Read new_tumbuka_bible Yoshuwa 8 Bible Online

Yoshuwa 8 - new_tumbuka_bible bible

Yoshuwa 8

¹FUMU yikati kwa Yoshuwa, “Ungopanga chara nanga nkhuthika lusoko. Tora ŵasilikari wose pamoza na iwe ndipo murute kuti mukarwe na msumba wa Ayi. Wona ndapereka karonga wa ku Ayi, ŵanthu ŵakhe, msumba na charu chakhe mu woko lako.

²Mukawuchitire msumba wa Ayi na karonga wakhe nga umo mukachitira na msumba wa Yeriko na karonga wakhe. Kweni vyakuskogha na ng'ombe mujitorere kuŵa vyinu. Mukachite kuwubuchizga msumba pakufumira kumanyuma kwakhe.”

³Ntheura Yoshuwa wakawuka pamoza na ŵasilikari wose ŵakaruta ku msumba wa Ayi. Yoshuwa wakasankha vinkhara vya nkhondo 30,000 ndipo wakaŵatuma kuruta na usiku.

⁴Ndipo wakalangula wakati, “Wonani, mukakakhazge pakwizira kumanyuma kwa msumba. Mureke kuŵa kutali na msumba chara, kweni mose mukaŵenge ŵakunozgeka.

⁵Ine pamoza na ŵanthu wose awo ŵali na ine tiwurotokere msumba. Ndipo para ŵamkufuma kuti ŵarwe na ise nga ndi pakudanga, ise tizamkuchimbira.

⁶Iwo ŵamkufuma na kutichimbizga mpaka tiŵaguzire kutali na msumba. Chifukwa ŵamkupima kuti, ‘Ŵakutichimbira nga ndi umo ŵakachitira pakudanga.’ Ntheura ise tamkuŵachimbira.

⁷Penepapo imwe mukafume uko mwakhazganga na kuwutora msumba. FUMU, Chiuta winu wati wawupereke mu woko linu.

⁸Ndipo para mwakawupoka msumba, mukawubuske na moto. Mukachite icho FUMU yamulangulani. Wonani, ine ndamuphalirani.”

⁹Ntheura Yoshuwa wakaŵatuma, ndipo ŵakaruta ku malo ghakukhazgirako na kuya kakhara pakati pa Betele na Ayi ku manjiliro gha dazi wa msumba wa Ayi. Usiku wenewura Yoshuwa wakaŵa na ŵanthu.

¹⁰Na machero ghakhe na mulenjelenje Yoshuwa wakawuka na kuwunganya ŵasilikari ŵakhe. Ndipo iyo na ŵarongozgi ŵa ŵaIsraele ŵakenda panthazi pa ŵanthu kuruta ku msumba wa Ayi.

¹¹Ndipo ŵasilikari wose awo ŵakaŵa nayo ŵakenda ndipo ŵakafika kufupi na msumba wa Ayi na kuzenga msasa ku dera la ku mpoto kwa msumba. Pakati pa iwo na msumba pakaŵa chinkhwawu.

¹²Yoshuwa wakatorapo ŵasilikari pafupi 5,000 na kuŵaŵika kuti ŵakhazge pakati pa Betele na Ayi, ku manjiliro gha dazi kwa msumba.

¹³Ndipo ŵakaŵika ŵasilikari kuti ŵaŵe pa malo ghawo. Mpingo ukuru wose uwo ukaŵa mu msasa ukaŵa ku mpoto kwa msumba, ndipo awo ŵakakhazga kumanyuma kwa msumba ŵakaŵa ku manjiliro gha dazi kwa msumba. Usiku ura Yoshuwa wakaŵa na ŵanthu mu dambo.

¹⁴Para karonga wa msumba Ayi wakawona ichi, iyo na ŵanthu ŵakhe wose ŵa mu msumba ŵakawuka na mulenjelenje kuti ŵarwe na ŵaIsraele pa malo ghanyakhe agho ghakathyana na Araba. Kweni wakamanya chara kuti kukaŵa ŵasilikari ŵanyakhe awo ŵakamukhazga kufuma kunyuma zakhe.

¹⁵Sono Yoshuwa na ŵaIsraele wose ŵakapusikizga nga ndi para ŵakutondeka ndipo ŵakachimbilira ku mapopa.

¹⁶Ŵanthu wose ŵa mu msumba wa Ayi ŵakachemeka kuti ŵafume na kuchimbizga ŵaIsraele. Ndipo apo ŵakachimbizganga Yoshuwa, ŵakaguzikira kutali na msumba.

¹⁷Kukharamo mwanarume waliyose chara mu msumba wa Ayi nesi mu Betele uyo wakareka kuruta kuya kachimbizga ŵaIsraele. Ŵakareka msumba wambula kujara, ŵakaruta kuya kachimbizga ŵaIsraele.

¹⁸Penepapo FUMU yikati kwa Yoshuwa, “Nyoroskera mukondo, uwo uli mu woko lako, ku msumba wa Ayi, pakuti msumba uwu nditi ndiwupereke mu woko lako.” Ntheura Yoshuwa wakanyoroskera mukondo wakhe ku msumba.

¹⁹Wakati wanyoroskera mukondo wakhe ku msumba, awo ŵakakhazganga ŵakawuka luŵiroluŵiro apo ŵakaŵa na kuchimbilirako ku msumba. Ŵakanjira mu msumba na kuwupoka ndipo kwambula kuchedwa ŵakawubuska moto.

²⁰Para ŵanthu ŵa msumba wa Ayi ŵakalaŵiska kumanyuma, ŵakawona josi la kuphya kwa msumba lati waka pholi kuchanya. Nkhongono zakuti ŵachimbilire uku na uku zikaŵamalira, pakuti ŵaIsraele awo ŵakaŵachimbizganga ku mapopa, ŵakaŵazgokera na kuŵachimbizga iwo awo ŵakachimbizganga.

²¹Ndipo para Yoshuwa na ŵaIsraele wose ŵakawona kuti awo ŵakakhazganga ŵatora msumba ndipo josi lati waka pholi mu msumba, ŵakawerera na kuŵakoma ŵanthu ŵa msumba wa Ayi.

²²Sono ŵasilikari awo ŵakakhazga ŵara ŵakiza kufuma mu msumba mwakuti ŵanthu ŵa msumba wa Ayi ŵakazingirizgika uku na uku na ŵaIsraele. ŴaIsraele ŵakaŵakoma ŵa msumba wa Ayi wose kwambula kurekapo na yumoza wamoyo panji wakupona.

²³Ndipo ŵakakora karonga wa msumba wa Ayi na kwiza nayo kwa Yoshuwa.

²⁴Para ŵaIsraele wakamara kukoma ŵanthu wose ŵa msumba wa Ayi ku thondo na ku mapopa uko ŵakaŵachimbizgira, ndipo wose ŵati ŵakakomeka na lupanga, ŵaIsraele wose ŵakawerera ku Ayi na kukoma wose mwenemura.

²⁵Ŵanthu wose ŵa mu msumba wa Ayi awo ŵakakomeka zuŵa lenelira ŵakaŵa 12,000, ŵanarume na ŵanakazi.

²⁶Pakuti Yoshuwa wakawezgako woko lakhe chara ilo wakanyoroskera mukondo wakhe mpaka wose awo ŵakakharanga mu msumba wa Ayi ŵakamara petu.

²⁷Ng'ombe pera na vyakuskogha vya msumba ura ndivyo ŵaIsraele ŵakajitorera kuŵa vyakuskogha vyawo nga ndi umo FUMU yikalangulira Yoshuwa.

²⁸Ntheura Yoshuwa wakocha msumba wa Ayi na kuwuzgora mulu wa mahami kwa muyirayira mpaka muhanya uno.

²⁹Yeshuwa wakamupayika karonga wa msumba wa Ayi pa khuni kufikira na mise. Pakunjira kwa dazi, Yoshuwa wakalangula kuti ŵakhizge thupi kufuma pa khuni, ŵalitore na kulitaya pasi pa chipata cha msumba. Ndipo pachanya pakhe ŵakawunjikapo mulu ukuru wa mawe agho ghachalipo mpaka muhanya uno.

³⁰Penepapo Yoshuwa wakazenga jochero la FUMU pa Phiri la Ebala,

³¹umo Mozesi muteŵeti wa FUMU wakalangulira ŵaIsraele. Wakalizenga kwakuyana na umo kuli kulembeka mu Buku la Marango gha Mozesi, kuti liŵenge jochero la mawe ghambula kuŵaja agho munthu walije kukhwaskapo na chakuŵajira. Penepara ŵakapereka kwa FUMU sembe yakocha na ya wenenawene.

³²Ndipo penepara, panthazi pa ŵaIsraele, wakalembapo pa mawe mazgu agho wakatorera kufuma pa Dango la Mozesi ilo likalembeka.

³³ŴaIsraele wose, ŵalendo, ŵenecharu, pamoza na ŵarongozgi ŵawo, nduna na ŵeruzgi, ŵakimilira ku dera lino na dera lira la Bokosi la Phangano la FUMU, kulaŵiska ŵasofi awo ŵakaŵa ŵaLevi, ŵeneawo ŵakayegha Bokosi la Phangano. Hafu wa ŵanthu ŵakimilira kuthyana na Phiri la Gerizimu, ndipo hafu wa ŵanthu ŵakimilira kuthyana na Phiri la Ebala nga ndi umo Mozesi muteŵeti wa FUMU wakalangulira pakudanga kuti ŵatumbike ŵaIsraele.

³⁴Pamanyuma Yoshuwa wakaŵazga mazgu ghose gha marango, pamoza na vitumbiko na nthembo, nga ndi umo vili kulembekera mu Buku la Marango.

³⁵Pakaŵavye na lizgu limoza ilo Mozesi wakalangula leneilo Yoshuwa wakareka kuliŵazga ku ŵaIsraele wose awo ŵakawungana awo mukati mwawo mukaŵa ŵanakazi, ŵana, na ŵalendo awo ŵakakharanga mukati mwawo.