Read new_tumbuka_bible Yoshuwa 22 Bible Online

Yoshuwa 22 - new_tumbuka_bible bible

Yoshuwa 22

¹Penepapo Yoshuwa wakachema ŵa fuko la Rubeni, la Gadi na hafu ŵa fuko la Manase

²ndipo wakati kwa iwo, “Mwachita vyose ivyo Mozesi muteŵeti wa FUMU wakamulangulirani, ndipo mwapulikira mazgu ghane mu vyose ivyo nkhamulangulani.

³Pa nyengo yitali mpaka muhanya uno kuti muli kuŵarekapo ŵabali ŵinu chara, kweni mwachita icho FUMU, Chiuta winu wakamulangulani.

⁴Sono pakuti FUMU, Chiuta winu waŵapumuzga ŵabali ŵinu nga ndi umo wakayowoyera, sono wererani ku kwinu uko kuli chiharo chinu, icho Mozesi, muteŵeti wa FUMU wakamupani ku sirya linyakhe la mronga wa Yorodani.

⁵Kweni mupwererere chomene kusunga vilayizgo na dango ilo Mozesi muteŵeti wa FUMU wakamupani. Kutemwa FUMU, Chiuta winu, kwenda mu nthowa zakhe zose, kupulikira marango ghakhe, kudemerera kwa iyo nganganga, na kumuteŵetera iyo na mtima winu wose ndipo na mzimu winu wose.”

⁶Penepapo Yoshuwa wakaŵatumbika na kuŵawezga, ndipo iwo ŵakaruta ku vikaya vyawo.

⁷Mozesi wakapereka charu mu chigaŵa cha Bashani ku hafu wa fuko la Manase, ndipo Yoshuwa wakapereka ku hafu wa fuko linyakhe la Manase pamoza na ŵabali ŵawo dera la ku manjiliro gha dazi kwa mronga wa Yorodani. Para Yoshuwa wakaŵawezgeranga ku vikaya vyawo na kuŵatumbika,

⁸wakati kwa iwo, “Wererani ku vikaya vyinu na usambazi ukuru, viŵeto vinandi, ndarama za siliva na za golide zinandi, mkuŵa, chisulo, na malaya ghanandi. Ivyo mwaskogha ku ŵarwani ŵinu mugaŵane na ŵabali ŵinu.”

⁹Penepapo ŵa fuko la Rubeni, la Gadi na hafu wa fuko la Manase ŵakaŵareka ŵaIsraele ku Shilo mu charu cha Kanani. Iwo ŵakawerera ku Gileyadi ku charu chawo icho ŵapoka kwakuyana na languro la FUMU mwa Mozesi.

¹⁰Para ŵa fuko la Rubeni, la Gadi na hafu wa fuko la Manase ŵakafika ku Geliloti pa mphaka ya mronga wa Yorodani mu charu cha Kanani, ŵakazenga jochero likuru chomene pa mphaka ya mronga ura.

¹¹Sono ŵaIsraele ŵanyawo ŵakapulika kuti ŵa fuko la Rubeni, la Gadi na hafu wa fuko la Manase ŵazenga jochero pa mphaka ya charu cha Kanani pa Geliloti pafupi na mronga wa Yorodani.

¹²Mpingo wose wa Israele ŵanyakhe ŵara ŵakawungana ku Shilo kuti ŵarute ŵakarwe nkhondo na iwo.

¹³Sono ŵaIsraele ŵakatuma Finehasi mwana wa musofi Eleyazara kuruta ku ŵa fuko la Rubeni, la Gadi na hafu wa fuko la Manase mu charu cha Gileyadi.

¹⁴Pamoza na iyo ŵakatumaso ŵarongozgi khumi kufumira ku mafuko gha Israele, yumoza ku fuko lirilose kwimilira mbumba yakhe.

¹⁵Ŵakati ŵaruta ku ŵa fuko la Rubeni, la Gadi na hafu wa fuko la Manase mu charu cha Gileyadi, ŵakati kwa iwo,

¹⁶“Mpingo wose wa FUMU ukuti, ‘Kasi mungaswa uli chipulikano chinu na Chiuta wa Israele? Kasi mwapatukirachi kwa FUMU pakujizengera muhanya uno jochero kurongora kumugarukira iyo?

¹⁷Kasi zakwananga zithu izo tikachita ku Peyoro zikaŵa zakuchepa Mpaka muhanya uno tilije kujitozga ku zakwananga zira chara, nangauli chilengo chikawira pa mpingo wa FUMU!

¹⁸Kasi muhanya uno mukuwerera nyuma kuyireka FUMU? Usange mukugarukira FUMU muhanya uno, na machero yiti yikaripire mpingo wose wa Israele.

¹⁹Usange charu icho mukapoka ndi chakukazuzgika, mwambuke, mwize ku charu cha FUMU, uko kuli Chihema Chakupatulika, kuti mwizakasange charu pamoza na ise. Kweni mureke kugarukira FUMU panji ise pakujizengera jochero linu kureka jochero la FUMU, Chiuta withu.

²⁰Asi FUMU yikakwiyira mpingo wose wa Israele, Akani, mwana wa Zera wati wakana kupulikira dango pa vinthu ivyo vikenera kuparanyika? Kuti wakaŵa iyo pera chara uyo wakafwa chifukwa cha kwananga kwakhe.’ ”

²¹Penepapo ŵa fuko la Rubeni, la Gadi, na hafu wa fuko la Manase ŵakaŵazgora ŵarongozgi ŵa mafuko gha Israele ŵakati,

²²“FUMU, Chiuta wa ŵachiuta, FUMU, Chiuta wa ŵachiuta, wakumanya ndipo Israele nayo wamanye. Usange machitiro agha ghaŵa gha uchigaruka panji mukureka kupulikira FUMU, mungatirekanga chara muhanya uno kuŵa ŵamoyo.

²³Usange tazenga jochero ili kuti tiwerere nyuma kureka kurondezga FUMU, panji kuperekerapo sembe zakocha na sembe za ufu panji za wenenawene, ipo FUMU iyo yekha yiwezgere nduzga pa ise.

²⁴Kweni ndi ntheura chara. Ise tikachita ichi chifukwa cha wofi kuti mu mazuŵa ghakunthazi ŵazukuru ŵinu ŵangiza kafumba ŵazukuru ŵithu kuti, ‘Kasi mungachitachi imwe na FUMU, Chiuta wa Israele?

²⁵FUMU yili kuŵika mronga wa Yorodani kuŵa mphaka pakati pa ise na imwe ŵa fuko la Rubeni na la Gadi. Imwe mulije phande mwa FUMU!’ Ntheura panji ŵazukuru ŵinu ŵangamanya kukanizga ŵazukuru ŵithu kusopa FUMU.

²⁶Ntheura tikati, ‘Tiyeni tizenge jochero, kweni lakuperekerapo sembe zakocha mburuma chara, panji la sembe zakukoma zilizose.’

²⁷Kweni kuti liŵe ukaboni pakati pa ise na imwe, na miwiro yose iyo yikwiza pamanyuma pithu, kuti ise tisopenge FUMU pa malo ghakhe ghakupatulika na kupereka sembe zithu zakocha mburuma, sembe zakukoma, na sembe za wenenawene. Ntheura kunthazi ŵazukuru ŵinu ŵangiza kayowoya chara ku ŵazukuru ŵithu kuti, ‘Imwe mulije phande mwa FUMU.’

²⁸Ndipo tikaghanaghana kuti usange ŵatifumbenge ise panji ŵa mphapu yithu, ise titizgorenge kuti, ‘Wonani, ichi chikukozgana waka na jochero la FUMU ilo ŵasekuru ŵithu ŵakazenga. Jochero ili kuti ndakuperekerapo sembe za mburuma chara, nesi kuperekerapo sembe zakukoma, kweni kuŵa ukaboni pakati pa ise na imwe.’

²⁹Ichi chiŵe kutali na ise kuti tigarukire FUMU, ndipo kuti tiwerere nyuma muhanya uno kureka kurondezga FUMU pakuzenga jochero la sembe zakocha mburuma, panji sembe za ufu panji sembe zakukoma, pa dera pa jochero la FUMU, Chiuta withu ilo liri panthazi pa Chihema Chakupatulika chakhe.”

³⁰Para musofi Finehasi na ŵarongozgi ŵa mpingo, ŵararaŵarara ŵa ŵaIsraele ŵara awo ŵakaŵa pamoza na iyo ŵakapulika ivyo ŵa fuko la Rubeni, la Gadi, na hafu wa fuko Manase ŵa ku dera la kumafumiro gha dazi ŵakayowoya ndipo wakakondwa chomene.

³¹Finehasi, mwana wa musofi Eleyazara musofi, wakati ku ŵa fuko, la Rubeni, la Gadi, na hafu wa fuko la Manase, “Muhanya uno tamanya kuti FUMU yili na ise, chifukwa mwarongorapo kuwura kugomezgeka kwa FUMU chara. Ntheura mwathaska ŵaIsraele mu woko la FUMU.”

³²Penepapo Finehasi mwana wa musofi Eleyazara na ŵarongozgi ŵara ŵakawerera ku charu cha Kanani kufuma ku chigaŵa cha Gileyadi uko ŵakaruta kuya kakumana na ŵa fuko la Rubeni, na la Gadi, ndipo ŵakaya kaphara ku ŵaIsraele.

³³Uthenga ukakondweska ŵaIsraele ndipo ŵakarumba Chiuta. Kuti ŵakayowoyaso mazgu ghanyakhe ghakuruta kuya karwa nkhondo na iwo chara, kuti ŵakaparanye charu icho ŵa fuko la Rubeni na la Gadi.

³⁴Ntheura ŵa fuko la Rubeni na la Gadi ŵakathya jochero lira kuti, “Jochero la ukaboni pakati ise kuti FUMU ndi Chiuta!”