Read new_tumbuka_bible Yoshuwa 14 Bible Online

Yoshuwa 14 - new_tumbuka_bible bible

Yoshuwa 14

¹Ivi ndi vyaru ivyo ŵaIsraele ŵakapokera nga ndi chiharo chawo mu charu cha Kanani, vyaru ivyo musofi Eleyazara, Yoshuwa mwana wa Nuni, na ŵarongozgi ŵa mbumba za mafuko gha Israele wakaŵagaŵira.

²Viharo vyawo vikapika pakuchita mphenduzgo, nga ndi umo FUMU yikalangulira Mozesi kugaŵira mafuko ghankhonde na ghanayi na hafu.

³Mozesi wakapereka vyaru ku mafuko ghaŵiri na hafu ku sirya linyakhe la mronga wa Yorodani, kuŵa viharo vyawo, kweni ŵa fuko la Levi awo ŵakaŵa mukati mwawo, kuti wakaŵapa charu chara.

⁴Pakuti ŵana ŵa Yosefe ŵakaŵa mafuko ghaŵiri, Manase na Efurayimu. Ndipo ŵa fuko la Levi, Mozesi kuti wakaŵapako charu kuŵa chiharo chawo chara, kweni misumba pera kuti ŵakharengemo na charu chakuliskako viŵeto vyawo.

⁵Ntheura ŵaIsraele ŵakagaŵana charu kwakuyana na umo FUMU yikalangulira Mozesi.

⁶Sono ŵaYuda ŵakiza kwa Yoshuwa mu Giligala, ndipo Kalebu mwana wa Yefune wa fuko la Kenizi wakati kwa iyo, “Imwe mukumanya icho FUMU yikayowoya kwa Mozesi, munthu wa Chiuta mu Kadeshi Baraneya chifukwa cha imwe na ine.

⁷Nkhaŵa mwana wa virimika 40 apo Mozesi, muteŵeti wa FUMU, wakandituma mu Kadeshi Baraneya kuya kapachira charu. Ndipo nkhiza na mazgu gha umo vinthu vikaŵira kwenekura.

⁸Kweni ŵabali ŵane awo wakaruta nane ŵakatenthemeska ŵanthu mwakuti mitima yawo yikasongonoka. Ndipouli ine nkhagomezga FUMU, Chiuta wane na mtima wose.

⁹Ntheura zuŵa lenelira Mozesi wakarapa wakati, ‘Nadi, charu icho malundi ghako ghakandapo chiti chiŵenge chiharo chako na ŵana ŵako kwa muyirayira, pakuti wagomezga FUMU, Chiuta wane na mtima wako wose.

¹⁰Sono wonani nga ndi umo FUMU yikayowoyera yandisunga ine wamoyo na virimika 45 kufuma pa nyengo iyo yikayowoyera ichi kwa Mozesi, apo ŵaIsraele ŵakendendekanga mu mapopa. Muhanya uno ine ndili na virimika 85!

¹¹Ndipouli ine ndichali na nkhongono muhanya uno nga mpha nyengo iyo Mozesi wakanditumiranga. Ndili wankhongono kuti ndingaruta kuya karwa nkhondo sono nga ndi pa nyengo yeneyira.

¹²Sono ndipani charu cha mapiri icho FUMU yikapangana kundipa ine zuŵa lira. Imwe mwekha mukapulika kuti ŵaAnaki ŵakaŵa mwenemura ndipo misumba yawo yikaŵa yikuru na ya malinga, kweni pakovwirika na FUMU nditi ndiŵachimbizgemo nga ndi umo FUMU yili kuyowoyera.’ ”

¹³Penepapo Yoshuwa wakamutumbika Kalebu, mwana wa Yefune ndipo wakamupa msumba wa Heburoni kuti chiŵe chiharo chakhe.

¹⁴Ntheura msumba wa Heburoni uli kuŵa chiharo cha Kalebu mwana wa Yefune, wa fuko la Kenizi kuti chiŵe chiharo chakhe mpaka muhanya uno chifukwa wakagomezga FUMU, Chiuta wa Israele na mtima wakhe wose.

¹⁵Pambere msumba wa Heburoni undachemeke na zina leneili, ukachemekanga na zina la Kiriyati Ariba. Ariba wakaŵa munthu wakumanyikwa chomene mukati mu ŵaAnaki. Pamanyuma charu chikapumula ku zinkhondo kufuma nyengo yeneyira.