Read new_tumbuka_bible 1 ŴaTesalonika 3 Bible Online

1 ŴaTesalonika 3 - new_tumbuka_bible bible

1 ŴaTesalonika 3

¹Ntheura para tikatondeka kuzizipizga, tikakhumba kuti tikhalire kumanyuma mu Ateni.

²Ndipo tikamutuma Timote mubali withu na muteŵeti wa Chiuta mu Uthenga Uweme wa Khristu kuti wamukhazikiskani na kumovwirani mu chipulikano chinu,

³mwakuti paŵavye na yumoza wa imwe uyo wati waleghelegheske na visuzgo ivi. Imwe mwekha mukumanya kuti ise tendenge mu visuzgo vya ntheura.

⁴Pakuti apo tikaŵa pamoza namwe tikamuphalirani nkhanira kuti tamkuŵa mu visuzgo. Ntheura nga ndi umo mukumanyira, ndimo vikachitikira.

⁵Ndicho chifukwa nkhati ndatondeka kuzizipizga nkhamutuma Timote kuti ndimanye umo chipulikano chinu chiliri mzire Satana, Mupuruski yura, wamupuruskani ndipo kutokatoka kwithu kuzgoke kwa waka.

⁶Kweni sono Timote wati wawerako kwa imwe, kwiza kwa ise na kutiyeghera Uthenga Uweme wa chipulikano na kutemwa kwinu. Ndipo watiphalira kuti nyengo yose mukutikumbuka na kutemwa, ndipo kuti mukunwekera kutiwona ise nga ndi umo nase tikunwekera kumuwonani.

⁷Pa chifukwa ichi mwa ŵabali, mu visuzgo vyithu vyose na mukukomwa kwithu tikakhwimiskika chifukwa cha chipulikano chinu.

⁸Pakuti sono tili na umoyo usange imwe mukwimilira nganganga mu Fumu.

⁹Kasi sono tingamuwonga uli Chiuta na mtima wakufikapo pa chimwemwe icho tili nacho panthazi pakhe chifukwa cha imwe?

¹⁰Muhanya na usiku tikuromba chomene nkhanira kuti timuwonani maso na maso kuti timupani icho chikaperera mu chipulikano chinu.

¹¹Tikuromba kuti Chiuta, Ŵadada ŵithu iwoŵene na Fumu yithu Yesu, ndiwo ŵatinyoroskere nthowa yithu yakwizira kwa imwe!

¹²Fumu yikuzge kutemwa kwinu kuti kuzare ku yumoza na munyakhe, ndiposo na ku ŵanthu wose kuŵenge nga ndi umo ise nase tikumutemwerani imwe,

¹³mwakuti wakhazike mitima yinu kuti muŵe ŵambula kususkika mu utuŵa panthazi pa Chiuta Ŵadada ŵithu para Fumu Yesu wakwiza pamoza na ŵatuŵa wakhe wose.