Read new_tumbuka_bible Yoshuwa 18 Bible Online

Yoshuwa 18 - new_tumbuka_bible bible

Yoshuwa 18

¹Mpingo wose wa ŵaIsraele ukawungana ku Shilo, ndipo penepara ŵakajintha Chihema Chakukumaniranamo. Pa nyengo iyi charu chikaŵa pasi pa muwuso wawo.

²Kweni kukaŵako mafuko ghanyakhe ghankhonde na ghaŵiri gha ŵaIsraele gheneagho ghakaŵa ghandapokere chiharo chawo.

³Sono Yoshuwa wakati ku ŵaIsraele, “Kasi muti mulindizgenge mpaka pauli kuti mwambe kukatora charu icho FUMU yili kumupani kuŵa chiharo chinu?”

⁴Sorani ŵanthu ŵatatu kufuma mu fuko lirilose, ine nditi ndiŵatume kuti ŵarute ŵakendere charu na kulemba umo chiliri. Iwo ŵati ŵaphare umo chingagaŵikira ku fuko lirilose. Pamanyuma ŵati ŵawerereso kwa ine.

⁵Iwo ŵati ŵachigaŵe charu mu vigaŵa vinkhonde na viŵiri. Yuda wakhare ntheura mu charu chakhe cha ku mwera. Ndipo mbumba ya Yosefe yikhare mu charu chakhe cha ku mpoto.

⁶Mukachigaŵe charu mu vigaŵa vinkhonde na viŵiri ndipo mukize kwa ine na umo mwachigaŵira charu. Ine ndizamkumuchitirani mphenduzgo ya magaŵiro ghakhe panthazi pa FUMU, Chiuta withu.

⁷ŴaLevi ŵalije chigaŵa mukati mwinu, pakuti uteŵeti wa usofi wa FUMU ndicho chiharo chawo. Gadi, na Rubeni na hafu wa fuko la Manase, ŵakapokera kale chiharo chawo ku sirya linyakhe la mronga wa Yorodani ku dera ku mafumiro gha dazi. Mozesi muteŵeti wa FUMU ndiyo wakaŵapa.

⁸Ntheura ŵanthu ŵara ŵakawuka na kuruta. Yoshuwa wakaŵalangula wakati, “Rutani mukendere na kulemba mwakukonkhoska umo charu chiliri. Pamanyuma mukawerere kuno kwa ine, ndipo ine ndizamkumuchitirani mphenduzgo panthazi pa FUMU kuno ku Shilo.”

⁹Ntheura ŵanthu ŵara ŵakaruta ndipo ŵakendera charu uku na uku. Iwo ŵakalemba mwakukonkhoska mu buku umo charu chikaŵira. Ŵakagaŵa charu chira mu vigaŵa vinkhonde na viŵiri, izi na mizi. Pamanyuma ŵakawerera kwa Yoshuwa ku msasa wa ku Shilo.

¹⁰Yoshuwa wakaŵachitira mphenduzgo ku Shilo panthazi pa FUMU. Penepapo wakaŵagaŵira charu ŵaIsraele, waliyose chigaŵa chakhe na chakhe kwakuyana na mbumba zawo.

¹¹Mphenduzgo yikachitikira ŵa fuko la Benjamini ndipo charu icho chikaperekeka kwakuyana na mbumba zawo chawo chikaŵa pakati pa ŵa fuko la Yuda na la Yosefe.

¹²Mphaka yawo ku dera ku mpoto yikamba ku mronga wa Yorodani, ndipo yikakwerera mu mphepete mwa msumba wa Yeriko ku dera la ku mpoto. Yikarutilira kukwera mu charu cha mapiri ku dera la ku mafumiro gha dazi mpaka yikamalira ku mapopa pafupi na msumba wa Beti Aveni.

¹³Kufuma kura, mphaka yikarutilira ku dera la ku mwera kurazga ku nthowa yakuya ku msumba wa Luzi, (malo agha ghakuchemekaso Betele). Yikakhilira ku msumba wa Ataroti Adara, pachanya pa phiri la ku mwera kwa msumba wa Beti Horoni kusika.

¹⁴Mphaka yikuzgomba kurazgira ku dera la ku chingodya cha ku mwera, kufuma ku charu cha mapiri pafupi na msumba wa Beti Horoni, kuya kafika ku msumba wa Kiriyati Baala (uwo ukuchemekaso Kiriyati Yeyarimu). Msumba uwu ngwa fuko la Yuda. Iyi ndiyo yikaŵa mphaka ku dera la ku manjiliro gha dazi.

¹⁵Mphaka ya ku dera la ku mwera yikamba ku umaliro wa msumba wa Kiriyati Yeyarimu, ku dera la ku manjiliro gha dazi ndipo yikiza kafika ku mbwiwi za maji gha Nefutowa.

¹⁶Mphaka yikakhilira mu mphepete mwa phiri kuthyana na Dambo la Hinomu, ku dera la ku mpoto kwa Dambo la Refayimu. Yikarutilira kukhira Dambo la Hinomu na kuya ku mwera kwa charu cha Yebusi, mpaka yikafika ku Eni Rogele.

¹⁷Mphaka yikazgomba kurazga ku mpoto kuya ku Eni Shemeshi, mpaka yikajumphilira kuya ku Geliloti kuthyana na chikwera cha Adumimu. Yikukhilira ku libwe la Bohani, mwana wa Rubeni.

¹⁸Mphaka yikarutilira kurazga ku dera la ku mpoto kwa Beti Araba, ndipo yikakhira mpaka yikaya kafika ku Dambo la Araba.

¹⁹Mphaka yikarutilira kuya ku dera la ku mpoto kwa Beti Hogila, ndipo yikuya kamalira ku dera la ku mpoto kwa phota gha Nyanja ya Muchere, ku mwera kwa mronga wa Yorodani. Iyi ndiyo yikaŵa mphaka ya ku mwera.

²⁰Mronga wa Yorodani ndiyo yikaŵa mphaka ku dera la ku mafumiro gha dazi. Izi ndizo zikaŵa mphaka za chiharo cha fuko la Benjamini kwakuyana na mbumba zawo zingirizge.

²¹Misumba iyo yikaŵa ya fuko la Benjamini kwakuyana na mbumba zawo ndi iyi: Yeriko, Beti Hogila, Emeki Kezizi,

²²Beti Araba, Zemarayimu, Betele,

²³Avimu, Para, Ofura,

²⁴Kefara Amoni, Ofini, na Geba. Misumba yose yikawa 12 pamoza na vikaya vyawo.

²⁵Misumba yinyakhe yikaŵa Gibeyoni, Rama, Beyeroti,

²⁶Mizipe, Kefira, Moza,

²⁷Rekemu, Iripeyele, Tarala,

²⁸Zela, Hayelefu na Yebusi panji Yerusalemu, Gibeya, na Kiriyati Yeyarimu. Yose yikaŵa misumba 14 na pamoza na vikaya vyawo. Ichi ndicho chikaŵa chiharo cha fuko la Benjamini kwakuyana na mbumba zawo.