Read new_tumbuka_bible 1 ŴaTesalonika 1 Bible Online

1 ŴaTesalonika 1 - new_tumbuka_bible bible

1 ŴaTesalonika 1

¹Kufuma kwa ine Paulosi, Silivano na Timote. Ku mpingo wa ku Tesalonika mwa Chiuta Dada na Fumu Yesu Khristu. Uchizi na mutende viŵenge namwe.

²Tikuwonga Chiuta nyengo yose chifukwa cha imwe mose tikumuzunurani kaŵirikaŵiri mu malurombo ghithu.

³Ndipo tikukumbuka panthazi pa Chiuta, Ŵadada ŵithu umo mukurongorera milimo yinu ya chipulikano na kutokatoka kwinu kwa kutemwa na kwakuziza kwa chigomezgo mwa Fumu yithu Yesu Khristu.

⁴Pakuti tikumanya mwa ŵabali ŵakutemweka na Chiuta, kuti wali kumusankhani.

⁵Pakuti tikiza na Uthenga Uweme kwa imwe, uwo kuti ukaŵa na mazgu pera chara, kweni mu nkhongono, na mu Mzimu Mutuŵa pamoza na kukhorweska kwakufikapo ndipo mukumanya umo tikakhaliranga para tikaŵa pamoza namwe. Tikachita ntheura chifukwa cha imwe.

⁶Imwe mukatirondezga ise na Fumu, pakuti mukapokera mazgu mu visuzgo vikuru na chimwemwe chikuru icho chikakhuŵirizgika na Mzimu Mutuŵa.

⁷Ntheura mukaŵa bambiro ku wose ŵakupulikana mu Makedoniya na mu Akaya.

⁸Pakuti ndi mazgu gha Fumu pera chara agho ghatandazgika mu Makedoniya na mu Akaya, kweni chipulikano chinu mwa Chiuta, chili kutandazgika kosekose. Ntheura palije chilichose icho ise tingayowoyapo chara.

⁹Pakuti iwo ŵenecho ŵakuphara umo mukatipokerera, na umo mukawukirako ku kusopa vikozgo kuya kwa Chiuta, wamoyo na wa unenesko.

¹⁰Sono mukulindirira kwiza kwa Mwana wakhe Yesu kufuma kuchanya, uyo Chiuta wakamuwuska ku wakufwa, ndipo wakutithaska ku ukari wa Chiuta uwo uti wizenge.