Read new_tumbuka_bible Yoshuwa 21 Bible Online

Yoshuwa 21 - new_tumbuka_bible bible

Yoshuwa 21

¹Penepapo ŵarongozgi ŵa mbumba za ŵa fuko la Levi wakiza kwa musofi Eleyazara na kwa Yoshuwa mwana wa Nuni na ku ŵararaŵarara ŵa mafuko gha mbumba za ŵaIsraele,

²ndipo ŵakati kwa iwo ku Shilo, mu charu cha Kanani, “FUMU yikalangula kwizira mwa Mozesi kuti mutipe misumba yakukharamo pamoza na vyaru ivyo tingaliskirako viŵeto vyithu.”

³Ntheura kwakuyana na languro la FUMU, ŵaIsraele ŵakaŵapa ŵa fuko la Levi misumba iyi na vyaru vyakuliskirako viŵeto vyawo kuŵa chiharo chawo.

⁴Mphenduzgo yakudanga yikachitika ndipo yikawira mbumba za Kohati. ŴaLevi aŵa ŵakaŵa ŵa mphapu ya musofi Aroni, ŵeneawo ŵakapokera misumba 13 mu fuko la Yuda, la Simiyoni na la Benjamini.

⁵Ŵa mbumba ya Kohati awo ŵakakharako ŵakapokera pakuchita mphenduzgo misumba khumi kufuma ku mbumba za fuko la Efurayimu, la Dani, na hafu wa fuko la Manase la ku dera la ku mafumiro gha dazi.

⁶Ŵa mbumba ya Gerishoni ŵakapokera pakuchita mphenduzgo misumba 13 kufuma ku mbumba za fuko la Isakara, Ashere, Nafutali, ndipo na hafu wa fuko la Manase mu chigaŵa cha Bashani.

⁷Ŵa mbumba ya Merari ŵakapokera misumba 12 kufuma ku fuko la Rubeni, la Gadi, na la Zebuloni.

⁸Ntheura ŵaIsraele ŵakapereka misumba iyi na vyaru vyakuliskirako viŵeto vyawo ŵati ŵachita mphenduzgo nga ndi umo FUMU yikaŵalangulira kwizira mwa Mozesi.

⁹Kufuma ku fuko la Yuda na la Simiyoni ŵakapereka misumba iyi kwakuyana na mazina ghakhe,

¹⁰iyo yikaperekeka ku ŵa mphapu ya Aroni ŵeneawo ŵakaŵa ŵanji wa mbumba ya Kohati, ŵa fuko la Levi, pakuti ndiwo ŵakaŵa ŵakudanga kupokera mphenduzgo.

¹¹Ŵakaŵapa msumba wa Kiriyati Ariba (Ariba wakaŵa wiske wa Anaki), weneuwo ukaŵa msumba wa Heburoni, mu charu cha mapiri cha Yuda, pamoza na charu chakhe chakuliskako viŵeto zingirizge.

¹²Kweni minda na vikaya kuzingirizga msumba, vikaperekeka kwa Kalebu mwana wa Yefune kuŵa chiharo chakhe.

¹³Ntheura ŵakapereka msumba wa Heburoni pamoza na charu chakhe chakuliskako viŵeto kwa ŵa mphapu ya musofi Aroni kuŵa msumba wakuphokwerako uyo ŵakukoma munyakhe. Ŵakaperekaso msumba wa Libina,

¹⁴wa Yatiri, wa Eshitemowa, pamoza na vyaru vyakuliskirako viŵeto.

¹⁵Holoni, Debiri,

¹⁶Ayini, Yuta, na Beti Shemeshi pamoza na vyaru vyakhe vyakuliskirako viŵeto. Yose yikaŵa misumba yinkhonde na yinayi kufumira mu mafuko ghaŵiri agha.

¹⁷Kufumira mu fuko la Benjamini ŵakapereka msumba wa Gibeyoni, wa Geba, pamoza na vyaru vyakhe vyakuliskirako viŵeto vyawo.

¹⁸Ŵakaperekaso msumba wa Anatoti na wa Alimoni pamoza na vyaru vyakhe vyakuliskirako viŵeto vyawo. Yose pamoza yikaŵa misumba yinayi.

¹⁹Misumba yose iyo yikaperekeka ku ŵasofi, ŵa mphapu ya Aroni yikaŵa 13 pamoza na vyaru vyakhe vyakuliskirako viŵeto vyawo.

²⁰Wose ŵanyakhe awo ŵakharako ŵa fuko la Levi ŵeneawo ŵakaŵa ŵa mbumba ya Kohati ŵakapokera pakuchita mphenduzgo misumba kufuma ku fuko la Efurayimu.

²¹Mu charu cha mapiri cha Efurayimu ŵakaŵapa msumba wa Shekemu pamoza na vyaru vyakuliskirako viŵeto vyawo kuŵa wakuphokwerako uyo wakoma munyakhe. Ŵakapokeraso msumba wa Gezere pamoza na vyaru vyakuliskirako viŵeto vyawo,

²²msumba wa Kibizayimu, na wa Beti Horoni pamoza na vyaru vyakuliskirako viŵeto vyawo. Yose pamoza yikaŵa misumba yinayi.

²³Kufuma mu fuko la Dani ŵakapokera msumba wa Eliteke, wa Gibetoni, pamoza na vyaru vyakuliskirako viŵeto vyawo,

²⁴msumba wa Ayaloni na wa Gati Rimoni, pamoza na vyaru vyakuliskirako viŵeto vyawo. Yose pamoza yikaŵa misumba yinayi.

²⁵Kufuma ku hafu wa fuko la Manase ŵakapokera msumba wa Taanaki, na wa Gati Rimoni, pamoza na vyaru vyakuliskirako viŵeto vyawo. Yose pamoza yikaŵa misumba yiŵiri.

²⁶Misumba yose iyi khumi pamoza na vyaru vyakuliskirako viŵeto vyawo, yikaperekeka ku wose ŵa mbumba ya Kohati awo ŵakakharako.

²⁷ŴaLevi kufuma ku mbumba ya Gerishoni, ŵakapokera msumba wa Golani kufuma mu hafu wa fuko la Manase mu chigaŵa cha Bashani, na msumba wa Beyeshitera pamoza na vyaru vyakuliskirako viŵeto vyawo kuŵa misumba yakuphokwerako uyo wakoma munyakhe. Yose pamoza yikaŵa misumba yiŵiri.

²⁸Kufuma mu fuko la Isakara ŵakapokera msumba wa Kishiyoni na wa Daberati pamoza na vyaru vyakuliskirako viŵeto vyawo,

²⁹msumba wa Yarimuti na wa Eni Ganimu pamoza na vyaru vyakuliskirako viŵeto vyawo. Yose pamoza yikaŵa misumba yinayi.

³⁰Kufuma ku fuko la Ashere, wakapokera msumba wa Mishala na wa Abidoni pamoza na vyaru vyakuliskirako viŵeto vyawo,

³¹wa Helikati na wa Rehobu pamoza na vyaru vyakuliskirako viŵeto vyawo. Yose pamoza yikaŵa misumba yinayi.

³²Kufuma ku fuko la Nafutali, ŵakapokera msumba wa Kedeshi mu chigaŵa cha Galileya pamoza na charu chakhe chakuliskako viŵeto vyawo kuŵa msumba wa wakuphokwerako uyo wakoma munyakhe. Ŵakapokeraso msumba wa Hamoti Dori, na wa Karitani pamoza na vyaru vyakuliskirako viŵeto vyawo. Yos pamoza yikaŵa misumba yitatu.

³³Misumba yose ya ŵa mbumba ya ŵa Gerishoni pamoza na vyaru vyakhe vyakuliskirako viŵeto vyawo yikaŵa 13.

³⁴ŴaLevi awo ŵakakharako ŵa mbumba ya Merari, ŵakapokera misumba iyi kufuma ku fuko la Zebuloni: Yokineyamu, Karita,

³⁵Dimina na Nahalala pamoza na vyaru vyakhe vyakuliskirako viŵeto vyawo. Yose pamoza yikaŵa misumba yinayi.

³⁶Kufuma mu fuko la Rubeni, ŵa Merari ŵakapokera msumba wa Bezere, wa Yahazi,

³⁷wa Kedemoti, na Mefaati pamoza na vyaru vyakhe vyakuliskirako viŵeto vyawo. Yose pamoza yikaŵa misumba yinayi.

³⁸Kufuma ku fuko la Gadi, ŵa Merari ŵakapokera msumba wa Ramoti mu chigaŵa cha Gileyadi, msumba wa Mahanayimu pamoza na vyaru vyakhe vyakuliskirako viŵeto vyawo kuŵa misumba ya kuphokwerako uyo wakakoma munyakhe.

³⁹Ŵakapokeraso msumba wa Heshiboni, na wa Yazere pamoza na vyaru vyakhe vyakuliskirako viŵeto vyawo. Yose pamoza yikaŵa misumba yinayi.

⁴⁰Misumba yose pamoza iyo yikaperekeka pakuchita mphenduzgo ku ŵa mbumba ya Merari, ŵeneawo ŵakaŵa ŵa fuko la Levi, yikaŵa 12.

⁴¹Misumba yose iyo ŵa fuko la Levi ŵakapokera pamoza na vyaru vyakhe vyakuliskirako viŵeto vyawo, mu charu icho ŵaIsraele ŵakapoka yikaŵa 48.

⁴²Misumba yose iyi yikaŵa na vyaru vyakhe vyakuliskirako viŵeto vyawo. Yose yikaŵa ntheura pera.

⁴³Ntheura FUMU yikapereka ku ŵaIsraele charu chose icho yikarapa kupereka ku ŵasekuru ŵawo. Ndipo wakati ŵapoka charu chira, ŵakakhara mwenemumo.

⁴⁴FUMU yikaŵapumuzga ŵaIsraele, kukaŵa mutende kufumira kosekose zingirizge nga ndi umo FUMU yikarapira ku ŵasekuru ŵawo. Ntheura pakaŵavye na yumoza wa ŵarwani ŵawo uyo wakawuka kuya karwa na iwo, pakuti FUMU yikaŵapereka wose mu mawoko ghawo.

⁴⁵Viweme vyose ivyo FUMU yikapangana ku ŵaIsraele vikachitika. Pakaŵavye na chimoza icho chikatondeka.