Read new_tumbuka_bible ŴaKolose 2 Bible Online

ŴaKolose 2 - new_tumbuka_bible bible

ŴaKolose 2

¹Nkhukhumba kuti mumanye umo nkhulimbalimbira chifukwa cha imwe, na ŵanyinu ŵa mpingo wa Laodekeya, na wose awo tindawonanepo na kale.

²Nkhuchita ntheura kuti mitima yawo yikhwimiskike na kuti ŵaŵe ŵamoza mu kutemwa, mwakuti ŵaŵe na usambazi wose wa kapulikiskiro ndipo na kamanyiro ka cha muchindindi cha Chiuta icho ndi Khristu iyomwene.

³Mwa mweneuyo muli kubisika vyuma vyose vya mahara na umanyi.

⁴Nkhuyowoya ichi kuti kuŵavye na yumoza wamupusikani imwe, na mayowoyero gha uryarya.

⁵Chifukwa nanga kuti ndili namwe mu thupi chara kweni ndili namwe mu mzimu. Nkhukondwa umo mukukhalira makora na umo mukwimilira nganganga mu chipulikano chinu mwa Khristu.

⁶Ntheura sono pakuti muli kumupokerera Khristu Yesu Fumu, kharani mwa iyo.

⁷Jinthani misisi yinu mwa iyo, zengani umoyo winu mwa iyo ndipo muŵe ŵakukholerakholera mu chipulikano chinu nga ndi umo mukasambizgikira. Ndipo muŵenge ŵakuwonga chomene.

⁸Ntheura chenjerani kuti kuŵavye munthu yose wamupusikani na fundo za mahara ghawakawaka na za upusikizgi kwakuyana na maluso gha ŵanthu, kwakuyana na mizimu yakwambilira ya mlengalenga, ivyo kuti vikuyana na Khristu chara.

⁹Pakuti mu thupi la Khristu, ndimo ukukhara uChiuta wose wakufikapo.

¹⁰Ndipo imwe mwa iyo, mwapika umoyo wakufikapo. Iyo ndiyo mutu wa miwuso na mazaza ghose gha uzimu.

¹¹Mwa iyoso mukakotoreka na ukotori wakuchitika na mawoko gha ŵanthu chara, kweni ukotori wakuchitika na Khristu uwu ukufwaturako munthu ku nkhongono ya kwananga na kupereka wanangwa.

¹²Chifukwa para mukabapatizikanga, mukasungika pamoza na Khristu. Ndipo na ubapatizo weneuwu, mukawuskikiraso pamoza nayo mu chipulikano chinu mu nkhongono ya Chiuta iyo yikamuwuska ku ŵakufwa.

¹³Ndipo imwe kale mukaŵa ŵakufwa ku vya uzimu chifukwa cha zakwananga zinu, ndiposo chifukwa mukaŵa ŵambula kukotoreka mu kaŵiro ka kwananga. Kweni sono Chiuta wamutorerani ku umoyo pamoza na Khristu. Iyo wali kutigowokera zakwananga zithu zose,

¹⁴pakusisita karata wa ngongole yithu wakuphara za Dango la Mozesi. Karata uyu wakaŵa wakutipa mrandu, kweni iyo wakamuwuskapo pakumukhomera pa mphinjika.

¹⁵Pa mphinjika yira, Khristu wakatonda nkhongono ya mizimu ya ŵakuwusa na ya ŵamazaza wose. Ndipo wakachita ichi kuti waŵakhozge soni ku wumba na kukondwera kuvivya kwakhe.

¹⁶Ntheura paŵavye munthu munyakhe wamweruzgani pa ivyo mukurya panji pa ivyo mukumwa, panji nga mpha chikondwerero, panji cha mwezi uphya, panji zuŵa la Sabata

¹⁷Vinthu ivi ndi muzgezge wa vinthu ivyo vikwiza. Kweni vyenecho nvya Khristu.

¹⁸Mureke kuzomerezga kukhizgika na waliyose uyo wakuti wali pachanya uyo wakulimbikira kujiyuyura kwa utesi na kusopa ŵangelo, ndipo pakuyima nganganga pa zimboniwoni, na pakujitukumura kwambula na chifukwa chakupulikikwa na kaghanaghaniro ka unthu.

¹⁹Kuti ŵakukoreska kwa Khristu chara uyo ndi mutu. Pakuti thupi lose likusanga nkhongono mwa iyo ndipo likurungana na kukakana na misipa yakhe. Ntheura thupi likumanya kukura nga ndi umo Chiuta wakukhumbira.

²⁰Imwe muli kufwa pamoza na Khristu, ndipo muli kuwombokwako ku mizimu yakuwusa ya mu mlengalenga. Chifukwa uli mukukhara nga ndi para muli ŵa mu charu? Chifukwa uli mukupulikira marango agho ghakuti,

²¹“Ungakoranga ichi chara. Ungachetanga icho chara. Ungakhwaskanga chira chara?”

²²Vyose ivi vikuzgoka kuŵa vyawaka para mwavichitira nchito, kwakuyana na marango na visambizgo vya ŵanthu.

²³Marango ghawo ghakuwoneka nga nvinjeru pakuti ghakulangula ŵanthu kusopa umo iwo ŵakukhumbira, kujiyuyura kwakupusika na kulisuzgasuzga thupi lawo. Marango agha kuti ghali na chandulo chara ndiposo kuti ghakovwiraso pakulitonda khumbiro la thupi chara.