuti ndireke kuŵa na chitima pachanya pa chitima.

²⁸Ndicho chifukwa ndanweka chomene kumutuma kwa imwe, kuti para mwamuwonaso, mwizakakondwe ndipo ine nane chitima chane chichepeko.

²⁹Ntheura mumupokerere na kukondwa nga ndi munyinu mwa Fumu. Ŵanthu ŵa nga ndi uyu muŵachindikenge.

³⁰Pakuti chifukwa cha mlimo wa Khristu, wakaŵa pafupi na kufwa, pakuŵika umoyo wakhe mu urwani mwakuti wovwire apo imwe mukaŵavye kundovwira.