Read new_tumbuka_bible Yoshuwa 16 Bible Online

Yoshuwa 16 - new_tumbuka_bible bible

Yoshuwa 16

¹Charu icho chikaperekeka ku ŵa mphapu ya Yosefe chikamba ku mronga wa Yorodani ku dera la ku mafumiro gha dazi kwa maji gha Yeriko mpaka ku mapopa. Mphaka yikakwera kufuma ku Yeriko na kuya kafika mu charu cha mapiri mpaka ku Betele.

²Yikafuma ku Betele yikaya kafika ku msumba wa Luzi, ndipo yikajumphilira mpaka yikaya kafika ku msumba wa Ataroti, uko kukakharanga ŵaAriki.

³Mphaka yikakhilira ku dera la manjiliro gha dazi mpaka yikaya kafika uko ŵakakharanga ŵaYafule, ku mphaka ya Beti Horoni wa kusika, na ku Gezere, ndipo yikamalira ku nyanja.

⁴Ntheura ŵa mphapu ya Yosefe, Manase na Efurayimu, ŵakapokera chiharo chawo.

⁵Charu icho chikaperekeka kwa Efurayimu kwakuyana na mbumba zawo chikaŵa ntheura: Mphaka ya chiharo chawo ku dera la ku mafumiro gha dazi yikamba ku msumba wa Ataroti Adara mpaka kunena kwa msumba wa Beti Horoni,

⁶yikarutilira mpaka ku nyanja. Ku mpoto yikamba ku Mikimetati, ndipo yikazgomba kurazga ku mafumiro gha dazi kuya ku Taanati Shilo, na kujumphilira kuya kafika ku Yanowa ku dera la ku mafumiro gha dazi.

⁷Ndipo yikarutilira kufuma ku Yanowa kuya ku Ataroti na Naara ndipo yikiza kafika pa msumba wa Yeriko na kufumira pa mronga wa Yorodani.

⁸Kufuma pa msumba wa Tapuwa, mphaka yikurazga ku manjiliro gha dazi kuya kafika ku kamronga ka Kana na kumalira mu nyanja. Ichi ndicho chikaŵa chiharo cha fuko la Efurayimu kwakuyana na mbumba zawo.

⁹Charu chawo chikasazgirako mizi na vikaya vyawo vyose vyeneivyo vikaŵa vya ŵaEfurayimu, kweni vikaŵa mukati mu chiharo cha ŵana ŵa fuko la Manase.

¹⁰Kweni ŵaEfurayimu kuti ŵakaŵachimbizgamo ŵaKanani awo ŵakakharanga mu Gezere chara. Mpaka muhanya uno, ŵaKanani ŵachali kukhara mukati mu ŵaEfurayimu, ndipo ŵali kuzgoka ŵazga kuŵateŵetera nchito yakuchichizga.