Read new_tumbuka_bible Yoshuwa 23 Bible Online

Yoshuwa 23 - new_tumbuka_bible bible

Yoshuwa 23

¹Pakati pajumpha nyengo yitali FUMU yati yaŵapumuzga ŵaIsraele ku ŵarwani ŵawo awo ŵakaŵazingirizga, Yoshuwa wakachekura, wakaŵa na virimika vinandi.

²Ntheura wakachema ŵaIsraele wose, ŵarara ŵawo, ŵarongozgi ŵawo, ŵeruzgi, na nduna ndipo wakati kwa iwo, “Ine ndachekura chomene ndipo ndili na virimika vinandi.

³Imwe mwekha mwawona vyose ivyo FUMU Chiuta wali kuchita ku mafuko ghose agha chifukwa cha imwe. Ndi FUMU, Chiuta winu mweneuyo wakamurweraninge nkhondo.

⁴Kumbukani umo ndagaŵira vyaru ku mafuko ghinu ghose kuŵa chiharo chinu, vyaru vyeneivyo vikaŵa vya ŵamitundu. Vyaru ivi nkhavithereska kale kufuma ku mronga wa Yorodani ku mafumiro gha dazi mpaka ku Nyanja Yikuru ku manjiliro gha dazi.

⁵FUMU Chiuta winu wati waŵawuskemo mu nthowa na kuŵachimbizgira kutali panthazi pinu, ndipo mwamkuhara charu chawo kuŵa chinu umo FUMU Chiuta winu wali kupanganira kwa imwe.

⁶Ntheura ŵikanipo mtima kusungilira na kuchita vyose ivyo vili kulembeka mu Buku la Marango gha Mozesi. Mureke kuzgokera uku na uku, manyi ndi ku maryero panji ku mazere.

⁷Mureke kusazgikana na ŵamitundu awo ŵali mukati mwinu, panji kuzunura mazina gha ŵachiuta ŵawo, nesi kurapira mu zina lawo. Mureke kuŵateŵetera, panji nesi kuŵalambira.

⁸Kweni imwe muŵe ŵakugomezgeka kwa FUMU Chiuta winu nga ndi umo mwaŵira mpaka muhanya uno.

⁹Pakuti FUMU yachimbizga mafuko ghakuzirwa na gha nkhongono panthazi pinu. Ndipo palije na yumoza uyo wali kwimikanapo namwe mpaka muhanya uno.

¹⁰Munthu yumoza mwa imwe wati warwe na ŵanthu 1,000 pakuti ndi FUMU Chiuta winu uyo wakamurwerani, nga ndi umo wakapanganira na imwe.

¹¹Ntheura mujichenjerere pakutemwa FUMU, Chiuta winu.

¹²Kweni usange mukuwerera nyuma na kukorererana na ŵamitundu awo ŵakharako mukati mwinu, na kutorerana nawo zinthengwa, na kuŵa nawo pamoza,

¹³manyani nadi kuti FUMU, Chiuta winu wati waŵachimbizge ŵamitundu aŵa panthazi pinu chara. Iwo ŵati ŵaŵe vipingo panji mbuna kwa imwe, maluswazu pa miwongo yinu ndiposo na minga ku maso ghinu mpaka mumare mu charu chiweme icho FUMU, Chiuta winu wali kumupani.

¹⁴“Ndipo ine sono ndili pafupi kwenda mu nthowa ya charu. Imwe mose mukumanya mu mitima yinu na mu mizimu yinu kuti na chimoza chili kutondekapo pa vyose viweme ivyo FUMU, Chiuta winu wakapangana kumupani. Vyose vili kufiskika, palije na chimoza icho chili kutondeka.

¹⁵Kweni umo FUMU, Chiuta winu wakafiskira mapangano ghakhe yose ghaweme agho wakachita pa imwe, ntheura ndimo wati ŵafiskire viheni vyose pa imwe musuke mumare petu mu charu chiweme icho wali kumupani.

¹⁶Usange mukuswa phangano la FUMU, Chiuta winu, ilo wakamulangulani, ndipo mukwamba kuteŵetera ŵachiuta ŵanyakhe na kuŵalambira, ukari wa FUMU uti ugolere pa imwe, ndipo maluŵiro muti mumare petu mu charu chiweme icho wali kumupani.”