Read new_tumbuka_bible Yoshuwa 7 Bible Online

Yoshuwa 7 - new_tumbuka_bible bible

Yoshuwa 7

¹Kweni ŵaIsraele ŵakachita mu kuwura kugomezgeka pa vinthu ivyo vikaŵa vyakutembeka. Akani mwana wa Karimi, mwana wa Zabidi, mwana wa Zera, wa fuko la Yuda, wakatorapo vinyakhe vya ivyo vikaŵa vyakutembeka. Ntheura ukari wa FUMU ukagolera kwimikana na ŵaIsraele.

²Yoshuwa wakatuma ŵanarume kufuma ku Yeriko kuruta ku msumba wa Ayi, pafupi na Beti Aveni ku mafumiro gha dazi kwa Betele. Wakati kwa iwo, “Rutani mukapache msumba wa Ayi na charu chakhe.” Ŵanthu ŵara ŵakaruta ndipo ŵakawupacha msumba wa Ayi.

³Para ŵanthu ŵara ŵakawerera kwa Yoshuwa, ŵakati kwa iyo, “Msumba wa Ayi nguchoko chomene. Kuti kukukhumbikwa ŵasilikari ŵanandi kuruta kuya karwa nawo chara. Mutumeko waka ŵasilikari pafupi 2,000 panji 3,000.” Mureke kuvuska ŵasilikari ŵanandi chara.

⁴Ntheura pafupi ŵasilikari 3,000 ŵakaruta kuya karwa nkhondo, kweni ŵakathereskeka na kuchimbizgika na ŵanthu ŵa msumba wa Ayi.

⁵Ndipo ŵanthu ŵa msumba wa Ayi ŵakakomapo ŵaIsraele pafupifupi 36. Ndipo ŵakaŵachimbizga ŵaIsraele kufuma ku chipata cha msumba kuya kafika uko ŵakaswanga mawe, ndipo ŵakaŵakomera pachikhizga. Pakupulika ichi, ŵaIsraele ŵakathika lusoko ndipo ŵakaŵa na wofi ukuru.

⁶Penepapo Yoshuwa na ŵarongozgi ŵa ŵaIsraele ŵakaparura vyakuvwara vyawo ndipo ŵakawa kavunama panthazi pa Bokosi la Phangano la FUMU mpaka na mise. Ndipo ŵakajithira fuvu pa mitu yawo.

⁷Ndipo Yoshuwa wakati, “Mwe FUMU Chiuta, kasi nchifukwa uli muli kutambuska Yorodani na kutipereka ku ŵaAmori kuti ŵatimare petu? Kukenera kuti mphanyi ise tikakhara waka ku sirya linyakhe la mronga wa Yorodani?

⁸Mwe FUMU! Kasi ine nditi ndiyowoyechi pakuti ŵasilikari ŵithu ŵachimbira ku ŵarwani withu?”

⁹ŴaKanani na ŵanthu ŵanyakhe wose awo ŵakukhara mu charu ŵati ŵapulike ndipo ŵati ŵize na kutizinga na kutimara petu. Kasi imwe muti muchite vichi pa zina linu likuru?

¹⁰FUMU yikati kwa Yoshuwa, “Wuka! Kasi wawirachi kavunama?

¹¹ŴaIsraele ŵananga! Ŵaswa phangano lane ilo nkhalangula kuti ŵasunge. Vinthu vyakutembeka ivyo nkhaŵakanizga kutora, ŵiba na kupusika, ndipo ŵaviŵika pamoza na katundu wawo.

¹²Ichi ndicho chifukwa ŵaIsraele kuti ŵangima kulimbana na ŵarwani ŵawo chara. Ŵakuwerera na kuchimbira chifukwa iwo nawo sono ŵatembeka. Ine kuti nditi ndiŵe namwe pamoza chara, pekhapekha muwuskemo chose icho ndi chakutembeka mukati mwinu!

¹³Wuka! Uŵapatuliske ŵanthu. Uŵaphalire kuti, ‘Jipatuliskani mwekha kunozgekera na machero.’ Iwe uti kwa iwo, ‘FUMU, Chiuta wa Israele wakuti, “Muli vinthu vyakutembeka mukati mwinu, imwe ŵaIsraele! Imwe kuti mungima kulimbana na ŵarwani ŵinu chara, pekhapekha muviwuskemo mukati mwinu.” ’

¹⁴Na machero, mwize kwa ine fuko na fuko. Fuko ilo FUMU yakora pa mphenduzgo liti lisenderere mbumba na mbumba, ndipo mbumba iyo FUMU yakora yiti yisenderere nyumba na nyumba, ndipo nyumba iyo FUMU yakora yiti yisenderere munthu na munthu.

¹⁵Ndipo yose uyo wati wakoreke na kanthu kakutembeka, iyo wati wakomeke pamoza na mbumba yakhe yose. Katundu wakhe yose nayo wati wocheke pa moto, pakuti waswa phangano la FUMU ndipo wachita chinthu chakukhozga soni mukati mwa Israele.”

¹⁶Ntheura Yoshuwa wakawuka na mulenjelenje ndipo wakaŵachema ŵaIsraele kwiza pafupi na iyo fuko na fuko. Ndipo mphenduzgo yikawira fuko la Yuda.

¹⁷Wakasendezga pafupi mbumba za Yuda, ndipo mphenduzgo yikawira mbumba ya Zera. Wakasendezgera pafupi mbumba ya Zera munthu na munthu, ndipo mphenduzgo yikawira Zabidi.

¹⁸Yoshuwa wakasendezgera pafupi mbumba yakhe munthu na munthu ndipo Akani mwana wa Karimi, mwana wa Zabidi, mwana wa Zera, wa fuko la Yuda ndipo mphenduzgo yikamuwira.

¹⁹Ntheura Yoshuwa wakati kwa Akani, “Mwana wane, yowoya unenesko panthazi pa FUMU, Chiuta wa Israele, ndipo uzomere kwa iyo. Ndiphalira sono icho wachita, ungandibisanga chara.”

²⁰Akani wakazgora Yoshuwa wakati, “Mbunenesko ndanangira FUMU, Chiuta wa Israele. Icho ndachita ndi ichi:

²¹Para nkhati ndawona mukati mu vyakuskogha, munjilira wakutowa wakufumira ku Babuloni, pafupi makilogiramu ghaŵiri gha siliva, na kujumpha hafu kilogiramu wa golide, nkhavidokera na kutora. Ndipo wonani, nkhajimira pasi mu hema lane, kusi kwakhe kuli siliva.”

²²Penepapo Yoshuwa wakatuma ŵanthu awo ŵakachimbilira ku hema, ndipo wonani, vinthu vyakutembeka vikabisikamo nadi, ndipo siliva likaŵa nadi kusi kwakhe.

²³Ŵakatora vinthu vira kufuma mu hema, ndipo ŵakiza navyo kwa Yoshuwa na ku ŵaIsraele wose, ndipo ŵakaviŵika pasi panthazi pa FUMU.

²⁴Ntheura Yoshuwa pamoza na ŵaIsraele wose ŵakatora Akani mwana wa Zera, siliva, munjilira ura, golide, ŵana ŵakhe ŵanarume na ŵanakazi, ng'ombe zakhe, mbunda zakhe, mberere na mbuzi zakhe, hema lakhe, na vyose ivyo wakaŵa navyo. Vyose ivi ŵakavitorera ku dambo la Akori.[2]

²⁵Yoshuwa wakati, “Kasi nchifukwa uli watitorera ise visuzgo? FUMU ndiyo sono yiti yize na visuzgo pa iwe!” Penepapo ŵaIsraele wose ŵakamudina na mawe Akani. Ŵakadinaso na mawe ŵabali ŵakhe wose ndipo ŵakocha pa moto mathupi ghawo.

²⁶Pachanya pa Akani ŵakaponyapo mulu ukuru wa mawe, weneuwo ulipo mpaka muhanya uno. Ntheura FUMU yikawezgako ukari wakhe wakofya. Pa chifukwa ichi malo ghara ghakuchemeka kuti Dambo la Akori mpaka muhanya uno.