Read new_tumbuka_bible Yoshuwa 15 Bible Online

Yoshuwa 15 - new_tumbuka_bible bible

Yoshuwa 15

¹Charu icho chikaperekeka ku fuko la Yuda, mbumba na mbumba pakuchita mphenduzgo chikaya kafika ku mwera ku mphaka ya charu cha Edomu, mpaka ku mapopa gha Zini, ku mwera kutali nkhanira.

²Mphaka yawo ya ku mwera yikenda kufuma ku umaliro wa Nyanja ya Muchere, ku phota la dera la ku mwera.

³Yikafuma kura kurazga cha ku mwera kwa chikwera cha Akirabimu, mu mphepete mwa mapopa gha Zini. Yikarutilira kukweraso cha ku mwera kwa msumba wa Kadeshi Baraneya, kujumphilira msumba wa Hezironi, mpaka ku msumba wa Adara, na kuzgoka kurazga ku Karika.

⁴Yikarutilira mu mphepete mwa Azimoni, ndipo yikenda pafupi na mronga wa Eguputo, na kumalira ku Nyanja ya Meditereniya. Iyi ndiyo yiŵenge, mphaka ya fuko la Yuda na ku mwera.

⁵Mphaka ya ku mafumiro gha dazi ndi Nyanja ya Muchere kuya kafika apo ukuthilira mronga wa Yorodani. Ndipo mphaka ya ku mpoto yikafumira ku phota ya nyanja kuya kafika apo ukuthilira mronga wa Yorodani,

⁶yikarutilira, kukwera kuya ku Beti Hogila, mpaka ku mpoto wa Beti Araba, ndipo mphaka yikarutilira kukwerera ku libwe la Bohani, mwana wa Rubeni.

⁷Mphaka yikakwera mpaka ku msumba wa Debiri kufumira ku Dambo la Akori. Yikarutilira ku dera la ku mpoto, na kuya kazgokera ku Giligala, kuthyana na chikwera cha Adumimu, icho chili ku dera la ku mwera kwa dambo. Yikenda mu mphepete mwa maji gha Eni Shemeshi, ndipo yikamalira pa Eni Rogele.

⁸Mphaka yikakwera na Dambo la Hinomu, ku dera la ku mwera kwa msumba wa Yebusi (uwo ndi Yerusalemu). Yikakwera mpaka yikaya kafika pachanya pa phiri ilo lukuthyana na Dambo la Hinomu, ku dera la ku manjiliro gha dazi, ilo liri ku umaliro wa dambo la Refayimu ku dera la ku mpoto.

⁹Mphaka yira yikarutilira kufuma pachanya pa phiri kuya kafika pa mbwiwi za maji gha Nefutowa. Yikakwera kufuma para kuya kafika ku misumba ya Phiri la Efuroni, ndipo yikazgomba kurazga ku msumba wa Baala (uwo ndi Kiriyati Yeyarimu).

¹⁰Mphaka yikazgomba kurazga ku manjiliro gha dazi kufuma ku msumba wa Baala kuya ku Phiri la Edomu, ndipo yikajumpha mu mphepete mwa Phiri la Yeyarimu (ulo ndi Kesaloni) ku dera la ku mpoto. Yikarutilira kuya ku Beti Shemeshi, na kuya kajumpha pafupi na Timuna.

¹¹Mphaka yira yikarutilira kufuma mu mphepete mwa phiri ku dera la ku mpoto kwa Ekuroni, ndipo yikazgomba kurazga ku Shikeroni na kujumpha Phiri la Baala mpaka yikaya kafika ku msumba wa Yabineyele. Ndipo mphaka yira yikamalira ku nyanja.

¹²Mphaka ya ku manjiliro gha dazi yikaŵa Nyanja Yikuru, na charu cha mu mphepete mwakhe. Iyi ndiyo yikaŵa mphaka ya ŵaYuda zingirizge kwakuyana na mbumba zawo.

¹³Kwakuyana na languro la FUMU, Yoshuwa wakapereka msumba wa Kiriyati Ariba, uwo ndi Heburoni, kwa Kalebu, mwana wa Yefune kufuma mu chiharo cha ŵana ŵa fuko la Yuda. (Ariba wakaŵa wiske wa Anaki.)

¹⁴Sono Kalebu wakachimbizgamo ŵana ŵa Anaki ŵatatu, Sheshayi, Ahimani na Talimayi. Aŵa ŵakaŵa ŵa mphapu ya Anaki.

¹⁵Kufuma para wakaruta kuya karwa na ŵanthu awo ŵakakharanga mu msumba wa Debiri, pakudanga ukachemekanga Kiriyati Sefere.

¹⁶Kalebu wakati, “Nditi ndipereke mwana wane Akisa kuŵa muwoli wa uyo wati warute kuya karwa na kutora msumba wa Kiriyati Sefere.”

¹⁷Sono Otiniyele, mwana wa Kenazi, munung'una na Kalebu, wakatora msumba wa Sefere. Ntheura Kalebu wakapereka Akisa mwana wakhe kuŵa muwoli wa Otiniyele.

¹⁸Pa zuŵa ilo ŵakatorerananga, Otiniyele wakamuŵeyerera Akisa kuti warombeko charu chakulimako ku ŵawiske. Sono wakati wakhira pa mbunda yakhe, Kalebu wakamufumba wakati, “Kasi ukukhumba vichi?”

¹⁹Akisa wakazgoka wakati, “Mundichitire chawanangwa, pakuti muli kundipa charu cha ku mwera, mundipeso mbwiwi za maji.” Penepapo Kalebu wakamupa mbwiwi za maji zakunena na za kusika.

²⁰Sono ichi ndicho chikaŵa chiharo cha fuko la Yuda kwakuyana na mbumba zawo.

²¹Misumba iyo yikaŵa ya fuko la ŵaYuda ku dera la ku mwera chomene pafupi na mphaka ya charu cha Edomu, yikaŵa iyi: Kabizeyele, Edere, Yaguru,

²²Kina, Dimona, Adada,

²³Kedeshi, Hazoro, Itinani,

²⁴Zifu, Telemu, Beyaloti,

²⁵Hazoro Hadata, Keriyoti Hezironi (uwo ndi Hezoro),

²⁶Amamu, Shema, Molada,

²⁷Hazara Gada, Heshimoni, Beti Peleti,

²⁸Hazara Shuwala, Beyeresheba, Biziyotiya,

²⁹Baala, Iyimu, Ezemu,

³⁰Elitoladi, Kesilu, Horima,

³¹Zikilagi, Madimana, Sanisana,

³²Lebayoti, Shilihimu, Ayini na Rimoni. Yose yikaŵa misumba 29 pamoza na vikaya vyawo.

³³Mu chidika mukaŵa misumba iyi: Eshitawolo, Zora, Ashina,

³⁴Zanowa, Eni Ganimu, Tapuwa, Enamu,

³⁵Yarimuti, Adulamu, Soko, Azeka,

³⁶Shaarayimu, Aditayimu, Gedera, na Gederotayimu. Yose yikaŵa misumba 14 pamoza na vikaya vyawo.

³⁷Mukaŵaso Zenani, Hadasha, Migidala Gadi,

³⁸Dileyani, Mizipe, Yokiteyele,

³⁹Lakishi, Bozikati, Egiloni,

⁴⁰Kaboni, Lamamu, Kitilishi,

⁴¹Gederoti, Betidagoni, Naama, na Makeda. Yose yikaŵa misumba 16 pamoza na vikaya vyawo.

⁴²Mukaŵaso Libina, Etere, Ashani,

⁴³Yifuta, Ashina, Nezibu,

⁴⁴Keyila, Akizibu na Maresha. Yose yikaŵa misumba yinkhonde na yinayi pamoza na vikaya vyawo.

⁴⁵Mukaŵaso Ekuroni na mizi yakhe na vikaya vyawo,

⁴⁶na misumba yose na vikaya vya pafupi na Ashidodi, kufuma ku Ekuroni kuya ku Nyanja ya Meditereniya.

⁴⁷Mukaŵaso Ashidodi na Gaza, pamoza na mizi na vikaya vyawo ivyo vikaya kafika ku mronga wa Eguputo, na mu mphepete mwa Nyanja Yikuru.

⁴⁸Mu charu cha mapiri mukaŵa misumba iyi: Shamiri, Yatiri, Soko,

⁴⁹Dana, Kiriyati Sana (uwo ndi Debiri),

⁵⁰Anabu, Eshitemo, Animu,

⁵¹Gosheni, Holoni na Gilo. Yose yikaŵa misumba 11 pamoza na mizi na vikaya vyawo.

⁵²Mukaŵaso Arabu, Ruma, Eshani,

⁵³Yanimu, Beti Tapuwa, Afeka,

⁵⁴Humuta, Kiriyati Ariba (uwo ndi Heburoni), na Ziyoro. Yose yikaŵa misumba yinkhonde na yinayi pamoza na mizi na vikaya vyawo.

⁵⁵Mukaŵaso Mawoni, Karimele, Zifu, Yuta,

⁵⁶Yezireyele, Yokideyamu, Zanowa,

⁵⁷Kayini, Gibeya na Timuna. Yose yikaŵa misumba khumi pamoza na mizi na vikaya vyawo.

⁵⁸Mukaŵaso Halihulu, Betizuru, Gedoro,

⁵⁹Maarati, Beti Anoti, na Elitekoni. Yose yikaŵa misumba 6 pamoza na mizi na vikaya vyakhe.

⁶⁰Mukaŵaso Kiriyati Baala (uwo ndi Kiriyati Yeyarimu) na Raba. Yose yikaŵa misumba yiŵiri na mizi na vikaya vyakhe.

⁶¹Mu mapopa mukaŵa Beti Araba, Midini, Sekaka,

⁶²Nibishani, msumba wa Muchere na Engedi. Yose yikaŵa misumba yinkhonde na umoza, pamoza na vikaya vyakhe vyakuzingirizga.

⁶³Kweni ŵaYuda wakatondeka kuchimbizgamo ŵaYebusi awo ŵakakharanga mu Yerusalemu. ŴaYebusi ŵachali kukhara pamoza na ŵaYuda mpaka muhanya uno.