Read new_tumbuka_bible Yoshuwa 2 Bible Online

Yoshuwa 2 - new_tumbuka_bible bible

Yoshuwa 2

¹Yoshuwa mwana wa Nuni wakatuma ŵanthu ŵaŵiri ku Shitimu kuti ŵarute ŵakapache charu mu udesi, wakati, “Rutani mukendere charu chose, chomenechomene Yeriko.” Ntheura ŵakaruta ndipo ŵakiza kanjira mu nyumba ya mwanakazi uyo wakaŵa hule zina lakhe Rahabu, ndipo ŵakagona mwenemura.

²Karonga wa msumba wa Yeriko wakaphalirika kuti, “Wonani! Ŵanthu ŵanji ŵiza kufuma ku Israele mu usiku uno kuti ŵapache charu.”

³Penepapo karonga wa msumba wa Yeriko wakatuma ŵanthu kwa Rahabu na mazgu ghakuti, “Ŵanthu awo ŵiza kwa iwe na kunjira mu nyumba yako, wize nawo kwa ine pakuti ŵiza kuti ŵapache charu chose.”

⁴Kweni mwanakazi yura wakaŵatora ŵanthu ŵaŵiri ŵara na kuŵabisa, ndipo wakati kwa iwo, “Nadi ŵanthu ŵangwiza, kweni uko ŵakafuma, ine nkhamanya chara.

⁵Ndipo kukati kwafipa, pa nyengo ya kujalira vipata vya msumba, ŵanthu ŵara ŵangufuma na kuruta. Uko ŵaruta, ine nkhumanyako chara. Muŵaronde luŵiro, mwamkuŵasanga.

⁶Kweni mwanakazi yura wakakwera nawo ku mutenje wa nyumba yakhe na kuŵabisa kusi kwa mulu wa thonje lambula kufumyamo njere uwo wakatandika makora ghene pachanya pa mutenje.”

⁷Ntheura nthumi za karonga zira zikarondezga mphachi zira ku nthowa yakuya ku mronga wa Yorodani mpaka zikaya kafika ku majambuko. Ndipo nthumi za karonga zikati zafuma waka, chipata chikajarika.

⁸Pambere mphachi zira zikaŵa zindagone, Rahabu wakakwera ku mutenje uko zikaŵa mphachi,

⁹ndipo wakati kwa izo, “Nkhumanya kuti FUMU yapereka charu ichi kwa imwe ndipo wofi wa imwe watiwira, na kuti ŵanthu wose awo wakukhara mu charu ichi ŵakusongonoka na wofi chifukwa cha imwe.

¹⁰Pakuti tili kupulika umo FUMU yikomizgira Nyanja ya Matete panthazi pinu para imwe mukafumanga mu charu cha Eguputo ndiposo na ivyo mukachita kwa Sihoni na Ogi ŵakaronga ŵaŵiri ŵa ŵaAmori awo ŵakaŵa ku sirya linyakhe la mronga wa Yorodani ŵeneawo mukaŵamara petu.

¹¹Ndipo tikati tapulika vinthu ivi, mitima yithu yikasongonoka ndipo pakaŵavye na yumoza wachikanga chifukwa cha imwe. Pakuti FUMU, Chiuta winu, ndi Chiuta kuchanya nkhanira na pano pasi wuwo.

¹²Ntheura sono, nkhumuŵeyani kuti murape kwa ine mu zina la FUMU kuti nga ndi umo ine ndamuchitirani mwakugomezgeka kwa imwe, imwe namwe mwizakaŵe ŵakugomezgeka na mbumba ya ŵadada. Sono mundipe chimanyikwiro cha unenesko.

¹³Murape kuti mwizamkuŵareka ŵamoyo ŵadada, amama, ŵadumbu ŵane, ŵanung'una ŵane, na ŵabali ŵawo wose kuti muthaske umoyo withu ku nyifwa.”

¹⁴Ŵanthu ŵara ŵakati kwa Rahabu, “Umoyo withu ufwirenge iwe. Usange iwe ukureka kuvumbula icho ise tikuchita kuno, ise nase titi tiŵe na chiwuravi na kuŵa ŵakugomezgeka kwa iwe para FUMU yizamkutipa charu ichi.”

¹⁵Penepapo wakazikhizgira pasi na chingwe kufumira pa chidangazi, pakuti nyumba yakhe yikazengekera lumoza na chiliŵa cha linga la msumba, mwakuti iyo wakakharanga mu linga.

¹⁶Rahabu wakati kwa iwo, “Rutani, ku mapiri mzire awo ŵakumupenjani wamusangani. Mukabisame kwenekura mazuŵa ghatatu mpaka ŵawerere, pamanyuma ndipo mukarutenge.”

¹⁷Sono mphachi zira zikati kwa Rahabu, “Pa chirapo icho watirapiska ise kuti tamkuŵa na mrandu chara.

¹⁸Para ise tizamkunjira mu charu ichi, iwe ukakilire chingwe chiswesi ichi pa chidangazi icho watikhizgirapo. Ndipo ŵawuso, ŵanyoko, ŵadumbu ŵako, na wose ŵa mu mbumba yako wizakaŵawunjike mu nyumba yako.

¹⁹Usange yumoza wamkufumira kuwaro kwa nyumba yako na kuruta ku msewu wa msumba, ndopa zakhe zamkuŵa pa iyomwene. Ise kuti tiŵenge na kafukwa chara. Kweni usange waliyose uyo wamkuŵa mu nyumba yako pamoza na iwe na kukomeka, mrandu wa ndopa zakhe wamkuŵa pa ise.

²⁰Kweni usange wavumbula icho tikuchita kuno, ise tiŵenge ŵambula mrandu pa chirapo icho iwe watirapiska.”

²¹Rahabu wakazgora wakati, “Kuŵe ntheura nga ndi umo mwayowoyera.” Penepapo wakaŵafumya, ndipo ŵakaruta. Sono wakakakirira chingwe chiswesi chira pa chidangazi chira.

²²Mphachi zira zikati zapatukana na Rahabu, zikaruta ku mapiri uko zikakharako mazuŵa ghatatu ŵakasuka ŵakawerako awo ŵakaŵapenjanga. Pakuti awo ŵakalondanga kupenja mphachi zira ŵakapenja nthowa zose, kweni kuti ŵakazisanga chara.

²³Ntheura mphachi ziŵiri zira zikakhira kufuma ku phiri, zikambuka mronga ndipo zikiza kwa Yoshuwa, mwana wa Nuni. Zikamuphalira vyose ivyo vikazichitikira.

²⁴Zikamuphalira Yoshuwa zikati, “Nadi, FUMU yapereka charu chose chira mu mawoko ghithu. Pakuti ŵanthu wose awo ŵakukhara mu charu chenechira ŵakutenthema chifukwa cha ise.”