Read new_tumbuka_bible Yoshuwa 4 Bible Online

Yoshuwa 4 - new_tumbuka_bible bible

Yoshuwa 4

¹Para fuko lose likamara kwambuka mronga wa Yorodani, FUMU yikati kwa Yoshuwa,

²“Sorapo ŵanarume 12, yumoza kufuma ku fuko lose la Israele.

³Uŵalangure kuti ŵatore mawe 12 kufuma pakatikati pa mronga wa Yorodani pa malo agho ŵasofi ŵakimilirapo, ndipo ŵayeghe na kwambukira nagho ku malo agho mwamkugona usiku uno.”

⁴Ntheura Yoshuwa wakachema ŵanarume 12 awo wakaŵasora mukati mu ŵaIsraele, yumoza kufuma mu fuko lirilose.

⁵Penepapo Yoshuwa wakati kwa iwo, “Dangirani panthazi pa Bokosi la Phangano la FUMU, Chiuta winu. Ndipo para mwafika, pakatikati pa mronga wa Yorodani, yose wa imwe watore libwe na kuliŵika pa chiŵegha chakhe, kwakuyana na unandi wa mafuko gha ŵaIsraele.

⁶Ichi chiŵenge chimanyikwiro mukati mwinu, mwakuti para ŵana ŵinu ŵizamkumufumbani kuti, ‘Kasi mawe agha ghakung'anamulachi kwa imwe?’

⁷Imwe mwizakaŵazgorenge kuti, ‘Maji gha mronga wa Yorodani ghakareka kwenda para Bokosi la Phangano la FUMU likambukanga mronga. Apo likambukanga maji gha mronga ghakakamuka. Ntheura mawe agha ndi chikumbusko cha muyirayira ku ŵaIsraele.’ ”

⁸Ntheura ŵaIsraele ŵakachita umo Yoshuwa wakalangulira. Ŵakatora mawe 12 kufuma pakatikati pa mronga wa Yorodani kwakuyana na unandi wa mafuko gha ŵaIsraele nga ndi umo FUMU yikayowoyera kwa Yoshuwa. Ntheura ŵakaruta nagho ku malo uko ŵakaya kagona na kughaŵika pasi kwenekura.

⁹Yoshuwa wakimikaso mawe 12 pakatikati pa mronga wa Yorodani mu apo ŵakimilira ŵasofi awo ŵakayegha Bokosi la Phangano. Ndipo mawe ghara ghali penepara mpaka muhanya uno.

¹⁰Ŵasofi awo ŵakayegha Bokosi la Phangano ŵakimilira pakatikati pa mronga wa Yorodani mpaka vyose ivyo FUMU yikalangula Yoshuwa vikachitika na ŵanthu, nga ndi umo Mozesi wakalangulira Yoshuwa. Ndipo ŵanthu ŵakambuka luŵiroluŵiro.

¹¹Ŵanthu wose ŵakati ŵamara kwambuka, ŵasofi awo ŵakayegha Bokosi la Phangano la FUMU nawo ŵakambuka, ndipo bokosi pamoza na ŵasofi aŵa ŵakadangirira ŵanthu.

¹²Ŵa fuko la Rubeni, la Gadi na hafu wa fuko la Manase ŵakadangirira ŵaIsraele kwambuka uku ŵali na mahomwa gha nkhondo nga ndi umo Mozesi wakayowoyera.

¹³Ŵasilikari ŵakukwana pafupi 40,000 ŵakambuka uku ŵayegha mahomwa kunozgekera nkhondo panthazi pa FUMU mu vidika vya msumba wa Yeriko.

¹⁴Pa zuŵa lira FUMU yikamukuzga Yoshuwa panthazi pa ŵaIsraele wose. Ndipo ŵakamupa nchindi mazuŵa ghose gha umoyo wakhe nga ndi umo ŵakachitira kwa Mozesi.

¹⁵Penepapo FUMU yikati kwa Yoshuwa,

¹⁶“Langula ŵasofi awo ŵakuyegha Bokosi la Phangano, kuti ŵafumemo mu mronga wa Yorodani.”

¹⁷Ntheura Yoshuwa wakalangula ŵasofi wakati, “Fumanimo mu mronga wa Yorodani.”

¹⁸Ŵasofi ŵara awo ŵakayegha Bokosi la Phangano la FUMU ŵakafumamo mu mronga. Ŵasofi ŵara ŵakati ŵakanda waka pa charu chomizo ku sirya linyakhe la mronga, maji gha Yorodani ghakamba kwenda mu malo ghakhe na kufurukira kuwaro nga ndi pakudanga.

¹⁹Ŵanthu ŵakambuka mronga wa Yorodani pa zuŵa la khumi la mwezi wakudanga ndipo ŵakazenga msasa wawo pa Giligala, ku mafumiro gha dazi gha mphaka ya Yeriko.

²⁰Sono Yoshuwa wakimika mu msumba wa Giligala mawe ghara 12 agho wakatora kufuma mu mronga wa Yorodani.

²¹Ndipo wakati ku ŵaIsraele, “Mu nyengo iyo yikwiza, para ŵana ŵizamkufumba ŵawiskewo kuti, ‘Kasi mawe agha ghakung'anamulachi?’

²²Imwe mwizakaŵaphalire kuti, ‘ŴaIsraele ŵakambuka Yorodani pa charu chomizo.’

²³Pakuti FUMU, Chiuta winu wakomizga maji gha mronga wa Yorodani panthazi pinu mpaka mukambukira ku sirya nga ndi umo wakachitira pa Nyanja ya Matete iyo wakomizga panthazi pithu mpaka tikambuka.

²⁴FUMU yikachita ichi kuti ŵanthu wose ŵa mu charu ŵamanye kuti FUMU nja nkhongono. Ntheura mazuŵa ghose imwe muti mopenge FUMU, Chiuta winu.”