Read new_tumbuka_bible Yoshuwa 3 Bible Online

Yoshuwa 3 - new_tumbuka_bible bible

Yoshuwa 3

¹Na mulenjelenje Yoshuwa na pamoza na ŵaIsraele wose ŵakawuka kufuma ku Shitimu na kwiza ku Yorodani, ndipo ŵakagona penepara pambere ŵandambuke ŵakagona mronga.

²Ghakati ghajumphapo mazuŵa ghatatu, ŵarongozgi ŵakendera msasa,

³ndipo ŵakalangula ŵanthu, ŵakati, “Para mukuwona Bokosi la Phangano la FUMU, Chiuta winu layegheka na ŵasofi ŵa fuko la Levi, mukawukenge pa malo ghinu na kulirondezga.

⁴Penepapo muti mumanye nthowa iyo muti mwendenge, pakuti mu nthowa yeneiyo kuti muli kwendamo na kale chara. Kweni mwendenge patali na Bokosi la Phangano. Paŵe mtunda wa kilomita yimoza pakati pa imwe na Bokosi. Kwiza kufupi na Bokosi chara.”

⁵Yoshuwa ŵakati ku ŵanthu, “Jipatuliskani, pakuti na machero FUMU yiti yichite vya minthondwe mukati mwinu.”

⁶Penepapo Yoshuwa wakati ku ŵasofi, “Nyamurani Bokosi la Phangano, ndipo mwendenge panthazi pa ŵanthu.” Ndipo ŵakanyamura Bokosi la Phangano lira na kuŵadangirira ŵanthu.

⁷Penepapo FUMU yikati kwa Yoshuwa, “Muhanya uno nditi ndambe kukukwezga iwe panthazi pa ŵaIsraele, mwakuti ŵamanye kuti ine ndili na iwe nga ndi umo nkhaŵira na Mozesi.

⁸Uŵaphalire ŵasofi awo ŵakuyegha Bokosi la Phangano kuti, ‘Para mwafika waka mu mphepete mwa maji gha mronga wa Yorodani, mukimilire mukati mwa mronga.’ ”

⁹Ntheura Yoshuwa wakati ku ŵaIsraele, “Zani kufupi kwa ine kuti mupulike mazgu gha FUMU, Chiuta winu.”

¹⁰Yoshuwa wakati, “Na cheneichi, muti mumanye kuti Chiuta wamoyo wali mukati mwinu, mwakuti kwambula kutondeka wati wachimbizge nadi panthazi pinu ŵaKanani, ŵaHiti, ŵaHivi, ŵaPerezi, ŵaGirigashi, ŵaAmori, na ŵaYebusi.

¹¹Wonani, Bokosi la Phangano la FUMU ya charu chose cha pasi liti limudangirirani pakwambuka Yorodani.

¹²Ntheura sorani ŵanarume 12, kufuma mu mafuko gha Israele, yumoza mu fuko lirilose.

¹³Para ŵasofi awo ŵakuyegha Bokosi la Phangano la FUMU, FUMU ya charu chose cha pasi, ŵakukanda waka pa maji gha Yorodani, maji ghati ghareke kwenda, gha kunena ghati ghawunjikane waka pholi.”

¹⁴Ntheura ŵanthu pakufuma mu misasa yawo ŵakambuka Yorodani pamoza na ŵasofi awo ŵakayegha Bokosi la Phangano panthazi pawo.

¹⁵Pa nyengo iyi, yikaŵa ya vuna, ndiposo Yorodani wakuzura na kufurukira mu mphepete. Ndipo para ŵasofi ŵakuyegha Bokosi la Phangano ŵakakanda maji mu mronga,

¹⁶maji ghakufumira kunena ghakimilira waka pholi ndipo maji agha ghakawoneka kutali na ku Adamu, msumba uwo ukaŵa ku lwegha lwa Zaretani. Sono ghara ghakakhiranga kusika kurazga ku nyanja ya Araba, Nyanja ya Muchere, ghose ghakadumuka. Ndipo ŵanthu ŵakambuka pa malo ghakulaŵiskana na Yeriko.

¹⁷Ŵasofi awo ŵakayegha Bokosi la Phangano la FUMU ŵakimilira pakati pa mronga wa Yorodani, apo ŵaIsraele wose ŵakambukanga pa charu chakomira, mpaka ŵanthu wose ŵakamara kwambuka mronga.