Read new_tumbuka_bible Yoshuwa 24 Bible Online

Yoshuwa 24 - new_tumbuka_bible bible

Yoshuwa 24

¹Sono Yoshuwa wakawunganya mafuko ghose gha Israele ku Shekemu. Wakachema ŵarara, ŵarongozgi, ŵeruzgi na nduna zose za charu cha Israele. Ntheura ŵakiza panthazi pa FUMU.

²Yoshuwa wakati ku ŵanthu wose, “FUMU, Chiuta wa Israele wakuti, ‘Kale chomene ŵasekuru ŵinu ŵakakharanga ku sirya linyakhe la mronga wa Yufureti ndipo ŵakateŵeteranga ŵachiuta ŵanyakhe. Yumoza wa ŵasekuru yura wakaŵa Tera wiske wa Abrahamu na Nahoro.’

³Ntheura ine nkhatora wiskemwe Abrahamu kufuma ku sirya la mronga, kumurongozga kwendera charu chose cha Kanani, ndipo nkhandaniska mphapu yakhe. Nkhamupa Yisake,

⁴ndipo kwa Yisake nkhamupa Yakhobe na Esau. Nkhapereka charu cha mapiri gha Edomu kwa Esau kuŵa chakhe. Kweni sekuru winu Yakhobe na ŵana ŵakhe ŵakaruta ku Eguputo.

⁵Nkhatuma Mozesi na Aroni na kulanga ŵaEguputo na vilengo vinandi. Imwe mukumanya makora ivyo nkhachita mukati mwawo ndipo pamanyuma nkhamufumyanimo.

⁶Para nkhaŵafumya ŵawiskemwekuru mu Eguputo, ŵakiza ku nyanja. ŴaEguputo awo ŵakakwera pa magareta na ŵakukwera pa mahachi ghawo ŵakaŵarondezga ŵawiskemwekuru mpaka ŵakafika ku Nyanja ya Matete.

⁷Ŵakati ŵalirira kwa FUMU kuti yiŵawovwire, FUMU yikaŵika mdima pakati pa iwo na ŵaEguputo, ndipo yikachitiska kuti nyanja yiŵabizge. Imwe mukawona icho nkhachita ku ŵaEguputo. “Pamanyuma mukakhara mu mapopa nyengo yitali.

⁸Ndipo nkhiza namwe ku charu cha ŵaAmori awo ŵakakharanga ku mafumiro gha dazi kwa mronga wa Yorodani. Ŵakarwa namwe nkhondo ndipo ine nkhaŵapereka mu mawoko ghinu. Nkhaŵamara panthazi pinu, ndipo imwe mukahara charu chawo.

⁹Para Karonga Balaki, mwana wa Zipora, wa charu cha Mowabu, wakanozgekera kurwa nkhondo na charu cha Israele, ŵakatuma nthumi kuya kachema Balaamu, mwana wa Beyoro kuti wamutembani,

¹⁰Kweni kuti nkhakhumba kumupulikira Balaamu chara. Ntheura wakamutumbikani imwe kaŵirikaŵiri, ndipo nkhamuthaskani ku woko lakhe.

¹¹Pamanyuma mukambuka mronga wa Yorodani na kwiza ku msumba wa Yeriko. Ŵanthu ŵa msumba uwu ŵakarwa namwe, ndipo ŵaAmori, ŵaPerezi, ŵaKanani, ŵaHiti, ŵaGirigashi, ŵaHivi na ŵaYebusi nawo ŵakarwa nkhondo namwe. Kweni nkhaŵapereka mu mawoko ghinu.

¹²Nkhatumizga masanganavu panthazi pinu gheneagho ghakaŵachimbizga panthazi pinu ŵakaronga ŵaŵiri ŵaAmori. Kuti mukaŵachimbizga na lupanga na uta winu chara.

¹³Ntheura nkhamupani charu icho mukachifukafukira chara na misumba iyo mukaŵavye kuyizenga, mukukhara mwenemuno. Mukurya vipambi vya mpheska na vya maolive ivyo mukapanda chara.”

¹⁴“Ntheura sono chindikani FUMU ndipo muteŵetere iyo mu unenesko na mu kugomezgeka kose. Wuskaniko ŵachiuta awo ŵasekuru ŵinu ŵakasopanga mu Mesopotamiya na mu Eguputo, ndipo muteŵetere FUMU pera.

¹⁵Usange mulije khumbo la kuteŵetera FUMU, soranipo muhanya uno uyo muti muteŵeterenge, kwali mbachiuta awo ŵa wiskemwekuru ŵakasopanga mu Mesopotamiya, panji ŵachiuta ŵa ŵaAmori mu charu icho mukukharamo. Kweni ine na mbumba yane titi tiyiteŵeterenge FUMU.”

¹⁶Penepapo ŵanthu wakazgora ŵakati, “Chara! Ise kuti tizamkurekapo FUMU chara, kuti titeŵetere ŵachiuta ŵanyakhe.

¹⁷Pakuti ndi FUMU, Chiuta withu uyo wakiza nase kuno pamoza na ŵasekuru ŵithu kufuma mu Eguputo, charu cha uzga. Iyo ndiyo wakachita vimanyikwiro vikuru ise tikuwona. Wakatisungilira makora mu nthowa yose iyo tikendamo na mukati mu mafuko ghose agho tikajumphangamo.

¹⁸FUMU yikachimbizga panthazi pithu ŵaAmori wose, awo ŵakakharanga mu charu ichi. Ise nase titi titeŵetere FUMU, chifukwa ndi Chiuta withu.”

¹⁹Yoshuwa wakati ku ŵanthu, “Imwe mungamanya kuteŵetera FUMU chara, pakuti iyo ndi Chiuta mutuŵa. Iyo ndi Chiuta wa sanje. Kuti wagowokerenge majuvyo ghinu nesi zakwananga zinu chara,

²⁰Usange mukureka FUMU na kuteŵetera ŵachiuta ŵa chilendo, yiti wamuzgokerani na kumupwetekani na kumumarani petu, nangauli ŵanguŵa muweme kwa imwe.”

²¹Kweni ŵanthu ŵakati kwa Yoshuwa, “Chara! Ise titi titeŵetere FUMU.”

²²Ndipo Yoshuwa wakati, “Imwe ndimwe ŵakaboni kwa imwe mwekha kuti mwasankha kuteŵetera FUMU.” Ŵanthu ŵakazgora ŵakati, “Inya, ise ndise ŵakaboni.”

²³Yoshuwa wakati, “Ipo sono fumyanimo ŵachiuta ŵa chilendo awo ŵali mukati mwinu ndipo mupereke mitima yinu kwa FUMU, Chiuta wa Israele!”

²⁴Ŵanthu ŵakati kwa Yoshuwa, “Ise titeŵeterenge FUMU, Chiuta withu na kumupulikira.”

²⁵Ndipo pa zuŵa lenelira Yoshuwa wakaŵachitira phangano ŵaIsraele, ndipo penepara pa Shekemu wakaŵapa malangulo na marango kuti ŵarondezgenge.

²⁶Sono Yoshuwa wakalemba vyose ivi mu Buku la Marango gha Chiuta. Ntheura wakatora libwe likuru na kulimika penepara musi mwa khuni la musoro pafupi na Malo Ghakusoperako FUMU.

²⁷Penepapo wakati ku ŵanthu wose, “Wonani, libwe ili liŵenge kaboni kususkana na ise. Lapulika mazgu ghose agho FUMU yayowoya kwa ise. Liŵenge kaboni kususkana namwe mzire muŵe ŵatesi kwa Chiuta winu.”

²⁸Penepapo Yoshuwa wakaŵawezga ŵanthu, yose ku chiharo chakhe.

²⁹Pamanyuma pa ivi, Yoshuwa mwana wa Nuni, muteŵeti wa FUMU wakafwa wali na virimika 110.

³⁰Ŵakamusunga mu chiharo chakhe ku msumba wa Timunati Sera mu charu cha mapiri cha Efurayimu, ku mpoto kwa Phiri la Gaashi.

³¹ŴaIsraele ŵakateŵetera FUMU mazuŵa ghose gha umoyo wa Yoshuwa, na gha ŵararaŵarara wose awo umoyo wawo ukarutilira Yoshuwa wati wafwa, ŵeneawo ŵakamanya milimo yose iyo FUMU yikachitira ŵaIsraele.

³²Viwangwa vya Yosefe ivyo ŵaIsraele ŵakayegha kufuma ku Eguputo, ŵakavisunga ku Shekemu pa charu icho Yakhobe wakagula na ndarama za siliva 100 kufuma ku ŵana ŵa Hamoro, wiske wa Shekemu. Ichi chikazgoka kuŵa chiharo cha ŵa mphapu ya Yosefe.

³³Eleyazara mwana wa Aroni wakufwa ndipo wakasungika ku Gibeya ku muzi uko mwana wakhe Finehasi wakapokera mu charu cha mapiri cha Efurayimu.