Read new_tumbuka_bible Yoshuwa 1 Bible Online

Yoshuwa 1 - new_tumbuka_bible bible

Yoshuwa 1

¹Wakati wafwa Mozesi, muteŵeti wa FUMU, FUMU yikati kwa Yoshuwa, mwana wa Nuni, movwiri wa Mozesi,

²“Mozesi muteŵeti wane wafwa. Sono iwe pamoza na ŵanthu wose aŵa munozgeke kuti mwambuke mronga wa Yorodani, ndipo munjire mu charu icho nkhupereka kwa imwe ŵaIsraele.

³Malo ghose agho mwamkukandapo na malundi, nditi ndimupani kuŵa ghinu, nga ndi umo nkhayowoyera kwa Mozesi.

⁴Charu chinu chamkwamba ku mapopa ku mwera, mpaka ku mapiri gha Lebanoni ku mpoto, kufuma ku mronga ukuru wa Yufurate ku mafumiro gha dazi, ndipo na charu chose cha ŵaHiti, mpaka ku Nyanja Yikuru ku manjiliro gha dazi.

⁵Iwe Yoshuwa, palije na yumoza uyo wamkwimikana nawe mazuŵa ghose gha umoyo wako. Umo nkhaŵira na Mozesi, ndimo ndiŵirenge na iwe. Ine nditi ndichite kuti iwe utondeke chara nesi kukureka iwe.

⁶“Uŵenge wankhongono na wakukhwima mtima pakuti iwe ndiwe wamkuchitiska kuti ŵanthu aŵa ŵatore charu icho nkhapangana ku ŵasekuru ŵawo kuti ndiŵapenge.

⁷Uŵenge waka wankhongono na wakukhwima chomene mtima. Uŵikengepo mtima kwakuyana na dango lose ilo Mozesi muteŵeti wane wakakulangulira. Ureke kuwukamo mwa ilo pakuzgokera ku maryero panji ku mazere chara mwakuti uŵenge na viweme kose uko ukuruta.

⁸Buku ili la dango lingawukangamo chara mu mlomo wako. Kweni ulangurukengemo muhanya na usiku mwakuti urongozgeke pakuchita makora kwakuyana na vyose ivyo vili kulembeka mwenemumo. Pakuchita ntheura vinthu viti vikwendere makora ndiposo uti ufiskenge makora vyose ivyo ukuchita.

⁹Asi ine ndakulangula? Uŵe wankhongono na wakukhwima mtima, ungopanga nesi kuthika lusoko, pakuti FUMU, Chiuta wako waŵenge nawe kose uko ukuruta.”

¹⁰Yoshuwa wakalangula ŵarongozgi ŵa ŵanthu ŵakati,

¹¹“Mwendemo mu msasa ndipo muŵaphalire ŵanthu kuti, ‘Nozgekerani vyakurya vyinu chifukwa pamanyuma pa mazuŵa ghatatu mwambukenge mronga wa Yorodani, kuti munjire na kupoka charu icho FUMU, Chiuta winu wakumupani kuŵa chiharo chinu.’ ”

¹²Yoshuwa wakati ku ŵa fuko la Rubeni, la Gadi ndipo na Hafu wa fuko la Manase,

¹³“Kumbukani mazgu agho Mozesi, muteŵeti wa FUMU wakamulangulani. Iyo wakati, ‘FUMU, Chiuta winu wakumupani malo agho mwamkupumulamo ndipo charu cheneichi wati wamupani kuŵa chinu.’

¹⁴Ŵawoli winu, ŵana ŵinu, na viŵeto vyinu vikhare danga mu charu icho Mozesi wakamupani ku sirya linyakhe la mronga wa Yorodani. Kweni vinkhara vyinu vyose vyambuke kunozgekera nkhondo pamoza na ŵabali ŵinu, na kuwovwira,

¹⁵yisuke FUMU yiŵapumuzge ŵabali ŵinu pamoza na imwe, ndipo nawo ŵatore charu icho FUMU Chiuta wakuŵapa kuŵa chawo. Penepapo ndipo muti muwerere ku charu icho chili kupika kwa imwe, charu icho Mozesi, muteŵeti wa FUMU wakamupani ku mafumiro gha dazi, ku sirya linyakhe la mronga wa Yorodani.”

¹⁶Ndipo ŵa fuko la Rubeni, la Gadi ndipo na hafu ŵa fuko la Manase ŵakamuzgora Yoshuwa ŵakati, “Vyose ivyo mwatilangula kuti tichite, titi tichitenge, ndipo kose uko mukutituma, tirutenge.

¹⁷Titi tikupulikire iwe mu vinthu vyose nga umo tikapulikira Mozesi. FUMU, Chiuta winu waŵe nawe nga ndi umo wakaŵira na Mozesi.

¹⁸Yose uyo wagarukirenge dango linu, na kukana mazgu ghinu agho iwe ukulangula, wati wakomeke. Kweni iwe uŵenge waka wankhongono na ŵakukhwima mtima.”