Read new_tumbuka_bible Yoshuwa 11 Bible Online

Yoshuwa 11 - new_tumbuka_bible bible

Yoshuwa 11

¹Para Yabini karonga wa msumba wa Hazoro wakapulika zakutonda kwa ŵaIsraele, wakatuma mazgu kwa Yobabu, karonga wa msumba wa Madoni, kwa ŵakaronga ŵa msumba wa Shimuroni na wa Akishafu.

²Wakatumaso mazgu kwa ŵakaronga ŵa ku mpoto kwa charu cha mapiri, mu charu cha Araba ku mwera kwa Kineroti, mu chidika, na mu Nafoti Doro ku manjiliro gha dazi,

³kwa ŵaKanani ku mafumiro gha dazi, na ku manjiliro ghakhe, ku ŵaAmori, ŵaHiti, ŵaPerezi, na ŵaYebusi mu charu mapiri, na ku ŵaHivi awo ŵakakharanga musi mu Phiri la Heremoni mu charu cha Mizipa.

⁴Ŵakaronga wose ŵakiza na ŵasilikari ŵawo wose kunozgekera nkhondo. Ŵakaŵa ŵanandi nga ndi muchenga wa mu mphepete mwa nyanja. Ŵakaŵaso na mahachi na magareta ghanandi chomene.

⁵Ŵakaronga wose aŵa ŵakawunganya ŵasilikari ŵawo wose pamoza. Ndipo ŵakiza na kuzenga misasa pamoza musi mwa maji gha mronga wa Meromu kuti ŵarwe na ŵaIsraele.

⁶FUMU yikati kwa Yoshuwa, “Ungopanga iwo, chifukwa na machero pa nyengo yakuŵa nga ndi yeneyiyi, nditi ndiŵapereke wose ku ŵaIsraele kuti ŵaŵakome. Mwamkudumula misipa ya mahachi na kocha magareta ghawo na moto.”

⁷Sono Yoshuwa pamoza na ŵasilikari ŵakhe wose ŵakiza mwa mabuchibuchi ku maji gha mronga wa Meromu na kurwa nawo.

⁸FUMU yikaŵapereka mu mawoko gha ŵaIsraele. Ŵakaŵathereska, na kuŵachimbizga nthowa yose mpaka ŵakaya kafika ku Sidoni Mukuru, ku msumba wa Misirefoti Mayimu, ku dambo la Mizipe cha ku mafumiro gha dazi mpaka kukaŵavye na yumoza wakakharako wamoyo.

⁹Yoshuwa wakachita ku ŵarwani ŵara nga ndi FUMU yikayowoyera. Wakadumula misipa ya mahachi ghawo na kocha magareta ghawo na moto.

¹⁰Pa nyengo yeneyira Yoshuwa wakawerera nyuma, na kupoka msumba wa Hazoro, ndipo wakakoma karonga wakhe na lupanga. Pakudanga msumba wa Hazoro ndiyo ukaŵa mutu wa maufumu ghose ghara.

¹¹Ŵakakoma na lupanga munthu waliyose uyo wakaŵa mu msumba mpaka ŵakamara petu. Kukaŵavye nanga njumoza uyo wakakharako wamoyo, ndipo ŵakocha msumba wa Hazoro na moto.

¹²Yoshuwa wakapoka misumba yose ya ŵakaronga ŵara, ndipo ŵakaronga ŵawo wose wakaŵakoma na lupanga mpaka ŵakamara petu, nga ndi umo Mozesi muteŵeti wa FUMU wakalangulira.

¹³Kweni ŵaIsraele kuti ŵakochapo nanga ngumoza wa misumba iyo ŵanthu ŵara ŵakazenga pa vibumira vya dongo chara, kuwuskapo msumba wa Hazoro uwo Yoshuwa wakochapo.

¹⁴Ndipo vyose ivyo ŵakaskogha mu misumba iyi pamoza na ng'ombe, ŵaIsraele ŵakajitorera kuŵa vyakuskogha vyawo. Kweni ŵakakoma na lupanga munthu waliyose, ŵakasuka ŵakaŵamara petu ndipo pakaŵavye nanja njumoza uyo ŵakakharapo wamoyo.

¹⁵Nga ndi umo FUMU yikalangulira Mozesi, muteŵeti wakhe, ndimo Mozesi nayo wakalangulira Yoshuwa, ndipo Yoshuwa wakachitanga. Kukaŵavye na kanthu kamoza ako Yoshuwa wakareka kuchita pa vyose ivyo FUMU yikalangula Mozesi.

¹⁶Ntheura Yoshuwa wakatora charu chose chira, charu cha mapiri, charu chose cha ku mwera, chigaŵa chose cha Gosheni, charu cha chidika, charu cha Araba, ndiposo na charu cha mapiri cha Israele na chidika chakhe wuwo,

¹⁷kufumira ku Phiri la Halaki ulo lukufika ku charu cha Edomu, mpaka ku Baala Gadi mu Dambo la Lebanoni musi mwa Phiri la Heremoni. Ndipo wakaŵakora ŵakaronga ŵawo wose, ŵakaŵatimba na kuŵakoma.

¹⁸Yoshuwa wakarwa nkhondo na ŵakaronga wose aŵa nyengo yitali.

¹⁹Pakaŵavye msumba uwo ukachita phangano la Mutende na ŵaIsraele, kweni ŵaHivi pera, awo ŵakakharanga mu msumba wa Gibeyoni. Misumba yose ŵakayipoka mu nkhondo.

²⁰Pakuti ndi FUMU iyo yikanonofya mitima yawo kuti ŵizenge na kurwa nkhondo na ŵaIsraele, mwakuti ŵamare nkhanira petu, ndipo kuti ŵaIsraele ŵareke kuŵa na lusungu na iwo, kweni kuti wa ŵamare wose nga ndi umo Mozesi wakalangulira.

²¹Pa nyengo yira Yoshuwa wakiza na kukoma ŵaAnaki mu ku charu cha mapiri, mu Heburoni, mu Debiri, mu Anabu, mu charu chose cha mapiri cha Yuda, na mu charu chose cha mapiri cha Israele. Yoshuwa wakaŵamara petu pamoza na misumba yawo.

²²Kukaŵavye na yumoza wa ŵaAnaki uyo wakakharako mu charu cha ŵaIsraele. Mu Gaza, mu Gati, na mu Ashidodi ndimo ŵakakharako ŵachoko waka.

²³Ntheura Yoshuwa wakatora charu chose nga ndi umo FUMU yikayowoyera kwa Mozesi. Ndipo Yoshuwa wakachipereka kuŵa chiharo ku ŵaIsraele kwakuyana na vigaŵa vya mafuko ghawo. Sono charu chikapumula ku nkhondo.