Read new_tumbuka_bible 1 ŴaTesalonika 5 Bible Online

1 ŴaTesalonika 5 - new_tumbuka_bible bible

1 ŴaTesalonika 5

¹Sono mwa ŵabali, vya mazuŵa na zinyengo kuti kukukhumbikwa kumulemberani chara.

²Pakuti imwe mwaŵene mukumanya makora ghene kuti, zuŵa la Fumu lamkwiza nga ndi munkhungu uyo wakwiza na usiku.

³Para ŵanthu ŵakuti, “Vinthu vyose vili makora ndipo kuli mutende,” penepapo ndipo kupankhuka kwizamkuŵizira, mwamabuchibuchi. Wamkubuchizgika nga ndi vyakuŵinya ivyo vikwiza pa mwanakazi uyo wali pafupi kubaba, ndipo kuti wakuvigwentha chara.

⁴Kweni imwe mwa ŵabali, kuti muli mu mdima chara, kuti zuŵa lira lizakamubuchizgani waka nga ndi munkhungu.

⁵Pakuti mose ndimwe ŵanthu ŵa mu ungweru na ŵanthu ŵa muhanya, kuti tili ŵa mu usiku chara, nesi ŵa mu mdima.

⁶Ntheura tireke kugona tulo nga ndi umo ŵakuchitira ŵanji, kweni tiŵe maso na ŵakujikora.

⁷Pakuti awo ŵakugona tulo, ŵakugona na usiku, ndipo awo ŵakuloŵera nawo ŵakuloŵera na usiku.

⁸Kweni ise tili ŵa mu muhanya, ndipo tikwenera kuŵa ŵakujikora. Tikwenera kuvwara chipulikano na kutemwa nga ndi ngunya ya pa chifuŵa, ndiposo na chigomezgo cha chiponosko nga ndi chipewa chakutivikirira.

⁹Pakuti Chiuta wakatimika kuti tikomwe na ukari wakhe chara, kweni tisange chiponosko mwa Fumu yithu Yesu Khristu,

¹⁰Iyo wakatifwira mwakuti nanga tili maso panji tikugona tulo, tiŵe na umoyo pamoza nayo.

¹¹Ntheura chiskanani na kukhwimiskana yumoza na munyakhe nga ndi umo mukuchitira.

¹²Mwa ŵabali, tikumuŵeyani, kuti muŵachindikenge ŵanthu awo wakuchita mlimo mukati mwinu, ndipo mbarongozgi mwa Fumu na kumuchenjezgani mu umoyo winu wa chikhristu.

¹³Muŵape nchindi yikuru mu kuŵatemwa chifukwa cha mlimo uwo ŵakuchita. Mukhare mu mutende yumoza na munyakhe.

¹⁴Ndipo tikumuchiskani mwa ŵabali, kuti chenjezgani awo mbakata, khwimiskani awo wali na wofi, vwirani ŵatechitechi ndiposo muŵenge ŵakuzizipizga kwa iwo.

¹⁵Paŵavye yumoza wa imwe wakuwezgera uheni pa uheni, kweni nyengo zose yezgani kuchita uweme ku yumoza na munyakhe ndiposo na ku ŵanthu wose.

¹⁶Mazuŵa ghose muŵenge ŵakukondwa,

¹⁷murombenge rutaruta.

¹⁸Mukaŵiro kalikose muwongenge chifukwa ichi ndicho Chiuta wakukhumba kuti muchitenge mwa Khristu Yesu.

¹⁹Mungazimyanga Mzimu chara,

²⁰mungayuyuranga mazgu gha uchimi,

²¹kweni pimani vinthu vyose. Koreskani icho nchiweme.

²²Patukaniko ku uheni uliwose.

²³Chiuta wa mutende iyomwene, mphanyi wamusukani nkhanirankhanira ku zakwananga zinu ndipo wamusungani ŵa msuma mu mzimu, mu umoyo ndiposo na mu thupi, kuti mukhare ŵambula kalema mpaka kwiza kwa Fumu yithu Yesu Khristu.

²⁴Iyo mweneuyo wakumuchemani ngwa kugomezgeka ndipo wati wachifiskenge ichi.

²⁵Mwa ŵabali, mutiromberenge.

²⁶Muŵatauzge ŵabali wose na kutemwa kwenecho pakufyofyonthana.

²⁷Nkhumuchiskani chomene mu zina la Fumu, kuti karata uyo muŵazgire ŵabali wose.

²⁸Uchizi wa Fumu yithu Yesu Khristu uŵenge na imwe.