Read new_tumbuka_bible ŴaKolose 4 Bible Online

ŴaKolose 4 - new_tumbuka_bible bible

ŴaKolose 4

¹Mwa ŵene-nchito, ŵakorani makora ŵazga ŵinu mu urunji na mwakwenerera, pakumanya kuti namweso muli na Mwene-nchito winu kuchanya.

²Rutilirani kufwirirapo mu kuromba, ndipo pakuromba muŵenge maso na ŵakuwonga Chiuta.

³Mutiromberengeso na ise wuwo, kuti Chiuta watijurire mwaŵi wakupharazgira mazgu ghakhe, kuti tiphare cha muchindindi cha Khristu. Chifukwa cha cheneichi, ine ndili kuŵikika mu gadi,

⁴mwakuti ndirongosore makora ghene makani ghose umo nkhwenerera kuyowoyera.

⁵Mendero ghinu ghaŵenge gha mahara mukati mwa ŵanthu awo mba kuwaro kwa mpingo wa Chiuta, mwakuti nyengo iyo muli nayo yireke kutayika pa waka.

⁶Mazgu agho mukuyowoya nyengo zose ghaŵenge ghauchizi na gha kulungika na muchere mwakuti mumanye umo mungazgolera makora munthu yose.

⁷Tikiko mubali withu wakutemweka, ndiyo wati wamwandulirani vyose vya ine. Ndi muteŵeti wakugomezgeka na wa nchito munyithu pa mlimo wa Fumu.

⁸Ndicho chifukwa nkhumutumira kwa imwe kuti wamumanyiskani umo tiliri, na kumukhwimiskani mtima.

⁹Ndamutuma pamoza na Onesimo, mubali withu wamagomezgeko na wakutemweka, uyo njumoza wa imwe. Iwo ŵamwanduliraninge vyose ivyo vikuchitika kuno.

¹⁰Arisitariko, wakukakika munyane muno mu gadi, wakumutauzgani, ndiposo na Mariko muvyara wa Baranaba. Mulikumanyiskika kale na za kapokererero ka Mariko usange wakwiza kwa imwe wizakamupokerera.

¹¹Yesu mweneuyo wakuchemeka Yusto nayo wakumutauzgani. Ŵanthu ŵatatu aŵa ndiwo ŵekha ŵakhristu ŵakufuma mu chiYuda, awo pamoza na ine tikuteŵetera Ufumu wa Chiuta. Ndipo ndiwo ŵanguŵa chisangurusko chane.

¹²Wakumutauzgani Epafura uyo njumoza wa imwe, ndiposo ndi muzga wa Khristu Yesu. Nyengo zose wakufwirirapo kumuromberani imwe kwa Chiuta kuti muŵe ŵakwimilira nganganga. Wakuchita ntheura kuti muŵe ŵakhristu ŵakufikapo na ŵakukhoma kwakukhorweska mu vyose ivyo Chiuta wakukhumba.

¹³Ine ndekha ndingamanya kupereka ukaboni kuti ŵakuteŵeta mlimo wankhongono chomene chifukwa cha imwe, ndiposo na ŵa mpingo wa Laodekeya na ŵa mpingo wa Herapoli.

¹⁴Luka, ng'anga yithu yakutemweka, ndiposo na Dema, ŵakumutauzgani.

¹⁵Mutitawuzgireko ŵabali ŵithu awo ŵali mu Laodekeya na Nimfa ndiposo na mpingo wa Chiuta uwo ukuwungana mu nyumba yakhe.

¹⁶Para mwaŵazga karata uyu, ŵa mpingo wa Chiuta wa mu Laodekeya nawo ŵakaŵazgepo. Imwe namwe mwizakaŵazgepo uyo ŵamkumutumirani ŵa mpingo wa Chiuta mu Laodekeya.

¹⁷Mumuphalire Arikipo kuti, “Uwone kuti ukufiska uteŵeti uwo Fumu yili kukupa.”

¹⁸Ine Paulosi, nkhulemba kutauzga uku na woko lane. Kumbukani kuti ndili mu maunyoro. Uchizi wa Chiuta uŵenge namwe.