Read new_tumbuka_bible Yoshuwa 13 Bible Online

Yoshuwa 13 - new_tumbuka_bible bible

Yoshuwa 13

¹Sono Yoshuwa wakachekura, wa virimika vinandi. Ndipo FUMU yikati kwa iyo, “Iwe sono wachekura, ndipouli na virimika vinandi, kweni kwakhara charu chikuru icho chikwenera kuharika.

²Charu icho chakharako ndi ichi: Chigaŵa chose cha ŵaFilisiti, na charu chose cha ŵaGeshuru,

³(kufuma ku mronga wa Shihoro uwo uli ku dera la ku mafumiro gha dazi wa charu cha Eguputo, ku dera la ku mpoto ku mphaka za msumba wa Ekuroni, icho chikupimika kuŵa cha ŵaKanani. Kwenekura kuli ŵakaronga ŵankhonde ŵa ŵaFilisiti: wa msumba wa Gaza, wa Ashidodi, wa Ashikeloni, wa Gati, na wa Ekuroni), ndiposo na charu cha Avimu.

⁴Ku mwera, kuli charu chose cha ŵaKanani na Meyara icho ndi charu cha ŵaSidoni, kuya kafika ku Afeki, mphaka ya ŵaAmori,

⁵na charu cha ŵaGebala, na charu chose cha Lebanoni kurazga ku mafumiro gha dazi, kufuma ku Baala Gadi musi mwa Phiri la Heremoni kuya kafika pa chipata cha msumba wa Hamati,

⁶ŵanthu wose awo ŵakukhara mu charu cha mapiri, kufuma ku Lebanoni kuya kafika ku msumba wa Misirefoti Mayimu, na charu chose cha ŵaSidoni. Ŵanthu ŵa vyaru ivi, nditi ndiŵachimbizge panthazi pa ŵaIsraele, ndipo iwe ugaŵire ŵaIsraele charu chawo kuŵa chiharo chawo nga ndi umo ndakulangulira.

⁷Sono ugaŵire charu ichi ku mafuko ghankhonde na ghanayi na hafu wa fuko la Manase.”

⁸Mafuko gha Rubeni, Gadi, na hafu wa fuko linyakhe la Manase ŵakapokera kale chiharo chawo icho Mozesi muteŵeti wa FUMU wakaŵapa, sirya linyakhe la mronga wa Yorodani ku dera la ku mafumiro gha dazi.

⁹Charu chawo chikamba ku msumba wa Aroyere uwo uli mu mphepete mwa mronga wa Arinoni na msumba uwo uli pakatikati pa dambo na charu chose chakuwa cha Medeba kufikira ku msumba wa Diboni.

¹⁰Charu chawo chikarutilira mpaka ku misumba yose ya Sihoni, karonga wa ŵaAmori uyo wakawusanga mu msumba wa Heshiboni, kuya kafika ku mphaka ya ŵaAmoni.

¹¹Chikasazgirako chigaŵa cha Gileyadi na charu icho ŵaGeshuru na ŵaMaaka ŵakakharanga, Phiri lose la Heremoni, pamoza na chigaŵa chose cha Bashani mpaka ku msumba wa Saleka.

¹²Ndipo ku Bashani chikasazgirako charu chose cha Karonga Ogi, uyo wakawusanga mu msumba wa Ashitaroti na wa Edireyi. (Ogi wakaŵa yekha karonga wa ŵaRefayimu uyo wakakharako). Ŵanthu aŵa, Mozesi wakaŵathereska na kuŵachimbizgira kutali.

¹³Kweni ŵaIsraele kuti wakaŵachimbizgamo ŵaGeshuru na ŵaMaaka chara. Ntheura ŵaGeshuru na ŵaMaaka ŵachali kukhara mukati mu ŵaIsraele mpaka muhanya uno.

¹⁴Mozesi kuti wakapereka chiharo ku Fuko la Levi chara. Chiharo chawo chikaŵa sembe zakocha za FUMU, Chiuta wa Israele nga ndi umo Mozesi wakaŵaphalirira.

¹⁵Mozesi wakapereka chiharo ku ŵa fuko la Rubeni kwakuyana na mbumba zawo.

¹⁶Ntheura charu chawo chikamba ku msumba wa Aroyere uwo uli mu mphepete kwa mronga wa Arinoni na msumba uwo uli pakatikati pa dambo na charu chose chakuwa pafupi na msumba wa Medeba.

¹⁷Chikasazgirako Heshiboni, pamoza na misumba yakhe yose iyo yikaŵa pachanya pa malo ghakuthenga, ndiwo muzi wa Diboni, wa Bamoti Baala wa Beti Baala Meyoni,

¹⁸wa Yahazi, wa Kedemoti, wa Mefaati,

¹⁹wa Kiriyatayimu, wa Sibima, wa Zereti Shahara pa phiri la dambo,

²⁰wa Beti Peyoro, pa usendemuko wa Phiri la Pisiga, na Beti Yeshimoti.

²¹Chikasazgirako mizi yose iyo yikaŵa pachanya pa malo ghakuthenga, na ufumu wose wa Sihoni, karonga wa ŵaAmori, uyo wakawusanga mu msumba wa Heshiboni. Mozesi wakamuthereska Sihoni pamoza na ŵarongozgi awo ŵakawusanga charu cha Midiyani. Ŵarongozgi aŵa ŵakaŵa Evi, Rekemu, Zuru, Huru, na Reba. Ŵeneaŵa ŵakaŵa nga ndi nduna za Sihoni.

²²Yumoza wa awo wakakomekaso mu nkhondo yira na ŵaIsraele pamoza na ŵanthu ŵanyakhe wakaŵa Balaamu, mwana wa Beyoro uyo wakaŵa muroski.

²³Mphaka ya ŵa fuko la Rubeni ku dera la ku manjiliro gha dazi yikaŵa mronga wa Yorodani. Misumba na vikaya ku malo agha vikaperekeka ku ŵa fuko la Rubeni kuŵa chiharo chawo kwakuyana mbumba zawo.

²⁴Mozesi wakaperekaso chiharo ku ŵa fuko la Gadi kwakuyana na mbumba zawo.

²⁵Charu chawo chikasazgako msumba wa Yazere, misumba yose ya mu chigaŵa cha Gileyadi na hafu wa charu cha ŵaAmoni mpaka ku msumba wa Aroyere uwo uli ku dera la mafumiro gha dazi kwa msumba wa Raba.

²⁶Ndipo chikambaso ku msumba wa Heshiboni kuya kafika ku msumba wa Ramati Mizipe na wa Betonimu. Kufuma ku msumba wa Mahanayimu kuya kafika ku chigaŵa cha Debiri.

²⁷Mu dambo la Yorodani, ŵakapoka misumba ya Beti Haramu, Beti Nimura, Sukoti na Zafoni, na chigaŵa icho chikakharako cha ufumu wa Sihoni, karonga wa msumba wa Heshiboni. Mphaka yakhe ku dera la ku zambwe yikaŵa mronga wa Yorodani kuya kafika ku Nyanja ya Kinereti, ku vuma, sirya linyakhe la mronga wa Yorodani.

²⁸Misumba na vikaya vyakhe ivi ndivyo vikaperekeka ku ŵa fuko la Gadi kuŵa viharo kwakuyana na mbumba zawo.

²⁹Mozesi wakapereka charu ku hafu wa fuko la Manase kuŵa chiharo chawo. Chiharo ichi chikaperekeka ku hafu wa fuko la Manase kwakuyana na mbumba zawo.

³⁰Charu chawo chikambira ku Mahanayimu, kusazgirapo chigaŵa chose cha Bashani, ufumu wose wa Ogi, karonga wa Bashani, na mizi yose ya Yayiri, iyo yikaŵa mu Bashani, na misumba 60.

³¹Charu chawo chikasazgirako hafu wa chigaŵa cha Gileyadi, pamoza na msumba wa Ashitaroti, na wa Edireyi, (misumba ya mu ufumu wa Ogi mu chigaŵa cha Bashani). Misumba iyi yikaperekeka ku ŵana ŵa Makiri, mwana wa Manase, kuŵa chiharo cha hafu wa ŵana ŵa Makiri kwakuyana na mbumba zawo.

³²Ivi ndivyo vyaru ivyo Mozesi wakagaŵa kuŵa chiharo mu madambo ya charu cha Mowabu, sirya linyakhe la mronga wa Yorodani ku mafumiro gha dazi kwa msumba wa Yeriko.

³³Kweni fuko la Levi, Mozesi kuti walipa chiharo chara. FUMU, Chiuta wa Israele iyomwene ndiyo chiharo chawo, nga ndi umo Mozesi wakaŵaphalirira.