Read new_tumbuka_bible ŴaKolose 1 Bible Online

ŴaKolose 1 - new_tumbuka_bible bible

ŴaKolose 1

¹Kufuma kwa Paulosi, wakutumika wa Khristu Yesu mu khumbo la Chiuta, na kwa Timote mubali withu.

²Ku ŵatuŵa na ŵabali ŵakugomezgeka mwa Khristu ku Kolose. Uchizi na mutende vyakufumira kwa Chiuta Ŵadada viŵenge namwe.

³Nyengo zose tikuwonga Chiuta, Wiske wa Fumu yithu Yesu Khristu para tikurombera imwe,

⁴pakuti tapulika na za chipulikano chinu mwa Khristu Yesu ndiposo na za chitemwa icho muli nacho pa ŵatuŵa wose,

⁵chifukwa cha chigomezgo pa ivyo vyaŵikikira imwe kuchanya. Vya ichi mwapulika kale mu mazgu gha unenesko, agho ndi Uthenga Uweme,

⁶Uwo wiza kwa imwe nga ndi umo watandazgikira mu charu chose cha pasi, weneuwo ukupambika vipambi na kukura. Ntheura pera mukati mwinu kwamba pa zuŵa lira mukapulikiranga na kumanyiska uchizi wa Chiuta mu unenesko,

⁷nga ndi umo mukasambilira kwa Epafura, muteŵeti munyithu wakutemweka. Iyo ndi muteŵeti wakugomezgeka wa Khristu mu malo mwithu,

⁸ndipo ndiyo wali kutiphalira ise na kutemwa uko muli nako mu Mzimu.

⁹Pa chifukwa ichi, kuti tikureka kumuromberani chara, kufuma apo tikapulikira na vya imwe. Tikuromba Chiuta kuti wamuzuzgani na umanyi wa khumbo lakhe mu mahara ghose gha uzimu na kapulikiskiro kose.

¹⁰Mwakuti mumanye kukhara na umoyo uwo Fumu yikukhumba, umoyo wakufikapo pakukondweska Fumu, wakupambika vipambi mu mlimo uweme wose na mukukulirakulira mu kamanyiro ka Chiuta.

¹¹Tikuromba kuti Chiuta wamukhozgani na nkhongono yose kwakuyana na nkhongono za uchindami wakhe, mwakuti mureke kutondeka,

¹²kweni mu kanthu kose muzizipizge pamoza na chimwemwe apo mukupereka viwongo kwa Ŵadada ŵeneawo ŵamwenereskani kuti musangane na ivyo Chiuta wali kusungira ŵatuŵa ŵakhe mu ufumu wa ungweru.

¹³Ndiyo wakatithaska ku muwuso wa nkhongono za mdima na kutinjizga mu ufumu wa Mwana wakhe wakutemweka.

¹⁴Mwa iyo, tili kuwomboleka na kupokera chigowokero cha zakwananga zithu.

¹⁵Khristu ndiyo chikozgo cha Chiuta wambula kuwoneka ndiposo ndiyo Mwana wa uŵere mu vilengiwa vyose.

¹⁶Pakuti mwa iyo Chiuta wakalenga vyose, vya kuchanya na vya pa charu cha pasi, vya kuwoneka na vyambula kuwoneka, kwali ndi vizumbe, mafumu, ŵakuwusa vyaru, ndipo na ŵamazaza. Vinthu vyose vikalengeka mwa iyo na kulengekera iyo.

¹⁷Iyo wakaŵako pambere vyose vindaŵeko, ndipo mwa iyo, vinthu vyose vikulungana pamoza.

¹⁸Iyo ndiyo mutu wa thupi ilo ndi mpingo. Ndiyo jando, ndipo ndi mwana wakudanga kuwuskika ku ŵakufwa, mwakuti mu vyose ndiyo waŵenge wakudanga.

¹⁹Pakuti kukamukondweska Chiuta kuti uchiuta wakhe wose uŵe mu Mwana wakhe.

²⁰Ndipo mwa iyo, Chiuta wakakhumba kuphemaniska vinthu vyose na iyomwene, vya pasi na vya kuchanya. Wakachita vyose ivi kuti waŵike mutende na ndopa za mwana wakhe pa mphinjika.

²¹Imwe kale mukaŵa kutali na Chiuta ndipo mukaŵa ŵarwani ŵakhe mu kaghanaghaniro pakuchita milimo yinu yiheni.

²²Kweni sono na nyifwa ya Mwana wakhe ya thupi, Chiuta wali kuphemaniska imwe kwa iyomwene. Wakachita ichi kuti muwoneke kuŵa ŵanthu ŵatuŵa, ŵakutozgeka na ŵambula kafukwa panthazi pakhe.

²³Imwe mukwenera kukhalirira mu chipulikano, ŵakuziza na kwimilira nganganga, kwambula kusezgekako ku chigomezgo mu Uthenga Uweme uwo mukapulika weneuwo uli kupharazgika ku chilengiwa chose cha pasi ndipo ndicho chifukwa ine Paulosi nkhaŵira muteŵeti.

²⁴Sono ine nkhusekerera mu viphyo vyane chifukwa cha imwe. Ndipo mu kukomwa kwane kwa mu thupi ndimo nkhufiskira ivyo vichali kukhumbikwa ku visuzgo vya Khristu mu malo mwa thupi lakhe ilo ndi mpingo.

²⁵Ine ndili kwimikika kuŵa muteŵeti wa mpingo uwu, na Chiuta mweneuyo wakandipa mlimo kuti ndimuteŵeterani, kuti mazgu gha Chiuta ghamanyikwe kwakufikapo.

²⁶Ndigho makani gha muchindindi agho ghakabisika kufuma papo kale na ku miwiro yose, kweni sono Chiuta waghavumbula ku ŵatuŵa ŵakhe.

²⁷Iyo wakakhumba kuti iwo ŵamanye cha muchindindi icho mbusambazi wa uchindami wakhe mukati mu ŵamitundu. Chamuchindindi icho nchakuti, Khristu wali mwa imwe, uyo nchigomezgo cha uchindami.

²⁸Ntheura ŵanthu wose tikuŵapharazgira Khristu, tikuŵachenjezga ŵanthu wose na kuŵasambizga na mahara ghose mwakuti tiŵapereke kwa Chiuta kuti ŵaŵenge ŵakufikapo mwa Khristu.

²⁹Chifukwa cha ichi nkhulimbalimba kuteŵeta mlimo uwu mwakugomezgeka na nkhongono ya Khristu iyo yikuteŵeta na nkhongono mwa ine.