Read new_tumbuka_bible ŴaKolose 3 Bible Online

ŴaKolose 3 - new_tumbuka_bible bible

ŴaKolose 3

¹Ipo sono usange muli kuwuskika pamoza na Khristu, ntheura penjani vinthu ivyo vili kuchanya uko Khristu wakukhara ku woko la maryero la Chiuta.

²Mughanaghanenge vinthu ivyo vili kuchanya, vya pano pasi chara.

³Pakuti muli kufwa, ndipo umoyo winu uli kubisika pamoza na Khristu mwa Chiuta.

⁴Khristu ndiyo umoyo winu wenecho sono, ndipo para iyo wamkuvumbukwa, imwe namweso mwakuvumbukwira pamoza nayo mu uchindami wakhe.

⁵Ntheura mufwe ku makhumbiro gha charu agho ghali mwa imwe, agho ndi: uzaghali ukazuzi, kurakaraka, makhumbiro ghaheni na kudokeradokera uko nkhusopa vikozgo.

⁶Chifukwa cha ivi ukari wa Chiuta ukwiza pa ŵanthu awo ŵakuwura kupulikira iyo.

⁷Imwe namwe kale mukakharanga mukati mu ŵanthu ŵa ntheura mu umoyo uwo mukaŵa nawo.

⁸Kweni sono wuskaniko vyose ivi, nga ndi: ukari, kucheruka, kujokolana, kunangana mazina na kuyowoya vya nthontho.

⁹Mureke kuyowoya utesi ku yumoza na munyakhe, pakuti mwavura unthu winu wakale pamoza na makhaliro ghakhe ghaheni,

¹⁰ndipo sono mwavwara unthu uphya. Uwu ndi unthu uwo Chiuta, Mlengi winu wakuwerezgeramo kaŵirikaŵiri mu chikozgo chakhe kuti mumumanye iyo fikepo.

¹¹Ntheura palije mphambano pakati pa muGriki na muYuda, wakukotoreka na wambula kukotoreka, mulendo, wambula kusambira, wa makhaliro ghawakawaka, mwanangwa panji muzga. Kweni Khristu ndiyo vyose ndipo wali mu vyose.

¹²Ipo vwarani nga ŵanthu ŵakusoreka na Chiuta, ŵatuŵa na ŵakutemweka, ŵa chiwuravi, ŵa lusungu, ŵakujiyuyura, ŵakuzika na ŵakuzizipizga.

¹³Mukwenera kuŵa ŵakuzizipizgirana na ŵakugowokerana usange yumoza wali na kafukwa na munyakhe. Ntheura gowokeranani nga ndi umo Fumu yili kumugowokerani imwe.

¹⁴Pachanya pa vyose ivi muŵe ŵakutemwa, pakuti kutemwa ndiko kukukaka vyose kuti viŵe mu umoza wakufikapo.

¹⁵Rekani mutende uwo Khristu wakupereka uwuse mu mitima yinu. Pakuti ndi mu mutende weneuwu uwo Chiuta wali kumuchemerani kuti muŵe thupi limoza. Ntheura muŵenge ŵakuwonga.

¹⁶Rekani mazgu gha Khristu mu uzari wakhe ghakhazikike kwakufikapo mu mitima yinu. Musambizgane na kusokana mu mahara ghose. Yimbirani Chiuta sumu za kuwonga para mukwimba MaSalimo, sumu zakurumba na sumu zinyakhe za uzimu mu mitima yinu.

¹⁷Chilichose icho mukuchita, manyi mu kuyowoya panji mu milimo, chitani chilichose mu zina la Fumu Yesu, pakuwonga Chiuta Dada mwa iyo.

¹⁸Ŵawoli, jilambikani ku ŵafumu ŵinu pakuti pakuŵa ŵakhristu ndicho mukwenera kuchita.

¹⁹Ŵafumu, temwani ŵawoli ŵinu, muŵakore makora mungaŵaŵiranga ŵakari na ŵankhaza chara.

²⁰Mwa ŵana, ndi mlimo winu wa chikhristu kupulikira ŵapapi ŵinu mu vyose, pakuti cha ntheura chikukondweska Fumu.

²¹Mwa ŵadada, mureke kutopora mitima ya ŵana ŵinu, mzire ŵagongoweskeke.

²²Mwa ŵazga, pulikirani ŵene-nchito ŵa pano pasi mu vyose. Mureke kuchita ivi kwa chiphamaso chara kuti ŵamurumbani, kweni chitani kufumira ku mtima wa unenesko wakufikapo chifukwa cha kuchindika Fumu.

²³Kose ako mukuchita chitani na mtima wose, nga ndi para mukuchitira Fumu, munthu chara.

²⁴Pakuti mukumanya waka kuti Fumu yamkumupani chiharo nga ndi njombe yinu. Pakuti mukuteŵetera Fumu uyo ndi Khristu.

²⁵Ndipo yose uyo ngwakwananga wati wapokere chilango pa uheni wakhe, chifukwa Chiuta kuti ngwa kutemwera chara.