Read new_tumbuka_bible Yoshuwa 10 Bible Online

Yoshuwa 10 - new_tumbuka_bible bible

Yoshuwa 10

¹Para Adoni Zedeki, karonga wa Yerusalemu wakapulika umo Yoshuwa wapokera msumba wa Ayi, na umo wakawuparanyira nga ndi umo wakachitira ku msumba wa Yeriko na karonga wakhe. Wakapulikaso umo ŵanthu ŵa msumba wa Gibeyoni ŵakachitira phangano la mutende na ŵaIsraele ndipo ŵakakharanga mukati mwawo.

²Ntheura karonga yura wakopa chomene pakuti msumba wa Gibeyoni ukaŵa ukuru chomene, ukuyana waka na misumba ya maufumu. Ukaŵa ukuru kuruska msumba wa Ayi, ndipo ŵasilikari ŵakhe wose ŵakaŵa vinkhara.

³Ntheura Adoni Zedeki, karonga wa Yerusalemu wakatuma ŵanthu kwa Hohamu, karonga wa Heburoni, kwa Piramu, karonga wa Yarimuti, kwa Yafiya, karonga wa Lakishi, na Debiri, karonga wa Egiloni na mazgu ghakuti,

⁴“Zaninge kwa ine kuno kuti mundovwire kurwa na msumba wa Gibeyoni pakuti wachita phangano la mutende na Yoshuwa na ŵaIsraele.”

⁵Penepapo ŵakaronga ŵankhonde ŵa ŵaAmori, ŵeneawo ŵakaŵa karonga wa Yerusalemu, karonga wa Heburoni, karonga wa Yarimuti, karonga wa Lakishi, na karonga wa Egiloni, ŵakawungana pamoza, ŵakaruta iwo na ŵasilikari ŵawo wose ndipo ŵakazenga msasa kuthyana waka na msumba wa Gibeyoni, na kurwa nawo nkhondo.

⁶Ŵanthu ŵa msumba wa Gibeyoni ŵakatuma mazgu kwa Yoshuwa ku msasa pa Giligala ŵakati, “Mungatirekanga tekha ta ŵateŵeti ŵinu chara. Zaninge luŵiro kwa ise kuti mutiponoske! Zaninge mutovwire, pakuti ŵakaronga wose ŵa ŵaAmori kufuma ku charu cha mapiri ŵasazgana pamoza kuti ŵarwe na ise!”

⁷Ntheura Yoshuwa wakuwuka kufuma ku Giligala pamoza na ŵasilikari ŵakhe wose. Wakaruta pamoza vinkhara vya nkhondo.

⁸FUMU yikati kwa Yoshuwa, “Ungopanga chara. Ndaŵapereka mu mawoko ghako. Palije na yumoza wa iwo uyo wati wachinthe panthazi pako.”

⁹Ntheura Yoshuwa wakaŵarotokera mwakuŵabuchizga wakati wenda usiku wose kufuma ku Giligala.

¹⁰FUMU yikaŵatenthemeska chomene ŵakaronga ŵa ŵaAmori ŵara panthazi pa ŵaIsraele, ŵeneawo ŵakakoma ŵanthu ŵanandi mu msumba wa Gibeyoni. ŴaIsraele ŵakaŵachimbizgira ŵaAmori ku nthowa yakuya ku Beti Horoni ndipo ŵakarutilira kuŵakoma mpaka ŵakaya kafika ku nthowa yakuya ku Azeka na Makeda.

¹¹Apo ŵakachimbiranga ŵaIsraele, kufuma ku Beti Horoni kukhilira ku nthowa yakuya ku Azeka, FUMU yikaponya matalala ghakurughakuru kufuma ku mtambo kuwira pa iwo. Ndipo ŵanandi ŵakakomeka na matalala ghara kuruska awo ŵakakomeka na malupanga gha ŵaIsraele.

¹²Penepapo Yoshuwa wakati kwa FUMU panthazi pa ŵaIsraele pa zuŵa ilo yikaperekera ŵaAmori kwa ŵaIsraele, “Dazi iwe, yimilira chete pachanya pa Gibeyoni, mwezi nawe, pachanya pa dambo la Ayaloni.”

¹³Ntheura dazi likimilira pachanya mwezi nawo ukakhara penepapo mpaka fuko la Israele likawezgera nduzga pa ŵarwani ŵakhe. Ichi chili kulembeka mu Buku la Yashara. Zuŵa likimilira pakatikati pa mtambo, ndipo likachedwa kunjira pakutoraso nyengo pafupi zuŵa lose.

¹⁴Lindaŵeko zuŵa lakukozgana na ili na kale wuwo, panji pamanyuma pa leneili, apo FUMU yikapulikira mazgu gha munthu. Nadi, FUMU yikaŵarwera ŵaIsraele!

¹⁵Penepapo Yoshuwa na ŵaIsraele wose ŵakawerera ku msasa wawo ku Giligala.

¹⁶Ŵakaronga ŵankhonde ŵa ŵaAmori ŵara ŵakabisama mu mphanji ku Makeda.

¹⁷Para Yoshuwa wakaphalirika kuti ŵakaronga ŵankhonde ŵasangika, ŵabisama mu mphanji ku Makeda,

¹⁸wakati, “Mukakunkhuzgirepo mawe ghakurughakuru pa muryango wa mphanji, ndipo muŵikepo ŵanthu kuti ŵalindenge.

¹⁹Kweni imwe mureke kukhara penepapo chara, murutilire kurondezga ŵarwani ŵinu, muŵakome kufumira kumanyuma. Mungazomerezganga kuti ŵakafike ku misumba yawo chara, pakuti FUMU, Chiuta winu waŵapereka mu mawoko ghinu.”

²⁰Yoshuwa na ŵaIsraele ŵakati ŵamara kukoma na lupanga ŵanthu ŵanandi chomene, ŵakasuka ŵakakhara ŵachoko waka awo ŵakaponapo ndipo ŵeneaŵa ŵafika mu misumba yawo ya malinga.

²¹Penepapo ŵasilikari wose ŵakawera makora na kwiza kwa Yoshuwa ku msasa wa Makeda, ndipo pakaŵavye na yumoza wakayowoyapo uheni wa ŵaIsraele.

²²Sono Yoshuwa wakati, “Jurani muryango wa mphanji ndipo mwize nawo ŵakaronga ŵankhonde ŵara kwa ine.”

²³Sono ŵakiza nawo ŵakaronga ŵankhonde ŵara kufuma mu mphanji, karonga wa Yerusalemu, wa Heburoni, wa Yarimuti, wa Lakishi, na wa Egiloni.

²⁴Ŵakati ŵafika nawo ŵakaronga ŵara kwa Yoshuwa, wakachema ŵanarume wose ŵa ŵaIsraele ndipo wakati ku ŵarongozgi ŵa ŵasilikari awo ŵakiza nayo, “Zani kuno ndipo kandani malundi ghinu pa singo za ŵakaronga aŵa.” Ndipo ŵakiza na kukanda pa singo za ŵakaronga ŵara.

²⁵Yoshuwa wakati kwa iwo, “Mungopanga chara, nesi kuthika lusoko. Muŵe ŵankhongono na ŵa chikanga. Ichi ndicho FUMU yiti yichitenge ku ŵarwani ŵinu wose awo mwamkurwa nawo.”

²⁶Penepapo Yoshuwa wakaŵatimba na kuŵakoma ŵakaronga ŵara, ndipo wakaŵapayika pa makuni ghankhonde. Ŵakaŵa ŵakupayikika pa makuni mpaka na mise.

²⁷Pakunjira kwa dazi, Yoshuwa wakalangula kuti ŵaŵakhizge mu makuni na kuŵaponya mu mphanji mwenemura ŵakabisama. Pa muryango wa mphanji ŵakajarapo mawe ghakurughakuru agho ghalipo mpaka sono.

²⁸Pa zuŵa lenelira Yoshuwa wakapoka msumba wa Makeda. Wakawuparanya msumba na kukoma karonga wakhe na ŵanthu wose ŵa mu msumba. Wakarekamo na yumoza chara mu msumba, ndipo wakachita kwa karonga wa Makeda nga ndi umo wakachitira kwa karonga wa msumba wa Yeriko.

²⁹Penepapo Yoshuwa na ŵaIsraele wose ŵakarutilira kufuma ku Makeda, ŵakaruta ku Libina kuya karwa nkhondo.

³⁰FUMU yikaperekaso msumba wa Libina na karonga wakhe mu mawoko gha ŵaIsraele. Yoshuwa wakawuparanya msumba na kukoma na lupanga munthu waliyose uyo wakaŵamo. Kukaŵavye munthu wakukharamo wamoyo nanga njumoza. Ndipo wakachita kwa karonga wakhe nga ndi umo wakachitira kwa karonga wa msumba wa Yeriko.

³¹Yoshuwa pamoza na ŵaIsraele wose ŵakarutilira kufuma ku msumba wa Libina ŵakaya kafika ku msumba wa Lakishi. Ŵakawuzingirizga msumba, na kurwa nawo nkhondo.

³²FUMU yikapereka msumba wa Lakishi mu mawoko gha ŵaIsraele, ndipo pa zuŵa la chiŵiri Yoshuwa wakawupoka. Wakawuparanya msumba na kukoma na lupanga munthu waliyose nga ndi umo wakachitira ku msumba wa Libina.

³³Pa nyengo yeneyiyo, Horamu, karonga wa Gezere wakiza kuti wovwire ŵanthu ŵa msumba wa Lakishi, kweni Yoshuwa wakamukoma pamoza na ŵasilikari ŵakhe wose kwambula kurekapo nanga njumoza wamoyo.

³⁴Yoshuwa pamoza na ŵaIsraele wose ŵakarutilira kufuma ku msumba wa Lakishi ŵakaya kafika msumba wa Egiloni. Ŵakawuzinga msumba, na kurwa nawo nkhondo.

³⁵Ŵakawupoka msumba zuŵa lenelira, ŵakawuparanya na kukoma na lupanga waliyose mu msumba ura nga ndi umo ŵakachitira na msumba wa Lakishi.

³⁶Penepapo Yoshuwa na ŵaIsraele wose pamoza nayo ŵakarutilira kufuma ku msumba wa Egiloni ŵakaruta ku msumba wa Heburoni na kurwa nayo nkhondo.

³⁷Ŵakawupoka msumba wa Heburoni, ŵakawuparanya pamoza na mizi yakhe na lupanga, ŵakakoma karonga wakhe, na munthu wa waliyose uyo wakaŵa mwenemumo. Ŵakarekapo wamoyo nanga njumoza chara. Ŵakakoma chilichose icho chikaŵa mwenemumo nga ndi umo ŵakachitira ku msumba Egiloni.

³⁸Yoshuwa pamoza na ŵaIsraele wose ŵakawerako ndipo ŵakaruta ku msumba wa Debiri na kurwa nawo nkhondo.

³⁹Ŵakapoka msumba pamoza na karonga wakhe, na mizi yakhe, ndipo ŵakoma ŵanthu wose na lupanga. Munthu waliyose wakakomeka, kuti ŵakarekapo na yumoza wamoyo chara. Ŵakachita ku msumba wa Debiri na karonga wakhe nga ndi umo ŵakachitira ku msumba wa Libina na ku msumba wa Heburoni.

⁴⁰Ntheura Yoshuwa wakathereska charu chose cha mapiri, charu cha ku mwera, cha kusendemuka na cha mu vidika pamoza na ŵakaronga ŵawo wose. Wakakoma wose kwambula kurekapo na yumoza kuŵa wamoyo nga ndi umo FUMU, Chiuta wa Israele wakalangulira.

⁴¹Yoshuwa wakaŵathereska kufuma ku Kadeshi Baraneya kuya kafika ku msumba wa Gaza, kufuma ku chigaŵa chose cha Gosheni kuya kafika ku msumba wa Gibeyoni.

⁴²Yoshuwa wakathereska ŵakaronga wose aŵa na vyaru vyose ivi mu ulendo umoza pera chifukwa FUMU, Chiuta wa Israele wakaŵarweranga ŵaIsraele.

⁴³Pamanyuma Yoshuwa na ŵaIsraele wose ŵakawerera ku msasa wawo ku Giligala.