Read new_tumbuka_bible Yoshuwa 20 Bible Online

Yoshuwa 20 - new_tumbuka_bible bible

Yoshuwa 20

¹Penepapo FUMU yikati kwa Yoshuwa,

²“Uŵaphalire ŵaIsraele kuti, ‘Mwimike misumba yakuphokweramo iyo nkhalangula kwa imwe kwizira mwa Mozesi,

³mwakuti yose uyo wati wakome munthu kwambula kumanya, mwa dala chara, wangachimbilira ku misumba yeneiyi. Misumba iyi yiti yiŵenge malo ghakuphokweramo chinu kwa uyo wangawezgera nduzga pa ndopa zinu.

⁴Para wamkuchimbilira ku umoza wa misumba iyi, wakwenera kwimilira pa muryango wa chipata cha msumba ndipo wapatawule mrandu wakhe panthazi pa ŵarara ŵa msumba kuti ŵapulike. Sono iwo ŵamkumunjizga mu msumba na kumupa malo mwakuti wakhare nawo.

⁵Usange uyo wawezgerenge nduzga wakumurondezga, ŵakwenera kupereka wakakoma mu mawoko ghakhe chara, chifukwa wakamukoma mubali wakhe kwambula kumanya, mwa dala chara, ndipo wakaŵa na chimphindikwa na iyo na kale chara.

⁶Wakwenera kukhara mu msumba wenewura mpaka weruzgike panthazi pa mphara ndiposo mpaka musofi mukuru uyo wakuteŵeta pa nyengo iyo wafwe. Pamanyuma wakukoma yura wawerere ku muzi wakhe, ku chikaya chakhe uko wakafuma para wakachimbiranga.’ ”

⁷Ntheura ŵakapatula msumba wa Kedeshi mu Galileya mu charu cha mapiri cha Nafutali, msumba wa Shekemu mu charu cha mapiri cha Efurayimu na msumba wa Kiriyati Ariba (uwo ndi Heburoni) mu charu cha mapiri cha Yuda.

⁸Ku sirya linyakhe la mronga wa Yorodani, ku mafumiro gha dazi kwa msumba wa Yeriko ŵakapatula msumba wa Bezere uwo uli mu mapopa mu charu chakuthenga, mu charu cha fuko la Rubeni. Mu fuko la Gadi ŵakapatula msumba wa Ramoti mu chigaŵa cha Gileyadi, ndipo na msumba wa Golani mu chigaŵa cha Bashani mu fuko la Manase.

⁹Iyi ndiyo misumba iyo yikapatulikira ŵaIsraele wose ndiposo na ŵalendo awo ŵakapanjwanga mukati mwawo, kuti yose uyo wati wakome munyakhe kwambula kumanya wangachimbilirako mwakuti wareke kukomeka na uyo wakukhumba kuwezgera nduzga pa ndopa za munyakhe wasuke weruzgike panthazi pa mphara ya mirandu.