Read new_tumbuka_bible ŴaFilipi 4 Bible Online

ŴaFilipi 4 - new_tumbuka_bible bible

ŴaFilipi 4

¹Ntheura mwa ŵabali ŵane mwaŵeneimwe nkhumutemwani ndipo nkhumunwekerani, imwe nchimwemwe chane na mphumphu yane. Mwa ŵakutemweka ŵane yimilirani nganganga mwa Fumu.

²Nkhuŵeya Yuwodiya na Sinthike, kuti ŵapulikane yumoza na munyakhe mwa Fumu.

³Inya nkhukuŵeya iwe wakukakika munyane kuti uŵawovwire ŵanakazi aŵa. Pakuti iwo na ine tikateŵeta chomene pa mlimo wa kutandazga Uthenga Uweme pamoza na Kilementi na ŵateŵeti ŵanyane wose ŵeneawo mazina ghawo ghali kulembeka mu Buku la ŵamoyo.

⁴Kondwerani mu Fumu nyengo zose. Nkhuwerezgaso kuti, kondwerani.

⁵Rekani ŵanthu wose ŵamanye kuzizipizga kwinu. Fumu yili pafupi kwiza.

⁶Mureke kwenjerwa kweni, mu vyose ivyo mukukavuka, mumanyiskani Chiuta mu kuromba na kuŵeya pamoza na kuwonga.

⁷Ndipo mutende wa Chiuta uwo ukuruska kapulikiskiro kose, uti usungilire mitima yinu na maghanoghano ghinu mwa Khristu Yesu.

⁸Pa umaliro, mwa ŵabali, chose icho ncha unenesko, icho nchakuchindikika, icho ncha urunji, icho nchakutozgeka, icho nchakutowa icho ncha lumbiri luweme, usange kuli kazilwiro ndipo usange kuli chakurumbika, ghanaghanani na vinthu ivi.

⁹Muchitenge ivyo mukasambira, ivyo mukapokera, ivyo mukapulika, na ivyo mukaviwona mwa ine, ndipo Chiuta wa mutende wati waŵenge namwe.

¹⁰Nkhukondwa chomene mwa Fumu pakuwona kuti yati yajumphapo nyengo yitali, sono mwambaso kundighanaghanira. Nadi mukandighanaghaniranga mazuŵa ghose, kweni mukaŵavye mwaŵi wakurongora kupwererera kwinu.

¹¹Kuti nkhudandaula pa ivyo nkhusoŵerwa chara, pakuti ndili kusambira kukhorwa na mukaŵiro kalikose ako ndingasangikamo.

¹²Pakuti nkhumanya umo kusoŵerwa kuliri, ndipo nkhumanya na umo kuliri kuŵa na vyakuzara. Mu kaŵiro kalikose ndili kusambira cha muchindindi, chakuŵa na vyakuzara na njara, kuŵa na vinandi na kusoŵerwa.

¹³Ine ndingachita vyose mwa Khristu uyo wakundipa nkhongono.

¹⁴Kweni chikaŵa chiweme kuti mukasangana nane mu visuzgo vyane.

¹⁵Imwe mwa ŵaFilipi namwe mukumanya makora ghene, kuti para nkhafumanga mu Makedoniya mu mazuŵa ghakudanga apo nkhapharazganga Uthenga Uweme, pakaŵavye mpingo uwo ukandovwira pa ivyo nkhenera kupokera panji kulipira kweni imwe pera.

¹⁶Pakuti nanga apo nkhaŵa mu Tesalonika mukatumapo kanandiko vya kundiwovwira mu usokwano wane.

¹⁷Kuti nkhupenja chawanangwa chara, kweni nkhupenja vipambi ivyo vingasazgirako kurumbika kwinu.

¹⁸Ndapokera malipiro ghose na vyakujumphirapo. Ndili na vyose vyakukhumbikwa sono pakuti ndapokera kwa Epafuradito ivyo mukanditumira, vyawanangwa vyakununkhira sembe yakupokerereka na kukondweska Chiuta.

¹⁹Ndipo Chiuta wane wizamkumupani vyose ivyo mukusoŵerwa kwakuyana na usambazi wakhe mu uchindami mwa Khristu Yesu.

²⁰Kwa Chiuta, Ŵadada ŵithu kuŵe uchindami nyengo zose. Ameni.

²¹Mutauzge ŵatuŵa wose mwa Khristu Yesu. Ŵabali awo ŵali na ine ŵakumutauzgani.

²²Ŵatuŵa wose ŵakumutauzgani, chomenechomene awo mba mu nyumba ya ufumu wa ku Romu.

²³Uchizi wa Fumu Yesu Khristu uŵenge na imwe mose.