Read new_tumbuka_bible 1 ŴaTesalonika 2 Bible Online

1 ŴaTesalonika 2 - new_tumbuka_bible bible

1 ŴaTesalonika 2

¹Mwa ŵabali, mukumanya kuti kuchezga kwithu kwa imwe kuti kukaŵa kwa waka chara.

²Kweni nangauli tikasuzgikapo kale na kukhozgeka soni mu Filipi, nga ndi umo mukumanyira, tikaŵa na chikanga mwa Chiuta withu kupharazga Uthenga Uweme wakufuma kwa iyo nanga ŵanji ŵakaŵako awo ŵakatijandizganga.

³Pakuti pempho lithu kwa imwe kuti ndakusovya chara, panji liri pa vinthu vya ukazuzi nesi kukhumba kupusika chara.

⁴Kweni nga ndi umo Chiuta watizomerezgera na kutikorezga Uthenga Uweme, ntheura tikupharazga, kuti tikukhumba kukondweska ŵanthu chara, kweni kukondweska Chiuta uyo wakuyezga mitima yithu.

⁵Namwe mukumanya kuti tikiza kwa imwe na mazgu gha kupusika chara, panji na mazgu gha uzukusi, Chiuta ndiyo kaboni withu.

⁶Ise kuti tikakhumbanga kurumbika na ŵanthu chara, manyi ndimwe panji ŵanthu ŵanji nangauli tingaŵa na wanangwa kumufumbani kuti mutovwire, pakuti ndise ŵakutumika ŵa Khristu.

⁷Kweni tikaŵa ŵakuzika mukati mwinu nga ndi mama uyo wakupwererera ŵana ŵakhe.

⁸Ntheura pakuŵa na chiwuravi chomene na imwe, tikanozgeka kuti timugaŵiraniko Uthenga Uweme wa Chiuta pera chara, kweniso na umoyo withu wuwo, pakuti mukaŵa ŵakutemweka chomene kwa ise.

⁹Pakuti mukukumbuka mwa ŵabali mlimo na kutokatoka kwithu. Apo tikapharazganga Uthenga Uweme wa Chiuta, tikagwira nchito za mawoko muhanya na usiku, mwakuti tireke kusuzga munthu waliyose wa imwe.

¹⁰Imwe ndimwe ŵakaboni withu, ndipo Chiuta nayo ndi kaboni, kuti makhaliro ghithu pakati pa imwe ŵakupulikana ghakaŵa ghaweme, gha urunji na ghambula kalema.

¹¹Chifukwa mukumanya waka na umo tikamupwerererani yumozayumoza wa imwe nga ndi umo wiske wakupwererera ŵana ŵakhe.

¹²Tikamukhwimiskani, kumusanguruskani, na kumuchiskani kuti mendero ghinu gharongore umoyo uwo ukukondweska Chiuta, uyo wakumuchemani kuti musangane nayo mu Ufumu wakhe na wakhe na uchindami.

¹³Ntheura pa chifukwa ichi tikumuwongaso Chiuta kwambula kureka. Pakuti apo mukapokerera mazgu gha Chiuta kufuma kwa ise, mukaghapokerera nga ndi mazgu gha ŵanthu chara kweni nga ndi umo ghaliri nadi mazgu gha Chiuta agho ghakuchita mlimo mwa imwe ŵakupulikana.

¹⁴Pakuti imwe mwa ŵabali mukaŵa ŵakurondezga mipingo ya Chiuta iyo yili mu Yudeya mwa Khristu Yesu. Pakuti imwe mukavimyantha ku ŵanthu awo ŵa ku kwinu nga ndi umo nawo ŵakavimyanthira ku ŵaYuda.

¹⁵ŴaYuda ŵara ŵakakoma Fumu Yesu na nchimi wuwo, ndipo ŵakatichimbizgira kuwaro na ise wuwo. Iwo kuti wakukondweska Chiuta chara, ndipo mbarwani ku ŵanthu wose.

¹⁶Pakuti ŵakutijandizga na ise wuwo kupharazga ku ŵamitundu, mazgu agho ghakumanya kuŵatorera chiponosko. Nyengo yose iyi ŵafiskanga ndimi ya zakwananga ndipo sono, ukari wa Chiuta wiza pa iwo.

¹⁷Mwa ŵabali, tikati tapatukana kwa kanyengo kachoko, kuti tikapatukana na mtima chara, kweni mu thupi. Ndipo tikakhumbanga chomene kuti tiwonane namwe maso na maso.

¹⁸Ntheura tikakhumba kwiza kwa imwe. Ine Paulosi, nkhayezga kanandiko kwiza kwa imwe, kweni Satana wakatikanizganga.

¹⁹Pakuti chigomezgo chithu ndi nchi, panji chimwemwe, panji mphumphu iyo ise tamkuthumbwiramo pa maso pa Fumu yithu Yesu para yikwizaso. Kasi ndimwe chara?

²⁰Pakuti imwe ndimwe uchindami na chimwemwe chithu.