Read new_tumbuka_bible 1 ŴaTesalonika 4 Bible Online

1 ŴaTesalonika 4 - new_tumbuka_bible bible

1 ŴaTesalonika 4

¹Pa umaliro mwa ŵabali tikumuŵeyani na kumuchiskani mwa Fumu Yesu, kuti nga ndi umo mukasambilira kwa ise ndimo mukwenera kukhalira kuti mukondweske Chiuta. Nadi mukurondezga makhaliro gha ntheura, kweni sono sazgiraniko kwakuruska.

²Pakuti mukumanya visambizgo ivyo tikamupani kwizira mwa Fumu Yesu.

³Khumbo la Chiuta ndakuti muŵenge ŵatuŵa, uko nkhupatukako ku uzaghali.

⁴Munthu yose wa imwe wamanye kujikora na kujisungilira mu utuŵa na mu nchindi.

⁵Mureke kuŵa ŵakulamphalampha mu makhumbiro ghinu nga ndi umo ŵakuchitira ŵakuwaro, awo ŵalije kumanya Chiuta.

⁶Ntheura kuŵavye munthu wanangire na kumuzgerera mukhristu munyakhe pa ichi. Tikamuphalirani kale ichi ndipo tikumuchenjezgani kuti Fumu yamkulanga awo ŵakuchita ivi.

⁷Pakuti Chiuta wakatichemera kuti tichitenge ukazuzi chara, kweni kuti tikharenge na umoyo utuŵa.

⁸Ntheura uyo wakukana chisambizgo ichi, kuti wakukana munthu chara, kweni wakukana Chiuta, uyo wakupereka Mzimu wakhe Utuŵa kwa imwe.

⁹Kwakuyana na kutemwa pakati pa ŵakhristu chikukhumbikwa chara kuti munthu wamulemberani, pakuti Chiuta wali kumusambizgani umo mukwenera kutemwerana.

¹⁰Ndipo nadi mukuŵatemwa ŵakhristu ŵanyinu wose awo ŵali mu Makedoniya. Kweni tikumuchiskani mwa ŵabali kuti mukwenera kurutilira mukutemwana kwinu.

¹¹Munwekenge kuŵa na umoyo wakuzika na kuchita vyinu na vyinu ndipo munthu yose wagwire nchito na mawoko ghakhe, nga ndi umo tikamuphalirani.

¹²Muchite ichi kuti ŵanthu ŵakuwaro kwa mpingo ŵamuchindikani ndiposo kuti mureke kugomezga munthu pa icho mukukhumba.

¹³Mwa ŵabali, tikukhumba chara kuti muŵe ŵalemwa na vya awo ŵali kufwa[1] mwakuti mureke kuŵa na chitima nga ndi awo walije chipulikano.

¹⁴Pakuti tikupulikana kuti Yesu wakafwa, ndipo wakawukaso. Ntheura awo ŵali kufwira mwa Yesu, Chiuta wamkwiza nawo pamoza na Yesu.

¹⁵Ntheura tikumuphalirani ichi mu mazgu gha Fumu mwenecho; kuti ise takharako, taŵeneise tiŵenge ŵamoyo mpaka kwiza kwa Fumu, kuti tamkuŵadangirira chara awo wali kufwa kale.

¹⁶Pakuti Fumu yekha yamukhira kufuma kuchanya na mphomo yikuru. Mungelo mukuru wamkucherezga ndipo mbata ya Chiuta yamkulira. Ŵanthu awo wali kufwa uku ŵakupulikana mwa Khristu, ndiwo ŵamkudanga kuwuka.

¹⁷Penepapo ise takharako tichali ŵamoyo tamkwapulikira muchanya pamoza na iwo mu maŵingu kuya kakumana na Fumu mudera. Ntheura tamkuŵa na Fumu mazuŵa ghose.

¹⁸Ntheura musanguruskane na mazgu gheneagha.