Read new_tumbuka_bible Yoshuwa 12 Bible Online

Yoshuwa 12 - new_tumbuka_bible bible

Yoshuwa 12

¹Sono aŵa ndi ŵakaronga ŵa vyaru ku sirya linyakhe la mronga wa Yorodani, ku mafumiro gha dazi, ŵeneawo ŵaIsraele ŵakaŵathereska. ŴaIsraele ŵakatora vyaru vyawo, kwamba ku dambo la Arinoni kuya kafika ku Phiri la Heremoni, na charu chose cha mronga wa Araba, ku mafumiro gha dazi:

²Sihoni, karonga wa ŵaAmori uyo wakakharanga mu msumba wa Heshiboni. Iyo wakawusa kwamba ku msumba wa Aroyere, mphepete mwa dambo la Arinoni, ndiposo kwamba pakati pa mronga kuya kafika ku mronga wa Yaboko uko ndi ku mphaka za ŵaAmoni. Charu ichi ndi hafu wa charu cha Gileyadi.

³Wakawusangaso kufuma ku msumba wa Araba kuya kafika ku Nyanja ya Kineroti[3] ku dera la ku mafumiro gha dazi, kuthyana na msumba wa Beti Yeshimoti, kufuma ku Nyanja ya Araba, iyo ndi Nyanja ya Muchere ku dera la ku mwera musi mwa Phiri la Pisiga.

⁴ŴaIsraele ŵakathereskaso Ogi, karonga wa chigaŵa cha Bashani. Iyo wakaŵa yumoza wa awo ŵakakharako wa ŵaRefayimu mweneuyo wakawusa mu msumba wa Ashitaroti na Edireyi.

⁵Karonga Ogi wakawusanga charu cha mapiri cha Heremoni, malo gha Saleka, na charu chose cha Bashani, kufuma ku mphaka za charu cha ŵaGeshuru na ŵaMaaka, na hafu wa Gileyadi kufikira ku mphaka ya Sihoni karonga wa msumba wa Heshiboni.

⁶Mozesi, muteŵeti wa FUMU pamoza na ŵaIsraele ŵakaŵathereska. Ndipo Mozesi muteŵeti wa FUMU wakapereka charu chawo ku fuko la Rubeni na la Gadi ndipo na ku hafu wa fuko la Manase kuŵa chiharo chawo.

⁷Aŵa ndiwo ŵakaronga ŵa charu ŵeneawo Yoshuwa pamoza na ŵaIsraele ŵakaŵathereska ku dera la ku mafumiro gha dazi, sirya linyakhe la mronga wa Yorodani, kwamba ku Baala Gadi mu dambo la Lebanoni kuya kafika ku Phiri la Halaki, kuthyana na Phiri la Edomu. Yoshuwa wakapereka charu chawo ku mafuko gha ŵaIsraele kuŵa chiharo chawo kwakuyana na mafuko ghawo umo ghakagaŵikira.

⁸Charu ichi chikaŵa cha mapiri, cha chidika, cha dambo la Araba, cha kusendemuka, cha mapopa na cha ku mwera. Mu charu ichi ndimo mukakharanga ŵaHiti, ŵaAmori, ŵaKanani, ŵaPerezi, ŵaHivi na ŵaYebusi.

⁹ŴaIsraele ŵakathereska ŵakaronga aŵa: karonga wa Yeriko, karonga wa Ayi, pafupi na Betele,

¹⁰karonga wa msumba wa Yerusalemu, karonga wa msumba wa Heburoni,

¹¹karonga wa msumba wa Yarimuti, karonga wa msumba wa Lakishi,

¹²karonga wa msumba wa Egiloni, karonga wa msumba wa Gezere,

¹³karonga wa msumba wa Debiri, karonga wa msumba wa Gedere,

¹⁴karonga wa msumba wa Horima, karonga wa msumba wa Aradi,

¹⁵karonga wa msumba wa Libina, karonga wa msumba wa Adulamu,

¹⁶karonga wa msumba wa Makeda, karonga wa msumba wa Betele,

¹⁷karonga wa msumba wa Tapuwa, karonga wa msumba wa Hefere,

¹⁸karonga wa msumba wa Afeki, karonga wa msumba wa Lasharoni,

¹⁹karonga wa msumba wa Madoni, karonga wa msumba wa Hazoro,

²⁰karonga wa msumba wa Shimuroni Meroni, karonga wa msumba wa Akishafu,

²¹karonga wa msumba wa Taanaki, karonga wa msumba wa Megido,

²²karonga wa msumba wa Kedeshi, karonga wa msumba wa Yokineyamu mu Karimele,

²³karonga wa ku Doro mu Nafoti Doro (mu mphepete mwa nyanja), karonga wa msumba wa Goyimu mu Galileya,

²⁴karonga wa msumba wa Tiriza. Ŵakaronga wose pamoza ŵakaŵa 31.