Read new_tumbuka_bible Yoshuwa 17 Bible Online

Yoshuwa 17 - new_tumbuka_bible bible

Yoshuwa 17

¹Charu chinyakhe chikaperekeka fuko la Manase, pakuti iyo wakaŵa mwana wa uŵere wa Yosefe. Makiri wakaŵa mwana wa uŵere wa Manase ndiposo wiske wa Gileyadi. Iyo wakapokera chigaŵa cha Gileyadi na cha Bashani kuŵa chiharo chakhe pakuti wakaŵa chinkhara cha nkhondo.

²Mbumba zinyakhe za fuko la Manase izo zikakharako, na kupokera charu kwakuyana na mbumba zawo zikaŵa izi: mbumba ya Abiyezere, ya Heleki, ya Asiriyele, ya Shekemu, ya Hefere na ya Shemida. Aŵa ŵakaŵa ŵanarume ŵa mphapu ya Manase mwana wa Yosefe kwakuyana na mbumba zawo.

³Sono pakaŵa Zelofehadi, mwana wa Hefere, mwana wa Gileyadi, mwana wa Makiri, mwana wa Manase, mweneuyo wakaŵavye ŵana ŵanarume, kweni ŵanakazi pera. Mazina ghawo wakaŵa: Mala, Nowa, Hogila, Milika, na Tiriza.

⁴Ŵana aŵa ŵakiza panthazi pa musofi Eleyazara, na pa Yoshuwa mwana wa Nuni, na pa ŵarongozgi, ndipo ŵakati kwa iwo, “FUMU yikalangula Mozesi kuti watipe chiharo mukati mu ŵabali ŵithu.” Penepapo Yoshuwa ŵakaŵapa chiharo pamoza na ŵabali ŵawo kwakuyana na languro la FUMU.

⁵Ndicho chifukwa vigaŵa khumi vikaperekeka kwa Manase pa dera pa charu cha ku Gileyadi na Bashani sirya linyakhe la mronga wa Yorodani,

⁶pakuti ŵana ŵanakazi ŵa fuko la Manase ŵakapokera chiharo mukati mu ŵana ŵanarume. Charu cha Gileyadi chikaŵa chiharo cha awo ŵakakharako mwa ŵazukuru ŵa Manase.

⁷Charu cha Manase chikamba ku Ashere mpaka ku Mikimetati, ku mafumiro gha dazi gha msumba wa Shekemu. Mphaka yikakhilira ku dera la ku mwera yikaya kafika ku ŵanthu awo ŵakakharanga ku Eni Tapuwa.

⁸Charu cha Tapuwa chikaŵa cha Manase, kweni muzi wa Tapuwa ku mphaka na Manase kukaŵa kwa ŵana ŵa Efurayimu.

⁹Mphaka yikakhilira ku mwera kuya ku mronga wa Kana. Misumba ya Efurayimu yikaŵa mukati mwa misumba ya Manase. Sono mphaka ya Manase yikaŵa ku mpoto kwa mronga, ndipo yikamalira ku nyanja ya Meditereniya.

¹⁰Ku dera la ku mwera, charu chikaŵa cha ŵaEfurayimu. Ndipo ku dera la ku mpoto chikaŵa cha ŵaManase. Charu cha Manase chikafika ku nyanja ndipo chikapakana na Ashere ku mpoto ndipo Isakara ku mafumiro gha dazi.

¹¹Mukati mu charu cha Isakara na cha Ashere, Manase wakaŵa na misumba na vikaya ivi: Beti Shani pamoza na vikaya vyakhe, Ibileyamu pamoza na vikaya vyakhe, Doro (uwo uli mu mphepete mwa nyanja) pamoza na vikaya vyakhe, Endoro pamoza na vikaya vyakhe, Taanaki pamoza na vikaya vyakhe, na ŵanthu awo ŵakukhara ku Megido pamoza navikaya vyawo. Msumba wa chitatu ukaŵa wa Nafoti.

¹²Kweni ŵa fuko la Manase kuti ŵakaŵachimbizgamo ŵaKanani awo ŵakakharanga mu misumba iyi chara. Ntheura ŵaKanani ŵakarutilira kukhara mu chigaŵa chenechira.

¹³Ndipouli para ŵaIsraele ŵakati ŵaŵa ŵankhongono, ŵakaŵatora ŵaKanani kuti ŵachitenge mlimo wakuchichizga, kweni kuti ŵakaŵachimbizgamo nkhanira chara.

¹⁴Ndipo ŵa fuko la Yosefe ŵakiza kwa Yoshuwa ŵakati, “Kasi nchifukwa uli muli kutipa phande limoza pera la charu kuŵa chiharo chithu? Ise tili ŵanandi ndipo FUMU yili kutitumbika chomene.”

¹⁵Yoshuwa wakazgora wakati, “Usange muli ŵanandi, ndipo usange charu cha mapiri cha Efurayimu nchichoko chomene kwa imwe, rutani ku thengere mukajisengulire mwekha malo mukati mu ŵaPerezi na ŵaRefayimu.”

¹⁶Ŵa fuko la Yosefe ŵakazgora ŵakati, “Charu cha mapiri kuti chikutikwana chara. Ndipouli ŵaKanani wose awo ŵakukhara mu chidika, na awo ŵakukhara mu msumba wa Beti Shani, na mu vikaya vyakhe vyakuzingirizga, ndiposo na awo ŵakukhara mu Dambo la Yezireyele, ŵali na magareta gha visulo.”

¹⁷Kweni Yoshuwa wakati ku ŵa mbumba ya Yosefe, ŵaEfurayimu na ŵaManase, “Imwe muli ŵanandi nadi, ndipo muli ŵankhongono chomene, kuti mungaŵa na charu chimoza pera chara,

¹⁸kweni charu cha mapiri nacho chiŵeso chinu. Pakuti nangauli ndi thengere, muti musenguremo na kuchipoka mpaka mukafike ku mphaka za kutali. Imwe muti muŵachimbizgemo ŵaKanani, nangauli ŵali na magareta gha visulo ndiposo mbankhongono.”