Read new_tumbuka_bible ŴaFilipi 3 Bible Online

ŴaFilipi 3 - new_tumbuka_bible bible

ŴaFilipi 3

¹Pa umaliro, mwa ŵabali, nkhuti, “Sekererani mwa Fumu!” Kumulemberani ivyo ndalemba kale, kuti kukundivuska chara, kweni kwa imwe nchambula urwani.

²Muchenjere na awo ŵali nga ndi ncheŵe, muchenjere na awo ŵakuchita uheni, muchenjere na awo ŵakudumula thupi.

³Pakuti ise ndise ukotori wenecho ndipo ndise tikusopa pakurongozgeka na Mzimu wa Chiuta. Tikuthumbwa mwa Khristu Yesu ndipo kuti tikugomezga mu maluso gha thupi chara,

⁴nangauli ine nane ndili na chifukwa chakugomezgera maluso gha thupi, kweni usange walipo uyo wakugomezga kuti wali na chifukwa chakugomezgera maluso gha thupi, ine ndili nacho kuruska iyo.

⁵Nkhakotoreka pa zuŵa la chinkhonde na chitatu, wa mtundu wa ŵaIsraele, wa fuko la Benjamini, muHebere mwenemwene. Nga nkhu marango, nkhaŵa muFarisi nadi,

⁶nga nkhu phamphu, nkhaŵa wakuzikizga mpingo, nga nkhu urunji, nkhaŵa pasi pa marango kwambula na kafukwa.

⁷Kweni vyose ivyo nkhatenge nchandulo kwa ine, ndavipima vyambula chandulo chifukwa cha Khristu.

⁸Mbunenesko, ndavipima vyose kuŵa vyambula chandulo chifukwa cha chandulo chikuru chakumumanya Khristu Yesu, Fumu yane. Pa chifukwa cha iyo ndili kupwererako vyose chara, na kuvipenda vya ku chizara, mwakuti Khristu ndiyo waŵe chandulo chane,

⁹ndipo kuti ine ndisangike mwa iyo, pa chifukwa cha urunji wa ndamwene uwo uli kugona pa marango chara, kweni na urunji uwo ukwiza mu chipulikano mwa Khristu uwo ndi urunji wakufuma kwa Chiuta, ndipouli kugona pa chipulikano.

¹⁰Icho nkhukhumba nchakuti ndimumanye Khristu, ndipo na nkhongono yakuwuka kwakhe ku ŵakufwa na kuti ndisangane nayo mu visuzgo vyakhe pakuŵa nga ndiyo mu nyifwa yakhe,

¹¹mwakuti usange nchamachitiko nane ndimanye kwiza kawuka ku ŵakufwa.

¹²Kuti nkhuphara kuti ndapokera kale ichi panji kuti ndili wakufikapo kale chara kweni nkhukoserezga kuti chiŵe chane chifukwa Khristu Yesu wandizgora kuŵa wakhe na wakhe.

¹³Mwa ŵabali, kuti nkhughanaghana chara kuti ndachitora ichi kuŵa chane. Kweni pali chinthu chimoza icho nkhuchita: Nkhuruwa ivyo vili kunyuma, na kulimbira vya kunthazi.

¹⁴Nkhuchimbilira ku chichiri kuya kapoka njombe ya nchemo kuchanya ya Chiuta mwa Khristu Yesu.

¹⁵Ntheura tose ise takura mu moyo wa uzimu tighanaghanenge na vinthu ivi. Ndipouli usange ŵanji mwa imwe ŵali na kaghanaghaniro kanyakhe, Chiuta wati wachirongore kwa imwe.

¹⁶Kweni tiyeni tikoreske waka icho tili kupokera.

¹⁷Mwa ŵabali, muŵe pamoza pakurondezga umoyo wane. Ise ndise bambiro linu, ndipo muŵamanye makora awo ŵakukhara nga ise.

¹⁸Pakuti nga ndi umo kaŵirikaŵiri ndamuphalirani ndipo nanga ndi sono nkhumuphalirani uku nkhulira masozi kuti, pali ŵanandi awo ŵakukhara nga mbarwani ŵa mphinjika ya Khristu.

¹⁹Umaliro wawo ndi Gehena Pakuti Chiuta wawo ndi nthumbo. Ŵakujikuzga mu vya soni zawo ndipo maghanoghano ghawo ghali pa vya charu pera.

²⁰Kweni ise chikaya chithu chili kuchanya. Ndipo na mtima wakunweka, tikulindirira Muponoski, Fumu Yesu Khristu kwiza kufuma kuchanya.

²¹Iyo wamkughazgora mathupi ghithu ghakuyuyuka agha kuti ghaŵe nga ndi thupi lakhe la uchindami ndipo wizamkuchita ichi kwakuyana na nkhongono zakhe zikuru izo zikumwenereska kuŵika vinthu vyose pasi pa iyo mwenecho.