Read new_tumbuka_bible Yoshuwa 6 Bible Online

Yoshuwa 6 - new_tumbuka_bible bible

Yoshuwa 6

¹Vipata vya msumba wa Yeriko vikajarika na kuvikiririka chomene kuti ŵaIsraele ŵareke kunjira. Kukaŵavye munthu wakufumira kuwaro, panji wakunjira mukati.

²Ndipo FUMU yikati kwa Yoshuwa, “Wona nkhupereka msumba wa Yeriko mu mawoko ghako. Nkhuwupereka pamoza na karonga wakhe na vinkhara vyakhe vya nkhondo.

³Mwende pamoza na ŵasilikari ŵa nkhondo kuzingirira msumba kamoza pera. Muchite ichi pa mazuŵa ghankhonde na limoza.

⁴Ŵasofi ŵankhonde na ŵaŵiri ŵayeghe mbata zinkhonde na ziŵiri za masengwe gha mberere zanarume panthazi pa Bokosi la Phangano. Pa zuŵa la chinkhonde na chiŵiri, mose mukazingilire msumba kankhonde na kaŵiri, uko ŵasofi ŵakulizga zimbata.

⁵Para mbata za masengwe gha mberere zanarume zikulira chomene, penepapo ŵasilikari wose nawo ŵachemerezge na nchemo yikuru. Ntheura linga la msumba lamkuwa pasi, ndipo musilikari yose wakanjire mu msumba apo warazgira.”

⁶Penepapo Yoshuwa, mwana wa Nuni wakachema ŵasofi ndipo wakati kwa iwo, “Torani Bokosi la Phangano la FUMU ndipo muchite kuti ŵasofi ŵanyakhe ŵankhonde na ŵaŵiri ŵayeghe mbata za masengwe gha mberere zanarume ŵaŵe panthazi pa Bokosi la Phangano.”

⁷Ndipo wakaŵalangula ŵanthu wakati, “Yambani kwenda kuzingirira msumba, ndipo ŵasilikari ŵadangire kwenda panthazi pa Bokosi la Phangano la FUMU.”

⁸Para Yoshuwa wakayowoya ku ŵanthu, ŵasofi ŵankhonde na ŵaŵiri awo ŵakayegha zimbata zinkhonde na ziŵiri za masengwe gha mberere zanarume panthazi pa FUMU ŵakadangira na kulizga mbata zawo, ndipo Bokosi la Phangano la FUMU likiza pamanyuma zawo.

⁹Ŵalinda awo ŵakayegha mahomwa ŵakendanga panthazi pa ŵasofi awo ŵakalizganga zimbata. Ndipo ŵalinda awo ŵakaŵa kumanyuma ndiwo ŵakarondezga Bokosi la Phangano. Nyengo yose iyi zimbata zikaliranga kwambula kureka.

¹⁰Kweni Yoshuwa wakaŵalangula ŵanthu wakati, “Mureke kuya kachemerezga, kuchita chiwawa nanga nkhuyowoya mazgu ghali ghose kufikira pa zuŵa ilo ine ndizamkumuphalirani kuti, ‘Chemerezgani.’ Penepapo ndipo mukachemerezge.”

¹¹Ntheura ŵakenda nalo Bokosi la Phangano la FUMU kuzingirira msumba kamoza pa zuŵa. Ŵakawerera ku msasa kuya kagona kwenekura.

¹²Ndipo Yoshuwa wakawuka na mulenjelenje ndipo ŵasofi ŵakanyamura Bokosi la Phangano la FUMU.

¹³Ŵasofi ŵankhonde na ŵaŵiri awo ŵakayegha zimbata zinkhonde na ziŵiri za masengwe gha mberere zanarume ŵakenda panthazi pa Bokosi la Phangano la FUMU uku ŵakulizga zimbata zira kwambula kureka. Ŵalinda awo ŵakayegha mahomwa ŵakadangira, ndipo awo ŵakaŵa kumanyuma ŵakarondezga Bokosi la Phangano, uko zimbata zikulira kwambula kureka.

¹⁴Ndipo pa zuŵa la chiŵiri ŵakenda kuzingirizga msumba na kuwerera ku msasa. Ŵakachita ntheura kwa mazuŵa ghankhonde na limoza.

¹⁵Pa zuŵa la chinkhonde na chiŵiri ŵakawuka ku matandakucha, pambere zuŵa lindafume, ŵakenda kuzingirira msumba mwa ntheura pera kankhonde na kaŵiri. Pakaŵa pa zuŵa lenelira pera apo ŵakazingirira msumba kankhonde na kaŵiri.

¹⁶Ndipo pakuzingirira kankhonde na kaŵiri, ŵasofi ŵati ŵalizga zimbata Yoshuwa wakati ku ŵanthu, “Chemerezgani, pakuti FUMU yamupani msumba.

¹⁷Ndipo msumba na vyose ivyo vili mwenemumo mukwenera kuviparanya petu nga ndi sembe kwa FUMU. Rahabu yekha muleŵe yura na wose awo wali nawo mu nyumba yakhe, ndiwo muŵareke kuŵa ŵamoyo chifukwa wakabisa ŵakuskora awo tikaŵatuma.

¹⁸Kweni muchenjere kuti mureke kutorapo kalikose ako kakwenerera kuparanyika, mwakuti mureke kujitorera pharaniko kwa mwaŵene. Usange mungachita ntheura, muti muchite kuti msasa wa Israele utembekere pharaniko na kunjizga suzgo pa msumba.

¹⁹Kweni siliva lose, golide na viteŵetero vya mkuŵa na vya visulo ndi vyakupatulikira FUMU. Mukavinjizge mu chakusungiramo vyuma vya FUMU.”

²⁰Para ŵasofi ŵakalizga zimbata, ndipo ŵanthu ŵakati ŵapulika kulira kwa zimbata, ŵakachemerezga na nchemo yikuru, ndipo ŵakati ŵacherezga, linga la msumba likawa pasi phuu! Ntheura musilikari yose wakunjira waka mu msumba apo wakarazga. Ndipo ŵakapoka msumba ura.

²¹Ndipo ŵakaparanya vyose vya mu msumba. Ŵakakoma na lupanga ŵanarume na ŵanakazi, ŵana na ŵarara, ng'ombe, mberere, na mbunda wuwo.

²²Ntheura Yoshuwa wakati ku ŵanthu ŵaŵiri ŵara awo ŵakaya kapachira charu, “Rutani mukanjire mu nyumba ya mwanakazi muleŵe yura ndipo mukamutore pamoza na wose awo wali nawo kwakuya na chirapo chinu kwa iyo.”

²³Ndipo ŵanyamata ŵara awo ŵakaya kapachira charu, ŵakaruta, ŵakaya katora na kwiza nayo Rahabu, ŵawiske, ŵanyina ndipo na ŵadumbu ŵakhe na wose awo wakaŵa nawo. Ŵakiza na mbumba yakhe yose. Ndipo ŵakaŵaŵika kuwaro pafupi na msasa wa ŵaIsraele.

²⁴Ŵakocha na moto msumba wose na vyose ivyo vikaŵa mwenemumo, kweni siliva, golide, na viteŵetero vya mkuŵa, na vya visulo, ŵakaviŵika mu nyumba ya FUMU yakusungiramo vyuma.

²⁵Ntheura Yoshuwa wakamuponoska Rahabu, mwanakazi muleŵe yura pamoza na mbumba yakhe na wose awo wakaŵa nawo chifukwa ŵakabisa nthumi zira izo Yoshuwa wakazituma kuya kapachira Yeriko, ndipo wakukhara mukati mu ŵaIsraele mpaka muhanya uno.

²⁶Pa nyengo yeneyira, Yoshuwa wakachita chirapo panthazi pa FUMU wakati: “Watembeke munthu panthazi pa FUMU, uyo wangiza kuti wazengeso msumba wa Yeriko. Yose uyo wati wazengeso lufura lwakhe, ŵati watayenge umoyo wa mwana wakhe wa uŵere. Yose uyo wati wazenge vipata vyakhe, wati watayenge umoyo wa mwana wakhe nkhwangu.”

²⁷Ntheura FUMU yikaŵa na Yoshuwa ndipo lumbiri lwakhe lukatandazgikira kosekose.